ގދ.އަތޮޅު ކައުންސިލް 16 އަހަރުން ދަށުގެ ފުޓްސަލް މުބާރާތުގެ ފައިނަލް މެޗު މާދަމާ ހަވީރު

މިހާރު ތިނަދޫ ސިޓީގައި ކުރިއަށްދާ "ގދ.އަތޮޅު ކައުންސިލްގެ 16 އަހަރުން ދަށުގެ ފުޓްސަލް މުބާރާތް 2025" ގެ ފައިނަލުގައި މާދަމާ ހަވީރު ތިނަދޫ ސިޓީ އާއި ފިޔޯރީ ވާދަކުރާ މެޗަށް ދެޓީމުން ވެސް ވަނީ ވަރަށް ރަނގަޅަށް ތައްޔާރުވެފައެވެ.

ތިނަދޫ ސިޓީ މުބާރާތުގެ ފައިނަލުން ޖާގަ ހޯދީ ސެމީފައިނަލް ފުރަތަަމަ މެޗުގައި 4-1 ގެ ނަތީޖާއަކުން ހޯޑެއްދޫ ބަލިކުރުމަށްފަހު އެވެ. އަދި ފިޔޯރީ ފައިނަލުން ޖާގަހޯދީ ސެމީފައިނަލްގެ ދެވަނަ މެޗުގައި 4-2 ގެ ނަތީޖާއަކުން ފަރެސްމާތޮޑާ ބަލިކުރުމަށްފަހު އެވެ. އަދި މިދެޓީމު ގުރޫޕް ސްޓޭޖުގައި ވާދަކުރި މެޗު 6-2 ގެ ނަތީޖާއަކުން ކާމިޔާބުކުރީ ތިނަދޫ ސިޓީ އިންނެވެ.

މާދަމާގެ ފައިނަލް މެޗާއި ބެހޭގޮތުން ތިނަދޫ ޓީމު ކޯޗު ބުނީ ގުރޫޕް ސްޓޭޖުގައި ފިޔޯރީ އާއި ދެކޮޅަށް މޮވި މެޗުގެ ނަތީޖާއި މެދު ނުވިސްނާކަމަށާއި މިއީ މުޅިން ތަފާތު މެޗެއްކަމަށެވެ. ތިނަދޫ ޓީމުން ފިޔޯރީ ޓީމަށް އިޚްތިރާމްކުރާ ކަމަށާއި ކުރުން ވެސް ފައިނަލުގައި ފިޔޯރީ ކުޅެފާނެކަމަށް ގަބޫލުކުރެވުނު ކަމަށެވެ.

އިތުރަށް ވާހަކަދައްކަމުން ތިނަދޫ ޓީމުގެ ކޯޗު ބުނީ ޓާގެޓަކީ މުބާރާތުގެ ތަށިހޯދުންކަމަށާއި ، އެކަން ހާސިލްކުރުމަށް ޓީމު އޮތީ ފުރިހަމައަށް ތައްޔާރަށްކަމަށެވެ. އަދި ޓީމުގެ ވަރަށް ބޮޑު އެދުމެއް ވީހާވެސް ގިނަ ބަޔަކު ދަނޑަށް ހާޒިރުވެ ކުޅިވަރުގެ ރޫހާއި އެއްގޮތަށް ޓީމަށް ތަރުހީބުދުނުމަކީ އަދި ސަޕޯޓަރުން މާދަމާ ޓީމަށް ތަރުހީބުދިނުމުގެ ގޮތުން ރަތްކުލަ ބޭނުންކުރުމަކީ ޓީމުގެ ވަރަށް ބޮޑު އެދުމެކެވެ.

