ފަހުވަގުތު ކާމިޔާބުކުރި ލަނޑާއެކު ގަސްދޮށު ބަލިކޮށް ލަޔަންސް ފައިނަލުގެ ޖާގައެއް ކަށަވަރުކޮށްފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ޖޫނިއަރ ފިރިހެން ޑިވިޝަން ސެމީ ފައިނަލްގެ ފުރަތަމަ މެޗުގައި ގަސްދޮށު ސްޕޯޓްސް ކުލަބް އާއި ލަޔަންސް ޑެންސް 69 ސްޕޯޓްސް ކުލަބު ކުޅުނު މެޗު ވާދަވެރިކުޅުމަކަށްފަހު 2-1 ގެ ނަތީޖާއަކުން ކާމިޔާބުކޮށް ލަޔަންސް އިން މުބާރާތުގެ ފައިނަލުން ޖާގައެއް ކަށަވަރުކޮށްފި އެވެ.

މުބާރާތުގެ ސެމީ ފައިނަލުން ގަސްދޮށު ސްޕޯޓްސް ކުލަބު ޖާގަ ހޯދީ ގްރޫޕް ސްޓޭގުގައި ކުޅުނު ދެ މެޗުން ލިބުނު ހަތަރު ޕޮައިންޓާއެކު ލަނޑުގެ ތަފާތުން ގްރޫޕް ބީގެ ދެވަނަ ޓީމުގެ ގޮތުގައެވެ. އަދި ލަޔަންސް ޑެން އިން ސެމީ ފައިނަލްގެ ޖާގައެއް ކަށަވަރުކުރީ ގްރޫޕް ސްޓޭޖުގައި ކުޅުނު ދެ މެޗުވެސް ކާމިޔާބުކޮށް ގްރޫޕް އޭގެ އެއްވަނައިގައި އޮވެގެންނެވެ.

ގައްދޫ ފުޓްސަލް ދަނޑުގައި ކުޅުނު މިމެޗުގެ ފުރަތަމަ ހާފުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑު ޖަހައި ކުރި ހޯދީ ގަސްދޮށުންނެވެ. މި ލަނޑު އެޓީމަށް ކާމިޔާބުކޮށްދިނީ, ކެޕްޓަން އަކުމަލް ނިޒާމް އެވެ. ނަމަވެސް ފުރަތަމަ ހާފު ނިމުމުގެ ކުރިން ލަޔަންސްގެ އިބްރާހިމް ރާއިޝް އަބްދުލް އަޒީޒް ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. މިއާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ފެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މިމެޗުން ލަޔަންސް މޮޅުވި ލަނޑު ދެވަނަ ހާފުގެ އެންމެ ފަހު ސިކުންތުކޮޅުގެ ތެރޭގައި ކާމިޔާބުކޮށްދިނީ އެޓީމުގެ އަބްދުﷲ ރިޒާން މުހައްމަދު އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ލަޔަންސް ކުރީގައި އޮވެގެންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ލަޔަންސްގެ އިބްރާހިމް ރާއިޝް އަބްދުލް އަޒީޒް އެވެ.

މިއަހަރުގެ މުބާރާތުގެ ޖޫނިއަރ ފިރިހެން ޑިވިޝަނުގައި ހަ ޓީމަކުން ވާދަކުރަމުން އަންނައިރު، މިޑިވިޝަނުގެ މެޗުތައް ކުރިއަށް ގެންގޮސްފައިވަނީ ބައިވެރިވި ހަޓީމު ދެ ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ޓީމު ސެމީ ފައިނަލަށް ހޮވުނުއިރު، ، މިރޭ ކުޅޭ ސެމީ ފައިނަލުގެ ދެވަނަ މެޗުގައި އެންމެ ފަހުގެ ޗެންޕިއަން ވަލްހަލާ އިން ނުކުންނާމީ ހޯޑެއްދޫ ފުޓްބޯޅަ އެކަޑަމީއާ ދެކޮޅަށެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.