ށ.ފުނަދޫގައި މިހާރު ކުރިއަށްދާ ޑަބްލިޔުޑީސީ ހޭންޑްބޯޅަ ޓޯނަމަންޓުގައި މިރޭ ކުޅުނު ދެވަނަ މެޗުގައި 11-3 ގެ ތަފާތުބޮޑު ނަތީޖާއަކުން ފުނަދޫ ސްކޫލް ބަލިކޮށް ޔުނައިޓެޑް ބީއެމްއެލް އިން ސެމީފައިނަލްގެ ޖާގައެއް ކަށަވަރުކޮށްފިއެވެ.

މުބާރާތުގައި ޔުނައިޓެޑް ބީއެމްއެލް ކުޅުނު ފުރަތަމަ މެޗުގައި ށ.އަތޮޅު ހޮސްޕިޓަލް އަތުން 11-0 ގެ ތަފާތުބޮޑު ނަތީޖާއަކުން މޮޅުވެފައިވާއިރު، މިއީ ފުނަދޫ ސްކޫލުން މުބާރާތުގައި ކުޅުނު ފުރަތަމަ މެޗެވެ.

މުޅި މެޗުގައި ވެސް ޔުނައިޓެޑް ބީއެމްއެލްގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ފަސް ލަނޑުގެ ލީޑަކާއެކު 6-1 ގެ ނަތީޖާއަކުން ޔުނައިޓެޑް ބީއެމްއެލް ކުރީގައި އޮވެގެންނެވެ. އަދި ދެވަނަ ހާފުގައި ޔުނައިޓެޑް ބީއެމްއެލް އިން އިތުރު ފަސް ލަނޑު ކާމިޔާބުކުރިއިރު، މިހާފުގައި ފުނަދޫ ސްކޫލުން ވެސް ވަނީ އިތުރު ދެލަނޑު ކާމިޔާބުކޮށްފައެވެ.

އެގޮތުން މިމެޗުގައި ޔުނައިޓެޑް ބީއެމްއެލްގެ އާމިނަތު ނަޖުމާ 10 ލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ ޚަދީޖާ ހުސެއިންއެވެ.

މީގެ އިތުރުން މިމެޗުގައި ފުނަދޫ ސްކޫލްގެ ފާތުމަތު ޔަޝްފާ ދެލަނޑު ކާމިޔާބުކުރިއިރު، އެޓީމުގެ އަނެއް ލަނޑު ކާމިޔާބުކޮށްދިނީ މަރިޔަމް ހަސަން އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ޔުނައިޓެޑް ބީއެމްއެލްގެ އާމިނަތު ނަޖުމާ އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ދެމެޗުން ވެސް މޮޅު ގުރޫޕް އޭގެ އެއްވަނަ ޓީމުގެ ގޮތުގައި ޔުނައިޓެޑް ބީއެމްއެލް ސެމީފައިނަލުގެ ޖާގައެއް ކަށަވަރުކުރިއިރު، މިގުރޫޕްގެ ދެވަނަ ކަށަވަރުވާނީ މާދަމާ ރޭ ފުނަދޫ ސްކޫލާއި ށ.އަތޮޅު ހޮސްޕިޓަލް ވާދަކުރާ މެޗުގެ ނަތީޖާއަށްފަހު އެވެ.

27 ސެޕްޓެމްބަރު 2026 އިން 03 އޮކްޓޯބަރު 2026 ގެ ނިޔަލަށް ކުރިއަށްދާ މިމުބާރާތުގައި މިއަހަރު ޖުމްލަ ހަ ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަ ޓީމު ދެ ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭއިރު، މުބާރާތުގެ ފައިނަލް މެޗު ކުޅުމަށް ހަމަޖެހިފައިވާނި އޮކްޓޯބަރު މަހުގެ 03 ވަނަ ދުވަހުއެވެ.