މޯލްޑިވިއަން އަކީ ދައުލަތަށް ފައިދާ ދެއްކުމުގައި ރަނގަޅު ނަމޫނާއެއް ކަމުގައި ޓްރާންސްޕޯޓު މިނިސްޓަރ މުހައްމަދު އަމީން ވިދާޅުވެއްޖެއެވެ.

މިނިސްޓަރ މިހެން ވިދާޅުވީ މޯލްޑިވިއަން ސީޕްލޭން ޓަރމިނަލް ހުޅުވުމުގެ ރަސްމިއްޔާތުގައި ވާހަކަދައްކަވަމުންނެވެ.

މިނިސްޓަރ އަމީން ވިދާޅުވީ އައު ސީޕްލޭން ޓަރމިނަލްއަކީ ރާއްޖޭގެ ސީޕްލެން ސިނާއަތުގައި ޤަބޫލުކުރެވޭ މިންވަރަށް ޤާއިމްކުރެވިފައިވާ ފެންވަރު ރަނގަޅު ތަނެއްކަމަށެވެ. އަދި މޯލްޑިވިއަންގެ ތަޖުރިބާގެ ތެރެއިން ހަނދާނުގައި ބަހައްޓަންވީ ކުންފުނި ކުރިއަރައިގެން ދިޔަ ގޮތްކަމަށް ވިދާޅުވިއެވެ.

މީގެއިތުރުން ދައުލަތަށް ފައިދާ ދެއްކުމުގައި ރަނގަޅު ނަމޫނާއެއް ދެއްކި ކުންފުނިތަކުގެ ތެރޭގައި މޯލްޑިވިއަން ހިމެނޭނެ ކަމަށާއި އެހެންނަމަވެސް އެކަށީގެންވާ ގޮތުގައި ކުންފުނީގެ ކަންކަން ނުހިންގުމުން 2018-2023 އަށް ކުންފުނީގެ ހާލަތު ދަށްވެ، ވަރަށް ބޮޑަށް ދަރަނިވެރިވިކަން ފާހަގަކުރެއްވިއެވެ.

މިނިސްޓަރ ވިދާޅުވީ އެކަމިގެ ސަބަބުން މުޅި އޮޕަރޭޝަންސް ހުއްޓުމަކަށް އައިސް، ކޮންޓްރެކްޓްތަކެއް ގެއްލުނު ކަމަށެވެ. އަދި 2023ގެ ފަހުން ކުންފުނީގެ މެނޭޖްމެންޓާއި، ހިންގުމަށް ގެނައި ބަދަލުން، ބޮޑު ދަރަންޏެއް 5 އަހަރު އޮއްވާ މިދިޔަ އަަހަރު ބަލާލިއިރު ކުންފުނި ޓަރންއެރައުންޑްކޮށްފައިވާ ކަމަށް އަމީން ވިދާޅުވިއެވެ.

އަމީން ވަނީ ސަރުކާރުގެ އަމާޒަކީ ކުރިއަށް އޮތްތަނުގައިވެސް ކުންފުނި އިތުރަށް ހަރުދަނާކުރުންކަމަށާއި، މިދިޔަ 3 އަަހަރު ތެރޭ ސީޕްލޭންގެ ޚިދުމަތް އައު މޮޑެލްއަކަށް ބަދަލުކުރުމަށް މަސައްކަތްކުރަމުންދާކަމަށެވެ. އަދި ކުންފުންޏަށް އުމްރާނީ އަދި ރައުސުލްމާލުތައް ހޯދުމުގައި ކުރިއެރުން ހޯދުމުގެ ބަދަލުގައި، ކުންފުނީގެ މުވައްޒަފުންގެ މާހައުލު ރަނގަޅުކުރުމަށް އިސްކަންދެއްވާކަމަށް ވަޒީރު ވިދާޅުވިއެވެ.