ޕްލޭއޮފްގައި ސީދާ ތިން ސެޓުން ގެމަނަފުށި ބަލިކޮށް ވާދޫ ފައިނަލުން ޖާގަހޯދައިފި

ގައްދޫގައި މިހާރު ކުރިޔަށްދާ " ބީ ބޯލްޑް ހުވަދޫ ވަތަބަނޑޭރި ވޮލީބޯލް ޗެލެންޖް 2024" ގައި މިރޭ ކުޅެވުނު ފިރިހެން ޑިވިޝަނުގެ ޕްލޭއޮފްގައި ފަސޭހަކަމާއެކު ސީދާ ތިން ސެޓުން ގެމަނަފުށި ބަލިކޮށް ވާދޫ އިން މުބާރާތުގެ ފައިނަލްގެ ދެވަނަ ޖާގަ ކަށަވަރުކޮށްފިއެވެ.

ވާދޫ ޕްލޭއޮފުން ޖާގަހޯދީ ލީގުބުރުގައި ކުޅުނު ހަތަރު މެޗުން ހޯދި އަށް ޕޮއިންޓާއެކު ލީގުބުރުގެ ދެވަނަ ޓީމުގެ ގޮތުގައެވެ. އަދި ގެމަނަފުށި ޕްލޭއޮފުން ޖާގަ ހޯދީ ލީގުބުރުގައި ކުޅުނު ހަތަރު މެޗުން ހޯދި ހަ ޕޮއިންޓާއެކު ޕޮއިންޓްގެ ގޮތުން ދާންދޫ އާއި އެއްވަރު ހެޑްޓޫހެޑްގެ ނަތީޖާއިން ކުރިހޯދައި ލީގުބުރުގެ ތިންވަނަ ޓީމުގެ ގޮތުގައެވެ.

މެޗުގެ ފުރަތަމަ ސެޓް ނުވަ ޕޮއިންޓްގެ ލީޑަކާއެކު 16-25 ގެ ނަތީޖާއަކުން ވާދޫ ކާމިޔާބުކުރިއިރު، ދެވަނަ ސެޓް އެޓީމުން ކާމިޔާބުކުރީ ހަތް ޕޮއިންޓްގެ ލީޑަކާއެކު 18-25 ގެ ނަތީޖާއަކުންނެވެ. އަދި މެޗުގެ ތިނަވަނަ ސެޓު ވެސް މާބޮޑު ވާދަވެރިކަމެއް ނެތި ވާދޫ ޓީމުން ކާމިޔާބުކުރީ ހަ ޕޮއިންޓްގެ ލީޑަކާއެކު 19-25 ގެ ނަތީޖާއަކުންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ވާދޫ ޓީމުގެ އިބްރާހިމް ފަޒީލް އެވެ.

މުބާރާތުގެ ފައިނަލުގައި ވާދޫ އިން ނުކުންނާނީ ލީގުބުރުގެ އެއްވަނަ ހޯދި ކުލަބު ބޮއްކުރާއި ދެކޮޅަށެވެ. އަދި މިދެޓީމު ލީގުބުރުގައި ކުޅުނު މެޗު ބޮއްކުރާ އިން ދެސެޓް ކާމިޔާބުކޮށްފައިވަނިކޮށް ފަހަތުން އަރައި ވާދޫ މޮޅުވީ 3-2 ގެ ނަތީޖާއަކުންނެވެ.

ގައްދޫ ކައުންސިލްގެ ފަރާތުން އިންތިޒާމްކޮށް މުޅި ހުވަދު އަތޮޅަށް ހުޅުވާލައިގެން ބާއްވާ މިމުބާރާތުގެ ފިރިހެން ޑިވިޝަނުގައި މިއަހަރު ފަސް ޓީމަކުން ވާދަކުރިއިރު، މި ޑިވިޝަނުގެ މެޗުތައް ކުރިއަށް ގެންގޮސްފައި ވަނީ ބައިވެރިވި ފަސް ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗުކުޅެ ލީގުބުރުގެ އެއްވަނަ ހޯދި ޓީމަކަށް މުބާރާތުގެ ފައިނަލްގެ ފުރަތަމަ ޖާގަ ލިބޭގޮތަށެެވެ.

މީގެ އިތުރުން ލީގުބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވޭ ޕްލޭއޮފް މެޗުން މޮޅުވާ ޓީމަކަށް ފައިނަލުގެ ދެވަނަ ޖާގަ ލިބިގެންދާނެއެވެ.

23 ޑިސެންބަރު 2024 އިން 1 ޖެނުއަރީ 2025 ގެ ނިޔަލަށް ކުރިއަށް ގެންދާ މިމުބާރާތުގެ ޗެންޕިއަން ޓީމަށް 55،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށަހަޅާފައި ވާއިރު، މުބާރާތުގެ ޓައިޓަލް ސްޕޮންސަރ އަކީ ބީ ބޯލްޑް ޕްރައިވެޓް ލިމިޓެޑެވެ. އަދި މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރުމަށް ހަމަޖެހިފައިވާއިރު، މުބާރާތުގެ މީޑިއާ ޕާޓްނަރަކީ ގާފު ސްޕޯޓްސް އެވެ.