ރަސްމާލެ މަޝްރޫއުން ހައްލުވާނީ ހަމައެކަނި ބޯހިޔާވަހިކަމެއް ނޫން ކަމުގައި ފަންނާއި ސަޤާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.

ރަސްމާލެއިން ބައެއް ބޭރުގެ ފަރާތަކަށް ވިއްކާލީކަމަށް ސަރުކާރަށް ތުހުމަތުކޮށް ދެކެވޭ ވާހަކަތަކަށް އިޝާރާތްކުރައްވާ ހީނާ ވިދާޅުވީ މިއީ ރާއްޖޭގެ ތާރީހުގައި ވެސް ހިންގާ އެންމެ ބިޔަ، ބޭރުގެ އިންވެސްޓްމަންޓް ކަމަށެވެ.

ރަސްމާލެ މަޝްރޫޢާ ބެހޭގޮތުން އެކި ބޭފުޅުން އެކި ގޮތަށް ވާހަކަ ދައްކަމުންދާއިރު، މައިގަނޑު 2 ނުކުތާއަކަށް ވަޒީރު ވަނީ އަލިއަޅުވާލައްވާފައެވެ. އެގޮތުން ރަސްމާލޭގައި ތަރައްޤީ ކުރާ ޕްރޮޕަޓީއެއް ވިއްކައިގެން ލިބޭ އާމްދަނީގެ 10 އިންސައްތަ ބިމުގެ އަގުގެ ގޮތުގައި ދައުލަތަށް ލިބޭނެ ކަމަށާއި އެއީ 3 ބިލިއަން ޑޮލަރަށްވުރެ ބޮޑު ޢަދަދެއް ކަމަށް ވިދާޅުވިއެވެ.

މީގެއިތުރުން މިއިން ކޮންމެ ޕްރޮޕަޓީއަކުން ހިންގާ ކޮންމެ ޓްރާންސެކްޝަނެއްގެ 4 އިން ސައްތައިގެ ފީއެއް ސަރުކާރަށް ދައްކަންޖެހޭ ކަމަށާއި މިއީ މީގެ ކުރިން ރާއްޖޭގެ ބިމެއް ނުވަތަ ފަޅެއް މިފަދަ ގޮތަކަށް މަޝްރޫޢުތައް ހިންގަން ދިގު މުއްދަތަށް ދޫކުރިއިރު ޢަމަލުކުރި ގޮތާ ޚިލާފަށް ސަރުކާރަށާއި ރައްޔިތުންނަށް ފައިދާ ވާގޮތަށް ނިންމާފައިވާ ނިންމުމެއް ކަމަށް ވިދާޅުވިއެވެ. އަދި މީގެ ކުރިން މިފަދަ ތަންތަނުން ލިބުނީ ބިމު ކުލި އެކަނި ކަމަށާއި އެފަދަ ތަންތަނުގައި ކުރާ ކިތަންމެ ބޮޑު ވިޔަފާރިއެއް ކަމަށް ވިޔަސް އޭގެ ފައިދާ ސަރުކާރަކަށް ނުވަތަ ރައްޔިތުންނަކަށް ނުލިބޭ ކަމަށް ވަނީ ފާހަގަކުރައްވާފައެވެ. އެހެންކަމުން އެއް ފަހަރު ލިބޭ ކުޑަ ފައިދާ އަކަށްވުރެ ދެމެހެއްޓެނިވި ގޮތެއްގައި ވާނެ މަންފާ ގޯސް ކަމަށް ދައްކަން އުޅުމުން ވާހަކައިގެ ދެކޮޅު ނުޖެހޭކަން ސާފުވާ ކަމަށް ހީނާ ވަލީދު ވިދާޅުވިއެވެ.

ދެވަނަ ނުކުތާއެއްގެ ގޮތުގައި ޒަޔަނިސްޓުންނާއި ދެކޮޅަށް އެންމެ ވަރުގަދަ ނިންމެވުމެއް ނިންމެވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށާއި އެގޮތުން އިސްރާއީލްގެ ޕާސްޕޯޓް ބޭން ކުރެއްވީވެސް ރައީސް ޑރ. މުޢިއްޒުކަން ފާހަގަކުރައްވާފައި ވެއެވެ. އަދި ބައިނަލްއަޤްވާމީ މައިދާނުގައިވެސް ރާއްޖެއިން ދަނީ ޒަޔަނިސްޓުންނާ ދެކޮޅަށް މީގެ ކުރިން އެއްވެސް ސަރުކާރެއްގައި އަޑު ނުއުފުލާ މިންވަރަށް އަޑު އުފުލަމުން ކަމުގައި ވިދާޅުވިއެވެ.

އެހެންކަމުން އަޅުގަނޑުމެން ޤަބޫލު ކުރަންވީ ޔަހޫދީންނާއި ގާތްގުޅުން ބާއްވާ ، އަދި އެފަރާތްތަކާއެކު ގުޅުން ބަދަހި ކުރުމަށް ފާޅުގައި ގޮވާލި ފަރާތްތަކުން ދައްކާ ވާހަކަތައްތޯ ވިސްނާލަންޖެހޭކަމަށް ހީނާ ވަނީ ސުވާލު އުފައްދަވާފައެވެ.

ސިޔާސީ މަގްސަދެއް ހާސިލް ކުރުމަށް ކުރީގެ ރައީސްކަން ކުރައްވާފައި ތިއްބެވި ބޭފުޅުންނާއި ސިޔާސީ އެކިއެކި ބޭފުޅުން މުޅިން އޮޅޭ ގޮތަށް ވާހަކަ ދެއްކުމަކީ ޒިންމާދާރު ގޮތެއްނޫންކަން ފާހަގަކުތައްވާ 'އެކްސް' ގައި ހީނާ ވިދާޅުވީ ޚާއްސަކޮށް ޓޫރިސްޓް ރިސޯޓްތައް 99 އަހަރަށް ކުއްޔަށްދެވޭ ގޮތަށް ޓޫރިޒަމްގެ ގާނޫނު ބަދަލުކުރެއްވީ ކުރީގެ ރައީސުން ކަމަށެވެ. އަދި ކަންކަން އޮޅޭ ގޮތަށް ވާހަކަ ދެއްކެވުމަކީ އަމުދުން ޒިންމާދާރު ގޮތެއް ނޫން ކަމުގައި ވިދާޅުވިއެވެ.