ޒައިދާންގެ މޮޅު ސޭވްތަކާއެކު ފޮކްސެސް އަތުން އައުޓްލޯޒަށް އުނދަގޫ މޮޅެއް

މިހާރު ކުރިއަށްދާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގައި މިރޭ ކުޅެވުނު ފުރަތަމަ މެޗުގައި ފޮކްސެސް އާއި އައުޓްލޯޒް ކުޅުނު މެޗު ވާދަވެރި ކުޅުމަކަށްފަހު 1-0 ގެ ނަތީޖާއަކުން އައުޓްލޯޒް ކާމިޔާބުކޮށްފިއެވެ.

މުބާރާތުގައި އައުޓްލޯޒް ކުޅުނު ފުރަތަމަ މެޗުގައި ޓީމު 401 އަތުން އަތުން 3-1 ގެ ނަތީޖާއަކުން އެޓީމު މޮޅުވެފައިވާއިރު، ދެވަނަ މެޗުގައި މަޑަވެލި (ރަޓު ޓީމު) އަތުން އެޓީމު މޮޅުވީ 3-0 ގެ ނަތީޖާއަކުންނެވެ. އަދި ފޮކްސެސްގެ ފުރަތަމަ މެޗުގައި މަޑަވެލި (ރަޓު ޓީމު) އަތުން އެޓީމު 1-0 ގެ ނަތީޖާއަކުން ބަލިވެފައިވާއިރު، އެޓީމުގެ ދެވަނަ މެޗުގައި ޓީމު 401 އާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ.

ތިނަދޫ ސިޓީ އާރު އަވަށު ފުޓްސަލަ ދަނޑުގައި ކުޅެވުނު މިމެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އަދި އައުޓްލޯޒުން މެޗުގެ ލީޑު ހޯދި ލަނޑު ފުރަތަމަ ހާފުގެ ނުވަވަނަ މިނެޓުގައި ކާމިޔާބުކޮށްދިނީ އެޓީމުގެ އަޔާޒް އަހުމަދު އެވެެ.

މީގެ އިތުރުން މިހާފުގައި ފޮކްސެސްގެ ނުރައްކާތެރި ހަތަރު ހަމަލާއެއް އައުޓްލޯޒްގެ ކީޕަރު ޒައިދާން ހުޝިއާރުކަމާއެކު ދިފާއުކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އައުޓްލޯޒް ކުރީގައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ވާދަވެރި އަވަސްކުޅުމެއް ފެނިގެންދިޔައިރު، މިހާފުގައި ދެޓީމުން ވެސް ވަނީ ލަނޑުޖަހާނެ ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން މިހާފުގައި އައުޓްލޯޒްގެ ކީޕަރު ޒައިދާންގެ އިތުރުން ފޮކްސެސްގެ ކީޕަރު ފާޒިލްގެ ފަރާތުން ވަނީ ތަފާތު މޮޅު ސޭވްތަކެއް ފެނިގެންގޮސްފަސްއެވެ. އަދި މިއާއެކި މެޗުގެ ކުޅުން ނިމިގެންދިޔައީ ދެޓީމުން ކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އައުޓްލޯޒް ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ އައުޓްލޯޒްގެ އަޔާޒް އަހުމަދު އެވެެ.

މިނަތީޖާއެކު ކުޅުނު ތިން މެޗުން ވެސް މޮޅުވެ ނުވަ ޕޮއިންޓާއެކު ގުރޫޕްގެ އެއްވަނަ ޓީމުގެ ގޮތިގައި އައުޓްލޯޒް ކުއާޓާ ފައިނަލުން ޖާގަހޯދިއިރު، މިމެޗުން ބަލިވި ފޮކްސެސް އިން މުބާރާތް ނިންމާލީ ކުޅުނު ތިން މެޗުން ލިބުނު އެއް ޕޮއިންޓާއެކު ގުރޫޕްގެ ފުލުގައި އޮވެއެވެ.

މިމުބާރާތުގައި މިއަހަރު ޖުމްލަ 12 ޓީމަކުން ވާދަކުރަމުން އަންނައިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ޖާގަ ލިބިގެންދާނެއެވެ.

ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވާ މިމުބާރާތުގެ ޓައިޓަލް ސްޕޮންސާއަކީ ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ ހަމަޖައްސާފައިވާއިރު، މީޑިއާ ޕާޓްނަރަކީ ގާފު ސްޕޯޓްސް އެވެ.