ބޮޑުތަފާތަކުން ރެމްޕޭޖް ބަލިކޮށް ޗެންޕިއަން ޑީއާރުސީ އިން ފެންވަރު ދައްކާލައިފި

މިހާރު ކުރިއަށްދާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގައި މިރޭ ކުޅެވުނު ދެވަނަ މެޗުގައި އެންމެ ފަހުގެ ޗެންޕިއަން ދަޑެކޮޑޭ ރެކްރިއޭޝަން ކުލަބު (ޑީއާރުސީ) އާއި ރެމްޕޭޖް ވާދަކުރި މެޗު ފަސޭހަކަމާއެކު 6-0 ގެ ނަތީޖާއަކުން ކާމިޔާބުކޮށް ޑިއާރުސީ އިން އެޓީމުގެ ފެންވަރު ދައްކާލައިފިއެވެ.

މުބާރާތުގައި ރެމްޕޭޖް ކުޅުނު ފުރަތަމަ މެޗުގައި ގަލެހުއްޓާ އަތުން 4-1 ގެ ނަތީޖާއަކުން އެޓީމު މޮޅުވެފައިވާއިރު،ޑީއާރުސީގެ ފުރަތަމަ މެޗުގައި 4-3 ގެ ނަތީޖާއަކުން އޭއެސްއެމްއެޗު-އާރުސީ އަތުން އެޓީމު ވަނީ ބަލިވެފައެވެ.

ތިނަދޫ ސިޓީ އާރު އަވަށު ފުޓްސަލަ ދަނޑުގައި ކުޅެވުނު މިމެޗުގެ ފުރަތަމަ ހާފުގައި ޑީއާރުސީގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 5-0 ގެ ތަފާތުބޮޑު ނަތީޖާއަކުން ޑީއާރުސީ ކުރީގައި އޮވެގެންނެވެ.

މެޗުގެ ދެވަނަ ހާފުގެ ވަރަށް ކުރީކޮޅު ޑީއާރުސީގެ ކެޕްޓަން ނާއިލްއަށް އަނިޔާވެގެން ބަދަލުކުރަންޖެހުނުއިރު، މިހާފުގެ ގިނަވަގުތު އެޓީމުން މުހިންމު ކުޅުންތެރިންނަށް ރެސްޓްދީފައެވެ. އަދި މިހާފުގައި އެޓީމުން ވަނީ އިތުރު އެއްލަނޑު ކާމިޔާބުކޮށްފައެވެ.

އެގޮތުން މިމެޗުގައި ޑީއާރުސީގެ ކެޕްޓަން މުހައްމަދު ނާއިލް އަދި އިބްރާހިމް މުހައްމަދު މިއިން ކޮންމެ ކުޅުންތެރިއަކު އެއްލަނޑު ކާމިޔާބުކުރިއިރު، އެޓީމުގެ އަލީ ޝިއާހު އަދި ހުސެއިން މުނީޒް މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޑީއާރުސީ ޓީމުގެ އަލީ ޝިޔާހު އެވެ.

މިނަތީޖާއެކު ކުޅުނު ދެމެޗުން ޑީއާރުސީއަށް ތިން ޕޮއިންޓް ލިބިފައިވާއިރު، ލަނޑުގެ ތަފާތުން އެޓީމު މިވަގުތު އޮތީ ގުރޫޕް އޭގެ ދެވަނައިގައެވެ. އަދި މިމެޗުން ބަލިވި ރެމްޕޭޖް ކުޅުނު ދެމެޗުން އެޓީމަށް ވެސް ތިން ޕޮއިންޓް ލިބިފައިވާއިރު، ލަނޑުގެ ތަފާތުން އެޓީމު މިވަގުތު އޮތީ ލީގު ތާވަލުގެ ތިންވަަނައިގައެވެ.

މިމުބާރާތުގައި މިއަހަރު ޖުމްލަ 12 ޓީމަކުން ވާދަކުރަމުން އަންނައިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ޖާގަ ލިބިގެންދާނެއެވެ.

ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވާ މިމުބާރާތުގެ ޓައިޓަލް ސްޕޮންސާއަކީ ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ ހަމަޖައްސާފައިވާއިރު، މީޑިއާ ޕާޓްނަރަކީ ގާފު ސްޕޯޓްސް އެވެ.