ވާދަވެރިކުޅުމަކަށްފަހު އުތުރުކޮޑާ ބަލިކޮށް މައިލޯ ސިޓީއިން ތިންވަނަ ހޯދައިފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަން ތިންވަނަ ހޮވަން ކުޅުނު މެޗުގައި އުތުރުކޮޑާއި މައިލޯ ސިޓީ ވާދަކުރި މެޗު ވާދަވެރި ކުޅުމަކަށްފަހު 3-2 ގެ ނަތީޖާއަކުން ކާމިޔާބުކޮށް މައިލޯ ސިޓީ އިން މުބާރާތުގެ ތިންވަނަ ހޯދައިފި އެވެ.

މުބާރާތުގެ ސެމީފައިނަލް ފުރަތަމަ މެޗުގައި ބޮއްކުރާ އަތުން 3-0 ގެ ނަތީޖާއަކުން މައިލޯ ސިޓީ ބަލިވިއިރު، ސެމީފައިނަލުގެ ދެވަނަ މެޗުގައި ގަސްދޮށު ސްޕޯޓްސް ކުލަބު އަތުން އުތުރުކޮޑާ ބަލިވީ ޕެނަލްޓީގައި 3-1 ގެ ނަތީޖައަކުންނެވެ. އަދި މިދެޓީމު ލީގު ބުރުގައި ކުޅުނު މެޗު 1-0 ގެ ނަތީޖާއަކުން ކާމިޔާބުކުރީ މައިލޯ ސިޓީއެވެ.

ގައްދޫ ފުޓްސަލް ދަނޑުގައި ކުޅުނު މިމެޗުގެ ފުރަތަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު, ފުރަތަމަ ލަނޑު ޖަހައި ކުރި ހޯދީ މައިލޯ ސިޓީއިންނެވެ. މި ލަނޑު އެޓީމަށް ކާމިޔާބުކޮށްދިނީ, ސާމިން މުހައްމަދު ނަސީރު އެވެ. ނަމަވެސް ފުރަތަމަ ހާފުގެ 12 ވަނަ މިނެޓުގައި އުތުރުކޮޑާގެ އަހުމަދު ހަމީދުވަނީ ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. ނަމަވެސް ޖެހިގެން އައި މިނެޓުގައި މައިލޯ ސިޓީއިން ވަނީ އިތުރު ލަނޑެއް ކާމިޔާބުކޮށް ދެވަނަ ފަހަރަށް މެޗުގެ ލީޑު ހޯދާފައެވެ. މި ލަނޑު އެ ޓީމަށް ކާމިޔާބުކޮށްދިނީ އަބްދުالله ޖުނައިދުއެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެން ދިޔައީ 2-1ގެ ނަތީޖާއަކުން މައިލޯ ސިޓީ ކުރީގައި އޮވެގެންނެވެ.

މެޗުގެ ދެވަނަ ހާފުގައިވެސް ދެޓީމުގެ ފަރާތުން ވާދަވެރި ކުޅުމެއް ފެނިގެން ދިޔައިރު މައިލޯ ސިޓީއިން އެޓީމުގެ ލީޑު ފުޅާކުރި ލަނޑު ފަހު ހާފުގެ 10ވަނަ މިނެޓުގައި އަލީ ހާފިޒް އެވެ. އަދި އުތުރުކޮޑާއިން ފަރަގު ކުޑަކުރި ލަނޑު މެޗުގެ އެންމެ ފަހު މިނެޓުގައި ކާމިޔާބުކޮށްދިނީ އަހުމަދު ހަމީދު އެވެ. މިއާއެކު މެޗުގެ ކުޅުން ނިމިގެން ދިޔައީ 3-2ގެ ނަތީޖާއަކުން މައިލޯ ސިޓީ ކުރީގައި އޮވެގެންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ މައިލޯ ސިޓީގެ އަބްދުالله ޖުނެއިދު އެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ވާދަކުރިއިރު، މިޑިވިޝަނުގެ މެޗުތައް ކުރިއަށް ގެންގޮސްފައިވަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދި ހަތަރު ޓީމު ސެމީ ފައިނަލަށް ހޮވޭގޮތަށެވެ. އަދި މުބާރާތުގެ ފައިނަލުގައި އާދިއްތަ ދުވަހުގެ ރޭ ގަސްދޮށުން ނުކުނެނާނީ އެންމެ ފަހުގެ ޗެންޕިއަން ބޮއްކުރާއި ދެކޮޅަށެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.