އީޓިންގ ޑިސްއޯޑަރއާ ގުޅޭ ކޮންޓެންޓްތަކަށް ޔޫޓިއުބުން ހަރުކަށި ފިޔަވަޅުތަކެއް އަޅަން ފެށުމާ ގުޅިގެން، ކާ ވީޑިއޯ ހަދާ ދެކުނު ކޮރެއާގެ މަޝްހޫރު 'މުކްބަންގް' ކްރިއޭޓަރުން ކަންބޮޑުވުން ފާޅުކުރަން ފަށައިފިއެވެ.

ދާދިފަހުން، ދެކުނު ކޮރެއާގެ އެންމެ މަޝްހޫރު އެއް މުކްބަންގް ޔޫޓިއުބަރ ކަމަށްވާ ޓްޒޫޔަންގް ވަނީ މިކަމާ ގުޅޭގޮތުން ވާހަކަދައްކާފައެވެ. ހޯމަ ދުވަހު އޭނާގެ ޗެނަލްގައި އާންމުކުރި ވީޑިއޯއެއްގައި ބުނެފައިވަނީ، "މިހާރަކަށް އައިސް ގިނައިން ކެއުމަކީ ޓްރެންޑެއް ނޫން" ކަމަށާއި "މިހާރުން ފެށިގެން އަހަރެން ވާނީ މެދުމިންވަރަކަށް ކާ ޔޫޓިއުބަރަކަށް" ކަމަށެވެ.

2018 ވަނަ އަހަރުން ފެށިގެން ވީޑިއޯ ހަދަން ފެށި ޓްޒޫޔަންގްގެ ޗެނަލްގައި މިހާރު 13.5 މިލިއަން ސަބްސްކްރައިބަރުން އެބަތިއްބެވެ. ކުޑަ ހަށިގަނޑެއް ހުރިނަމަވެސް ވަރަށް ގިނަ އަދަދަކަށް ކާ މީހެއްގެ ގޮތުގައި މަޝްހޫރުވެފައިވާ ޓްޒޫޔަންގް މިހެން ބުނެފައިވަނީ، ޔޫޓިއުބްގެ އާ ޕޮލިސީގެ ސަބަބުން މުކްބަންގް ވީޑިއޯ ހަދާމީހުންނަށް ފައިސާ ހޯދުމަށް ހުރަސްއެޅިދާނެކަމަށް ބުނެ ކޮރެއާގެ ނޫސްތަކުން ރިޕޯޓުކޮށްފައިވާ ދަނޑިވަޅެއްގައެވެ.

ޔޫޓިއުބުން ކުރިން އާންމުކޮށްފައިވާ "އެޑްވަޓައިޒަރ-ފްރެންޑްލީ ކޮންޓެންޓް ގައިޑްލައިންސް" ގައި ބުނެފައިވާ ގޮތުން، ކެއުމުގެ ނުރަނގަޅު އާދަތަކަށް ހިތްވަރުދޭ ނުވަތަ އެފަދަ ކަންކަން ކޮޕީކުރަން މަގުފަހިވާ ކޮންޓެންޓްތަކަށް އިޝްތިހާރުން ލިބޭ އާމްދަނީ ލިމިޓުކުރާނެއެވެ.

ޔޫޓިއުބުން އީޓިންގ ޑިސްއޯޑަރ ގިންތިކުރަނީ "ކޮންޓްރަވާޝަލް އިޝޫއެއް"ގެ ގޮތުގައެވެ. އަދި މާގިނައިން ކެއުން (ބިންޖް އީޓިންގ) އާއި، މާބޮޑަށް ހިކިކޮށް ތިބޭ މީހުން ދެއްކުމާއި، ބަރުދަނާ ގުޅުވައިގެން ފުރައްސާރަކުރުން ފަދަ ކަންކަން ހިމެނޭ ވީޑިއޯތަކުން އާމްދަނީ ނުލިބޭނެކަމަށް ބުނެފައިވެއެވެ. މިއީ ސީދާ މުކްބަންގް ވީޑިއޯތައް މަނާކުރުމުގެ ބަދަލުގައި، އެފަދަ ކޮންޓެންޓުން ފައިސާ ހޯދުން ކޮންޓްރޯލްކުރުމަށް އެޅި ފިޔަވަޅެއްކަމަށް ބެލެވެއެވެ.

މިކަމުގެ ސަބަބުން ކޮރެއާގެ ބައެއް ކްރިއޭޓަރުންނަށް މިހާރުވެސް ދަނީ ދަތިތަކާ ކުރިމަތިވަމުންނެވެ.