ގަތުލުއާންމު ހުއްޓާލުމުގެ ގަޑި ޖެހިއްޖެ: ހަމާސްއިން އަސީރުންގެ ލިސްޓު ހާމަކުރަންދެން ޔަހޫދީން ހަމަލާދޭނެ!

ޔަހޫދީން ޣައްޒާގައި ފާއިތުވި 15 މަސް ދުވަހު ހިންގަމުންދިޔަ ގަތުލުއާންމު ހުއްޓާލުމަށް ހަމާސްއިން އިޒްރޭލުން އެއްބަސްވެފައިވާ ގަޑި ޖެހުނު އިރުވެސް އިޒްރޭލުން އެދުނު ގޮތަށް ހަމާސްއިން މިނިވަން ކުރާ އަސީރުންގެ މައުލޫމާތު ހާމަކޮށްފައި ނުވުމުން ހަމަލާތައް ކުރިޔަށް ގެންދިޔުމަށް އިޒްރޭލުގެ އަސްކަރިއްޔާއިން ނިންމައިފި އެވެ.

މިދިޔަ ހަފްތާގައި އިޒްރޭލާއި ހަމާސްއިން ހަމަލާބަދަލުކުރުންތައް ހުއްޓާލުމަށް އެއްބަސްވުމަކަށް އައިސް މިއަދު ގައްޒާ ގަޑިން 08:30 ގައި އެކަން ތަންފީޒު ކުރަން އޮތީ ތައްޔާރުވެފައި އެވެ.

ނަމަވެސް ރޭގެ ވަގުތެއްގައި އިޒްރޭލުގެ ބޮޑުވަޒީރު ނިރުބަވެރި ބެންޖަމިން ނަތަންޔާހޫ ވަނީ ހަމަލާތައް ހުއްޓާލާނީ ހަމާސްގެ ބެލުމުގެ ދަށުގައި ތިބި ޔަހޫދީ އަސީރުންގެ ތެރެއިން ފުރަތަމަ މިނިވަން ކުރަން ހަމަޖެހިފައިވާ އަސީރުންގެ ވަނަވަރު ހާމަކުރުމުން ކަމަށް ބުނެފައި އެވެ. އަދި ހަމާސްއިން ވެސް ވަނީ އެކަމަށް އެއްބަސްވެފައި އެވެ.

ނަމަވެސް ހަމަލާތައް ހުއްޓާލުމުގެ ވަގުތު ޖެހުނު އިރުވެސް ހަމާސްއިން ލިސްޓު އާންމުކޮށްފައި ނުވުމާއި އެކު ހަމަލާތައް ހުއްޓާނުލައި ކުރިޔަށް ގެންދިޔުމަށް ޔަހޫދީ އަސްކަރިއްޔާއިން ވަނީ ނިންމާފައި އެވެ. އިސްރާއީލުގެ އަސްކަރިއްޔާގެ ތަރުޖަމާނު ޑެނިއަލް ހަގާރީ ނެރުނު ބަޔާނެއްގައި ބުނީ މިއަދު ހެނދުނާ ހަމައަށް ހަމާސް ޖަމާއަތުން އަދާކުރަންޖެހޭ ވާޖިބުތައް އަދާނުކުރާ ކަމަށާއި އެއްބަސްވުމާ ހިލާފަށް އިސްރާއީލަށް ރަހީނުކުރި މީހުންގެ ނަންތައް [މިއަދު ދޫކޮށްލަން ތައްޔާރުވެފައިވާ] ދީފައި ނުވާ ކަމަށެވެ.

އަދި ޔަހޫދީ ބޮޑުވަޒީރުގެ އިރުޝާދާ އެއްގޮތަށް ހަމާސް ޖަމާއަތުން އަދާކުރަންޖެހޭ ޒިންމާތައް އަދާ ނުކުރާހާ ހިނދަކު ހަނގުރާމަ ހުއްޓާނުލާނެ ކަމަށާއި ހަމާސް އިން އެ އެއްބަސްވުމުގެ ޒިންމާ އަދާ ނުކުރާހާ ހިނދަކު [އިސްރާއީލުގެ އަސްކަރިއްޔާ] މިހާރު ވެސް ޣައްޒާއަށް ހަމަލާދެމުން އެބަގެންދާކަމަށް އޭނާ ބުންޏެވެ.

ހަމާސްއިން ބުނާ ގޮތުގައި އެއްބަސްވުމަށް ހަމާސްއިން ފުރިހަމައަށް ތަބާވާ ކަމަށާއި ނަމަވެސް ލިސްޓު އާންމު ނުކުރެވި ލަސްވަމުންދަނީ ޓެކްނިކަލް މައްސަލައާއި ގުޅިގެންނެވެ.