ވިއްސާރާގައި އައްޑޫ ސިޓީގެ 5 ގެއެއްގެ ފުރާޅު އެއްލާލައިފި

މިހާރު ރާއްޖެއަށް ކުރަމުންދާ ވިއްސާރާގައި އައްޑޫ ސިޓީގެ 5 ގެއެއްގެ ފުރާޅު ވަޔާ އެއްލާލައިފި އެވެ.

އެމްއެންޑީއެފުން މިއަދު ބުނީ މިހާރު ރާއްޖެއަށް ކުރަމުންދާ ވިއްސާރާގައި އައްޑޫ ސިޓީގެ 5 ގެއެއްގެ ފުރާޅު ވަޔާ އެއްލަލުމާއި ގުޅިގެން އެމްއެންޑީއެފް ސަދަން އޭރިއާ ކޮމާންޑްގެ، ސިފައިން އެހީތެރިކަން ފޯރުކޮށްދީފައިވާ ކަމަށެވެ.

ރޭ އައްޑޫ ސިޓީއަށް ކުރި ވިއްސާރައާއެކު އައި ގަދަ ކޮޅިގަނޑުގައި، އައްޑޫ ސިޓީ، މަރަދޫގެ ގެޔަކާއި، މަރަދޫފޭދޫގެ ގެއެއްގެ އިތުރުން، ފޭދޫގެ ދެ ގެއެއް، އަދި ހުޅުދޫގެ ގެއެއްގެ ފުރާޅު ވަޔާ އެކު މަގުމައްޗަށް އެއްލާލާފައިވެއެވެ. އެ 5 ގޭގެ ފުރާޅު އެެއްލާލުމާ ގުޅިގެން ފުރާޅު މަގުމަތިން އެއްފަރާތްކޮށް، ފުރާޅު ހެދުމުގައި އެމްއެންޑީއެފް ސަދަން އޭރިއާ ކޮމާންޑުގެ ސިފައިން ވަނީ އެހީތެރިކަން ފޯރުކޮށްދީފައެވެ.

މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވާ ކަމަށް ސިފައިން ވަނީ ބުނެފައި އެވެ.

ރާއްޖެއަށް މިދުވަސްވަރު މޫސުން ގޯސްވުމާއި ގުޅިގެން މޫސުމާއި ބެހޭ ގައުމީ އިދާރާއިން އިއްޔެއާއި މިއަދުވެސް ރާއްޖޭގެ ބޮޑު ސަރަހައްދަކަށް މޫސުމީ ސަމާލުތައް ވަނީ ނެރެފައި އެވެ.