މިހާރު ކުރިއަށްދާ ހިޔާކަޕް ހޭންޑްބޯޅަ މުބާރާތުގައި ރޭ ކުޅުނު ކުއާޓާ ފައިނަލް ހަތަރުވަނަ މެޗުގައި ވާދަވެރި ކުޅުމަކަށްފަހު 18-11 ގެ ނަތީޖާއަކުން ކީން ސްޕޯޓްސް ކުލަބު ބަލިކޮށް ށ.ފޭދޫ މުބާރާތުގެ ސެމީފައިނަލުން ޖާގަ ހޯދައިފިއެވެ.

މުބާރާތުގެ ކުއާޓާ ފައިނަލުން ކީން އެސްސީ ޖާގަ ހޯދީ ގުރޫޕް ސްޓޭޖުގައި ކުޅުނު ހަތަރު މެޗުން ހޯދި ނުވަ ޕޮއިންޓާއެކު ގުރޫޕް އޭގެ ދެވަނަ ޓީމުގެ ގޮތުގައެވެ. އަދި ށ.ފޭދޫ ކުއާޓާ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ހަތަރު މެޗުން ހޯދި ނުވަ ޕޮއިންޓާއެކު ގުރޫޕް ބީގެ ދެވަނަ ޓީމުގެ ގޮތުގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ށ.ފެދޫގެ އައިޝަތު ޝާއިނާ ހަ ލަނޑު ކާމިޔާބުކުރިއިރު، އެޓީމުގެ ފާތުމަތު ޝިފާނާ ވަނީ ހަތަރު ލަނޑު ކާމިޔާބުކޮށްފައެވެ. މީގެ އިތުރުން އެޓީމުގެ އާމިނަތު މާއިޝާ އަދި އައިޝަތު ވިލްނާ މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، ފާތުމަތު އުނައިޝާ، އައިޝަތު ޝައުނާ، ޒަހީރާ އަބްދުއް ރަހީމްގެ އިތުރުން އާމިނަތު ރިސްތާ މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ކީން ސްޕޯޓްސް ކުލަބުގެ ހަލީމަތު ހަސްނާ، އިފްޝާ މުހައްމަދު ފިރާގު އަދި އާމިނަތު އައިނާޝް މިއިން ކޮންމެ ކުޅުންތެރިއަކު މިމެޗުގައި ތިން ލަނޑު ކާމިޔާބުކުރިއިރު، ފާތުމަތު އަނާ އަލީ އަދި މަރިޔަމް އިޝާ ރުޝްދީ މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ށ.ފެދޫގެ އައިޝަތު ޝާއިނާ އެވެ.

23 ސެޕްޓެމްބަރު 2026 އިން 28 ސެޕްޓެމްބަރު 2026 ގެ ނިޔަލަށް ހުޅުމާލޭގައި ކުރިއަށްދާ މިމުބާރާތުގައި މިއަހަރު ޖުމްލަ 15 ޓީމަކުން ވާދަކޮށްފައިވާއިރު، މުބާރާތް ކުރިއަށް ގެންގޮސްފައިވަނީ ބައިވެރި 15 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިންގުރޫޕުން ވެސް ތިންވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ޖާގަ ލިބިފައެވެ.