ރިޒާންގެ ހަތަރު ލަނޑާއެކު ހޯޑެއްދޫ ބަލިކޮށް ލަޔަންސް ޗެންޕިއަންކަން ހޯދައިފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ޖޫނިއާ ފިރިހެން ޑިވިޝަން ފައިނަލްގައި ލަޔަންސް ޑެން 96 އާއި ހޯޑެއްދޫ ފުޓްބޯޅަ އެކަޑަމީ ވާދަކުރި މެޗު ފަސޭހަކަމާއެކު 5-1 ގެ ނަތީޖާއަކުން ކާމިޔާބުކޮށް ލަޔަންސް އިން މުބާރާތުގެ ޗެންޕިއަންކަން ހޯދައިފިއެވެ.

މުބާރާތުގެ ފައިނަލުން ލަޔަންސް ޖާގަހޯދީ ސެމީ ފައިނަލުގެ ފުރަތަމަ މެޗުގައި 1-2 ގެ ނަތީޖާއަކުން ގަސްދޮށު ސްޕޯޓްސް ކުލަބު ބަލިކުރުމަށްފަހު އެވެ. އަދި ހޯޑެއްދޫ ފައިނަލުން ޖާގަހޯދީ ސެމީ ފައިނަލުގެ ދެވަނަ މެޗުގައި އެންމެ ފަހުގެ ޗެންޕިއަން ވަލްހަލާ 2-1 ގެ ނަތީޖާއަކުން ބަލިކުރުމަށްފަހު އެވެ.

މުޅި މެޗުގައި ވެސް ލަޔަންސްގެ ފަރާތުން ތަފާތު މޮޅު ކުޅުމެެއް ފެނިގެންދިޔައިރު، މެޗުގެ ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ލަޔަންސް ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު ތިން ލަނޑު ކާމިޔާބުކުރިއިރު މިހާފުގައި ހޯޑެއްދޫ އިން ވެސް ވަނީ އެއްލަނޑު ކާމިޔާބުކޮށްފައެވެ.

އެގޮތުން މިމެޗުގައި ލަޔަންސްގެ އަބްދުﷲ ރިޒާން މުހައްމަދު ހަތަރު ލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ އެޓީމުގެ އިބްރާހިމް ރާއިޝް އަބްދުލް އަޒީޒް އެވެ.

މީގެ އިތުރުން މިމެޗުގައި ހޯޑެއްދޫގެ ހަމައެކަނި ލަނޑު ކާމިޔާބުކޮށްދިނީ އެޓީމުގެ އިސްމާއިލް އަރުޝައިން ގުރައިޝް އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ލަޔަންސްގެ އަބްދުﷲ ރިޒާން މުހައްމަދު އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ ސާއިމް ހަސަން (ވަލްހަލާ)، އަހުމަދު އަކްމަލް ނިޒާމް (ގަސްދޮށު އެސްސީ)، އަހުމަދު އަލްތާފް އަޒީމް (ހޯޑެއްދޫ އެފްއޭ)، މުހައްމަދު ފައިޒާން ފައިސަލް (ލަޔަންސް) އަދި އަބްދުﷲ ކިޔާން (ލަޔަންސް) އެވެ. އަދި މުބާރާތުގެ ފެއާ ޕްލޭ ކުޅުންތެރިއަކީ މުހައްމަދު އައިކް ބިން ސަމީރު އަހުމަދު (ވައިޓޫކޭ) އެވެ. އަދި މުބާރާތުގެ އެންމެ އުންމީދީ ކުޅުންތެރިއަކީ އިބްރާހިމް ރާކިން އަނީސް (ކޯބްރާ އެފްސީ) އެވެ. މުބާރާތުގެ އެންމެ ގިނަ ލަނޑުޖެހި ކުޅުންތެރިއަކީ އަބްދުﷲ ރިޒާން މުހައްމަދު (ލަޔަންސް) އެވެ. އޭނާ ވަނީ މިމުބާރާތުގައި އަށް ލަނޑު ކާމިޔާބުކޮށްފައެވެ. އަދި މުބާރާތުގެ އެންމެ މޮޅު ކޯޗަކީ ނަބްހާން އިޔާސް ނާޒިމް (ލަޔަންސް) އެވެ. އަދި ފެއާ ޕްލޭ ޓީމަކީ ވައިޓޫކޭ އެފްސީ އެވެ. މީގެ އިތުރުން މުބާރާތުގެ އެންމެ މޮޅު ކުޅުންތެރިއާގެ މަގާމު ހޯދީ މުހައްމަދު ފައިޒާން ފައިސަލް (ލަޔަންސް) އެވެ.

މިއަހަރުގެ މުބާރާތުގެ ޖޫނިއަރ ފިރިހެން ޑިވިޝަނުގައި ހަ ޓީމަކުން ވާދަކުރިއިރު، މިޑިވިޝަނުގެ މެޗުތައް ކުރިއަށް ގެންގޮސްފައިވަނީ ބައިވެރިވި ހަޓީމު ދެ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމު ސެމީ ފައިނަލަށް ހޮވުނުއިރު، ވަލްހަލާ 69 ބަލިކޮށް މުބާރާތުގެ ތިންވަނަ ހޯދީ ގަސްދޮށު ސްޕޯޓްސް ކުލަބެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.