ޕްރޮގްރެސިވް ކޮންގްރެސް ކޯލިޝަންގެ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން 2028 ވަނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގެ ރިޔާސީ ޓިކެޓް، އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް އަރުވައިފިއެވެ.

ޕީއެންސީގެ ގައުމީ ކޮންގްރެސް ނިންމުމަށް މިރޭ ބޭއްވި ޚާއްޞަ ރަސްމިއްޔާތެއްގައި ރައީސް ޑރ. މުޢިއްޒަށް މި ޓިކެޓް ހަވާލުކޮށްދެއްވާފައިވަނީ ޕާޓީގެ އިސްވެރިންނެވެ. މި ރަސްމިއްޔާތު ކުރިއަށްދިޔައީ މާލޭގަޢި ސޯޝަލް ސެންޓަރުގައެވެ.

މިއީ ޕީއެންސީގެ މަތީ މަޖިލީހުން ނިންމެވި ނިންމެވުމާ އެއްގޮތަށް، އެ މަޖިލީހުގެ ނިންމުންތައް އިޢުލާނުކުރުމަށް ބޭއްވި ރަސްމިއްޔާތުގެ ތެރެއިން ކުރިއަށްދިޔަ އެންމެ މުހިންމު އެއް ކަންތަކެވެ.

މި ނިންމެވުމާއެކު، 2028 ގެ ރިޔާސީ އިންތިޚާބުގައި ޕީއެންސީގެ ފަރާތުން ވާދަކުރައްވާނެ ކެންޑިޑޭޓަކީ މިހާރުގެވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުކަން މިވަނީ ރަސްމީކޮށް ކަށަވަރުވެފައެވެ.