ވާދަވެރި ކުޅުމަކަށްފަހު ގަސްދޮށު އެސްސީ ބަލިކޮށް ބޮއްކުރާ އިން ތަށި ދިފާއުކޮށްފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަން ފައިނަލްގައި ގަސްދޮށު ސްޕޯޓްސް ކުލަބާއި ބޮއްކުރާ ކުޅުނު މެޗު ވާދަވެރި ކުޅުމަކަށްފަހު 1-0 ގެ ނަތީޖާއަކުން ކާމިޔާބުކޮށް ބޮއްކުރާ އިން މުބާރާތުގެ ތަށި ދިފާއުކޮށްފިއެވެ.

މުބާރާތުގެ ފައިނަލުން ބޮއްކުރާ ޖާގަހޯދީ ސެމީ ފައިނަލުގެ ފުރަތަމަ މެޗުގައި 3-0 ގެ ނަތީޖާއަކުން މައިލޯ ސިޓީ ބަލިކުރުމަށްފަހު އެވެ. އަދި ގަސްދޮށު ސްޕޯޓްސް ކުލަބު ފައިނަލުން ޖާގަހޯދީ ސެމީ ފައިނަލުގެ ދެވަނަ މެޗުގައި އުތުރުކޮޑާއި ދެކޮޅަށް ކުޅުނު މެޗު 1-1 ގެ ނަތީޖާއަކުން އެއްވަރުވެ ނަތީޖާ ނެރުމައްޓަކައި ޖެހި ޕެނަލްޓީގައި 3-1 ގެ ނަތީޖާއަކުން އުތުރުކޮޑާ ބަލިކުރުމަށްފަހުއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި، ބޮއްކުރާއިން ލީޑިހޯދި ލަނޑު މެޗު ފެށިގެން ފުރަތަމަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ބައްސާމް މުހައްމަދު ނައީމް އެވެ. އަދި މީގެ އިތުރުން ވެސް މިމެޗުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ހޯދާފައެވެ.

ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއްް ކާމިޔާބުނުކުރެވި 1-0 ގެ ނަތީޖާއަކުން ބޮއްކުރާ ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ބޮއްކުރާގެ އަހުމަދު ބައްސާމް މުހައްމަދު ނައީމް އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ އަހުމަދު ބައްސާމް މުހައްމަދު ނައީމް (ބޮއްކުރާ)، އަލީ ހާފިޒް (މައިލޯ ސިޓީ)، އަޔާޒް އަހުމަދު (ބޮއްކުރާ)، އަބްދުﷲ ޝާފިއު (އުތުރުކޮޑާ) އަދި ޒައިދާން އަހުމަދު (ބޮއްކުރާ) އެވެ. އަދި މުބާރާތުގެ ފެއާ ޕްލޭ ކުޅުންތެރިއަކީ އަލީ ޝިއާއު (ފަލްކަންސް ސްޕޯޓްސް ކުލަބު) އެވެ. އަދި މުބާރާތުގެ އެންމެ އުންމީދީ ކުޅުންތެރިއަކީ އަލީ އަލްޔާއު މައުސޫމް (ފަލްކަންސް ސްޕޯޓްސް ކުލަބު) އެވެ.

މުބާރާތުގެ އެންމެ ގިނަ ލަނޑުޖެހި ކުޅިންތެރިއާގެ މަގާމަށް ދެކުޅުންތެރިއަކު ވަނީ ހޮވިފައެވެ. އެއީ އަހުމަދު ބައްސާމް މުހައްމަދު ނައީމް (ބޮއްކުރާ) އަދި އަލީ ހާފިޒް (މައިލޯ ސިޓީ) އެވެ. އަދި މިދެކުޅުންތެރިން ވަނީ މިމުބާރާތުގައި އަށް ލަނޑު ކާމިޔާބުކޮށްފައެވެ. އަދި މުބާރާތުގެ އެންމެ މޮޅު ކޯޗަކީ އަހުމަދު އާތިފް (ބޮއްކުރާ) އެވެ. އަދި ފެއާ ޕްލޭ ޓީމަކީ މައިލޯ ސިޓީއެވެ.

މީގެ އިތުރުން މުބާރާތުގެ އެންމެ މޮޅު ކުޅުންތެރިއާގެ ހޯދީ އަހުމަދު އަޔާޒް އަހުމަދު (ބޮއްކުރާ) އެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ވާދަކުރިއިރު، މިޑިވިޝަނުގެ މެޗުތައް ކުރިއަށް ގެންގޮސްފައިވަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދި ހަތަރު ޓީމު ސެމީ ފައިނަލަށް ހޮވޭގޮތަށެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.