ތަފާތުބޮޑު ނަތީޖާއަކުން އައުޓްލޯ ބަލިކޮށް މައިލޯ ސިޓީ އިން ލީގު ބުރުގެ އެއްވަނަ ކަށަވަރުކޮށްފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަނުގައި މިރޭ މައިލޯ ސިޓީ އާއި އައުޓްލޯ ކިންގްސް ވާދަކުރި މެޗު ފަސޭހަކަމާއެކު 6-1ގެ ނަތީޖާއަކުން މައިލޯ ސިޓީ އިން ކާމިޔާބުކޮށްފި އެވެ.

މި މެޗަށް ނުކުތް އިރު މުބާރާތުގައި މައިލޯ ސިޓީ އިން ކުޅުނު ފަސް މެޗުގެ ތެރެއިން ހަތަރު މެޗުން މޮޅުވެ, އެއް މެޗުން އެއްވަރުވެފައިވާއިރުގައި, އައުޓްލޯ ކިންގްސް އިން ކުޅުނު ފަސް މެޗުންވެސް އެޓީމު ވަނީ ބަލިވެފައެވެ.

ފުރަތަމަ ހާފުގައި މައިލޯ ސިޓީއިން ގިނަ ބަދަލުތަކާއެކު ފެށި ނަމަވެސް ފުރަތަމަ ހާފުގެ ކުޅުން ނިމިގެން ދިޔައީ ފަސް ލަނޑުގެ ލީޑަކާއެކު 6-1 ގެ ނަތީޖާއަކުން މައިލޯ ސިޓީ ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި އައުޓްލޯއިން އެޓީމުގެ ކުޅުން ރަނގަޅުކޮށް ޑިފެންސް ވަރުގަދަ ކުރިއިރު މިހާފުގައި ދެޓީމުންވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެން ދިޔައީ ދެޓީމު ކުރެ ޓީމަކަށް އިތުރު ލަނޑެއް ކާމިޔާބުނުކުރެވި 6-1 ގެ ނަތީޖާއަކުން މައިލޯ ސިޓީ ކުރީގައި އޮވެގެންނެވެ.

އެގޮތުން މިމެޗުގައި މައިލޯ ސިޓީގެ އަލީ ހާފިޒް އަދި ސާމިން މުހައްމަދު ނަސީރު, މިއިން ކޮންމެ ކުޅުންތެރިޔަކު ވަނީ ދެ ލަނޑު ކާމިޔާބުކޮށްފައެވެ. އަދި މައިލޯ ސިޓީގެ މުހައްމަދު ސަބާހު މަސްރޫރު ލަނޑެއް ކާމިޔާބުކުރިއިރު, މައިލޯ ސިޓީގެ އަނެއް ލަނޑަކީ އައުޓްލޯ އަތިން ބައިކޮޅަށް ވަން ލަނޑެކެވެ. މި މެޗުގައި އައުޓްލޯއަށް ކާމިޔާބުކުރެވުނު ހަމައެކަނި ލަނޑު އެޓީމަށް ކާމިޔާބުކޮށްދިނީ އަހުމަދު ސުދައިޝް ޒުބައިރު އެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ މައިލޯ ސިޓީގެ އަލީ ހާފިޒް އެވެ.

މި ނަތީޖާއަކު ކުޅުނު ހަ މެޗުން ހޯދި 16 ޕޮއިންޓާއެކު މައިލޯ ސިޓީ އިން ލީގު ބުރު ނިންމާލީ ތާވަލުގެ އެއްވަނައިގައި އޮވެގެންނެވެ. އަދި ލީގު ބުރުގައި ކުޅުނު އެއްވެސް މެޗަކުން މޮޅުނުވެ, އައުޓްލޯ ވަނީ މުބާރާތުން ކަޓާފައެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ވާދަކުރަމުން އަންނައިރު، މިޑިވިޝަނުގެ މެޗުތައް ކުރިއަށްދަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީ ފައިނަލަށް ހޮވޭގޮތަށެވެ. އަދި ސެމީ ފައިނަލުން ބަލިވާ ދެޓީމުގެ މެދުގައި ތިންވަނަ ހޮވާ މެޗެއް ކުޅުމަށް ވަނީ ހަމަޖެހިފައެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.