އައުޓްލޯ ބަލިކޮށް ގަސްދޮށުން ސެމީ ފައިނަލްގެ ޖާގައެއް ކަށަވަރުކޮށްފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަނުގައި މިރޭ ކުޅުނު ފުރަތަމަ މެޗުގައި އައުޓްލޯ ކިންގްސް އާއި ގަސްދޮށު ސްޕޯޓްސް ކުލަބު ވާދަކުރި މެޗު 4-1 ގެ ނަތީޖާއަކުން ގަސްދޮށު ސްޕޯޓްސް ކުލަބު ކާމިޔާބުކޮށްފިއެވެ.

މުބާރާތުގައި ގަސްދޮށުން ކުޅުނު ފުރަތަމަ މެޗުގައި 6-0 ގެ ނަތީޖާއަކުން ތިނަދޫ އަތުން މޮޅުވިއިރު، ދެވަނަ މެޗުގައި ފަލްކަންސް އަތުން އެޓީމު މޮޅުވެފައި ވަނީ ވެސް 6-0 ގެ ނަތީޖާއަކުންނެވެ. އަދި ތިންވަނަ މެޗުގައި މައިލޯ ސްޕޯޓްސް ކުލަބާ ވާދަކުރި މެޗު ވަނީ 1-1ގެ ނަތީޖާއަކުން އެއްވަރުވެފައެވެ.

މުބާރާތުގައި އައުޓްލޯ ކިންގްސް ކުޅުނު ހަތަރު މެޗުންވެސް ވަނީ ބަލިވެފައެވެ. އެގޮތުން ފުރަތަމަ މެޗުގައި އުތުރުކޮޑާ އާ ވާދަކުރި މެޗު 3-1ގެ ނަތީޖާއަކުން ބަލިވި އިރު ދެވަނަ މެޗުގައި ބޮއްކުރާ އަތުން ބަލިވީ 4-1ގެ ނަތީޖާއަކުންނެވެ. އަދި ތިންވަނަ މެޗުގައި 2-0ގެ ނަތީޖާއަކުން ތިނަދޫ އަތުން ވަނީ ބަލިވެފައެވެ.

ގައްދޫ ފުޓްސަލް ދަނޑުގައި ކުޅުނު މިމެޗުގައި ދެޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާއިރު, ދެޓީމުގެ ފަރާތުންވެސް ވަނީ ލަނޑު ޖަހާނެ ރަނގަޅު ފުރުސަތު ތަކެއް ތަނަވަސްކޮށްފައެވެ. ފުރަތަމަ ހާފުގެ 7ވަނަ މިނެޓް އަދި 9ވަނަ މިނެޓުގައި ގަސްދޮށު ކުލަބުގެ އަހުނަފް ރަޝީދު ވަނީ ދެ ލަނޑު ކާމިޔާބުކޮށް މެޗުގެ ލީޑު ނަގާފައެވެ. އަދި އޭގެ 5 މިނެޓްފަހުން ގަސްދޮށު ކުލަބުގެ މުހައްމަދު ވިލްފް ވަނީ ލަނޑެއް ކާމިޔާބުކޮށް ލީޑު ފުޅާކޮށްފައެވެ. ތިން ލަނޑެއްގެ ލީޑުގައި ގަސްދޮށުން ކުޅެމުންދަނިކޮށް 17ވަނަ މިނެޓުގައި އައުޓްލޯއިން ވަނީ މެޗުގައި އެޓީމަށް ކާމިޔާބުކުރެވުނު ހަމައެކަނި ލަނޑު ކާމިޔާބުކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އަބްދުالله ތަހުޝީން އެވެ. ފުރަތަމަ ހާފުގެ ކުޅުން ނިމިގެންދިޔައީ 3-1ގެ ނަތީޖާއަކުން ގަސްދޮށު ކުރީގައި އޮވެގެންނެވެ.

ދެވަނަ ހާފުގައިވެސް ދެޓީމުގެ ފަރާތުން ލަނޑުޖަހާނެ ގިނަ ފުރުސަތުތަކެއް ވަނީ ހޯދާފައެވެ. މިހާފުގެ 17 ވަނަ މިނެޓުގައި ގަސްދޮށުން ވަނީ އިތުރު ލަނޑެއް ކާމިޔާބުކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އިބްރާހިމް ސިނާހު އެވެ. މެޗުގެ ކުޅުން ނިމިގެންދިޔައީ4-1ގެ ނަތީޖާއަކުން ގަސްދޮށު ކުރީގައި އޮވެގެންނެވެ. މި މެޗުގެ މޮޅު ކުޅުންތެރިޔަކަށް ހޮވިފައިވަނީ ގަސްދޮށު ސްޕޯޓްސް ކުލަބުގެ އަހުނަފް ރަޝީދު އެވެ.

މި ނަތީޖާއާއެކު ކުޅުނު ހަތަރު މެޗުން ހޯދި 10 ޕޮއިންޓާއެކު ގަސްދޮށު އޮތީ ތާވަލުގެ އެއްވަނައިގައެވެ. އައުޓްލޯ ކިންގްސް ކުޅުނު ހަތަރު މެޗުންވެސް އެއްވެސް ޕޮއިންޓެއް ނުލިބި އޮތީ ތާވަލުގެ ހަތްވަނައިގައެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ވާދަކުރަމުން އަންނައިރު، މިޑިވިޝަނުގެ މެޗުތައް ކުރިއަށްދަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީ ފައިނަލަށް ހޮވޭގޮތަށެވެ. އަދި ސެމީ ފައިނަލުން ބަލިވާ ދެޓީމުގެ މެދުގައި ތިންވަނަ ހޮވާ މެޗެއް ކުޅުމަށް ވަނީ ހަމަޖެހިފައެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.