ހޮލީވުޑްގެ ކުރީގެ މަޝްހޫރު ދެމަފިރިން ކަމަށްވާ އެންޖެލީނާ ޖޯލީ އާއި ބްރެޑް ޕިޓްގެ ދަރިފުޅު ޒަހާރާ، އޭނާގެ ރަސްމީ ނަމުން ބައްޕަގެ ފަހު ނަން ކަމަށްވާ 'ޕިޓް' ގާނޫނީ ގޮތުން އުނިކޮށްފިއެވެ.

ރިޕޯޓުތައް ބުނާގޮތުން، އުމުރުން 21 އަހަރުގެ ޒަހާރާގެ ނަން "ޒަހާރާ މާލީ ޖޯލީ-ޕިޓް" ގެ ބަދަލުގައި "ޒަހާރާ މާލީ ޖޯލީ" އަށް ބަދަލުކުރުމަށް ލޮސް އެންޖަލިސްގެ ކޯޓަކުން ހޯމަ ދުވަހު ވަނީ ހުއްދަ ދީފައެވެ.

ކޯޓަށް ހުށަހެޅި މި މައްސަލައިގައި އެއްވެސް ފަރާތަކުން އިއުތިރާޒުކޮށްފައި ނުވާތީ، ފަނޑިޔާރު ވަނީ ނަން ބަދަލުކުރުމުގެ ހުއްދަ ދީ، ލިޔެކިޔުންތައް ފުރިހަމަކޮށްފައެވެ.

މިއީ ބްރެޑް ޕިޓްގެ ދަރިންގެ ތެރެއިން އޭނާގެ ނަން އުނިކުރި ތިންވަނަ ކުއްޖާއެވެ.

މީގެ ކުރިން ޝައިލޯ އާއި މެޑޮކްސް ވެސް ވަނީ ގާނޫނީ ގޮތުން ބައްޕަގެ ނަން އުނިކޮށްފައެވެ. މީގެ އިތުރުން ދަރިފުޅު ވިވިއެން ވެސް ވަނީ ނަން ބަދަލުކުރުމުގެ މަސައްކަތް ފަށާފައެވެ.

މިފަހަކަށް އައިސް ޒަހާރާ އާންމު ތަންތަނުގައިވެސް ބޭނުންކުރަމުން އައީ 'ޖޯލީ' މި ނަމެވެ. އެގޮތުން މިއަހަރުގެ މެއި މަހު އޭނާ ގްރެޖުއޭޓްވީއިރު ވެސް ބޭނުންކޮށްފައިވަނީ ބައްޕަގެ ނަން ނުހިމެނޭ ގޮތަށެވެ.

ބްރެޑް ޕިޓް އާއި އެންޖެލީނާ ވަކިވިފަހުން، ބްރެޑް ޕިޓް އާއި އޭނާގެ ދަރިންނާ ދެމެދު އޮތް ގުޅުން ވަރަށް ބޮޑަށް ހީނަރުވެފައިވާކަމަށް ރިޕޯޓުތައް ބުނެއެވެ.