ސެމީފައިނަލުގައި ފަރެސްމާތޮޑާ ބަލިކުރި މެޗަށްފަހު ފައިނަލް މެޗާއި ބެހޭގޮތުން ގާފު ސްޕޯޓްސް އާއި ވާހަކަދައްކަމުން ފިޔޯރީގެ ކޯޗު ބުނީ ޓީމުގައި އަނިޔާގެ ކުދިކުދި މައްސަލަތަކެއްހުރި ނަމަވެސް ފައިނަލް މެޗަށް އެޓީމުން ވަރަށް ރަނގަޅަށް ތައްޔާރުވާނެ ކަމަށެވެ. އަދި ގުރޫޕް ސްޓޭޖުގައި ތިނަދޫ އަތުން ބަލިވި ނަމަވެސް ފައިނަލް މެޗަށް އެޓީމުން ނުކުންނާނީ ތިނަދޫ ބަލިކޮށް މުބާރާތް ކާމިޔާބުކުރުމުގެ އަޒުމުގައެވެ

26 ޖުލައި 2025 އިން 04 އޮގަސްޓް 2025 ގެ ނިޔަލަށް ތިނަދޫ ސިޓީގައި ކުރިއަށްދާ މިމުބާރާތުގައި މިއަހަރު ގދ.އަތޮޅުގެ އަށް ރަށަކުން އަށް ޓީމު ވާދަކުރަމުން އަންނައިރު، މުބާރާތް ކުރިއަށްދަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ.

މިމުބާރާތުގެ އެކްސްކުލޫސިވް ޕާޓްނަރއަކަށް މިނިސްޓްރީ އޮފް ސްޕޯޓްސް ފިޓްނަސް އެންޑް ރެކްރިއޭޝަން ހަމަޖައްސާފައިވާއިރު، ތިނަދޫ ސިޓީ ސްޓޭޑިއަމް ވަނީ މުބާރާތުގެ ކޯ-ޕާޓްނަރ އަކަށް ހަމަޖައްސާފައެވެ. އަދި މީގެ އިތުރުން މުބާރާތުގެ އެސޯސިއޭޓް ޕާޓްނަރުންގެ ގޮތުގައި ތިނަދޫ ސިޓީ ކައުންސިލް، އާރުޑީސީ ތިނަދޫ ސިޓީ، ޕަބްލިކް ވޯކްސް ސަރވިސެސް، ތިނަދޫ ސިޓީ، ހުވަދޫ ރެކްރިއޭޝަން ، ހަވަރު ސްޕޯޓްސް، ކުލަބު ދަޑެކޮޑެއަންސް، ތިނަދޫ ސިޓީ އެފްސީ ގެ އިތުރުން އެމްޓީސީސީ ވަނީ ހަމަޖައްސާފައެެވެ.

މީގެ އިތުރުން މުބާރާތުގެ ސެކިއުރިޓީ ޕާޓްނަރަކީ މޯލްޑިވްސް ޕޮލިސް ސަރވިސް އެވެ.ޑިޖިޓަލް ޕާޓްނަރަކަށް ދިރާގު ހަމަޖައްސާފައިވާއިރު، މެޑިކަލް ޕާޓްނަރަކީ ޑރ.އަބްދުއްސަމަދު މެމޯރިއަލް ހޮސްޕިޓަލެވެ. އަދި ބެވަރެޖް ޕާޓްނަރުންގެ ގޮތުގައި ހެޕީ މާކެޓް އަދި ހަތްތެރި ކެފޭ ހަމަޖައްސާފައިވާއިރު، ރިފްރެޝްމެންޓް ޕާޓްނަރަކީ ވޮމެން އެމްޕަވަމެންޓް އެސޯސިއޭޝަން އޮފް ތިނަދޫ )ވީޓް އެވެ. އަދި ޕްރިންޓިންގ ޕާޓްމަރަކަށް ނޯވަޓެކް ހަމަޖައްސާފައިވާއިރު، މުބާރާތުގެ އެންޓަޓެއިނިންގ ޕާޓްނަރަކީ ރައްފުށު ބޮޑުބެރު ގުރޫޕެވެ. އަދި މުބާރާތުގެ ލައިވް ކަވަރޭޖް ޕާޓްނަރަކަށް އިވެންޓް ކާސްޓް މޯލްޑިވްސް ހަމަޖައްސާފައިވާއިރު، އޮފިޝަލް މީޑިއާ ޕާޓްނަރަކީ ގާފު ސްޕޯޓްސް އެވެ.