ށ.ފުނަދޫގައި މިހާރު ކުރިއަށްދާ ޑަބްލިޔުޑީސީ ހޭންޑްބޯޅަ ޓޯނަމަންޓުގައި މިރޭ ކުޅުނު ފުރަތަމަ މެޗުގައި ފަސޭހަކަމާއެކު 10-2 ގެ ނަތީޖާއަކުން ށ.އަތޮޅު ފެމިލީ އެންޑް ޗިލްޑްރަން ސާވިސް ސެންޓަރ ( އެފްސީއެސްސީ) ބަލިކޮށް ލޯކަލް ގަވަރުމަންޓް އޮތޯރެޓީ- މިލަދުންމަޑުލު އުތުރުބުރި ގޮފި (އެސްއާރުސީ ) އިން މުބާރާތުގެ ފުރަތަމަ މޮޅު ހޯދައިފިއެވެ.

މުބާރާތުގައި އެސްއާރުސީ ކުޅުނު ފުރަތަމަ މެޗުގައި ޕޮލިސް ޔުނައިޓެޑް އަތުން ބަލިވެފައިވާއިރު. މިއީ އެފްސީއެސްސީ މުބާރާތުގައި ކުޅުނު ފުރަތަމަ މެޗެވެ.

މުޅި މެޗުގައި ވެސް މޮޅަށް ކުޅެ އެސްއާރުސީ އިން މެޗު ޑޮމިނޭޓްކުރިއިރު، ފުރަތަަމަ ހާފުގެ ކުޅުން ނިމިގެންދިޔައީ ހަތަރު ލަނޑުގެ ލީޑަކާއެކު 5-1 ގެ ނަތީޖާއަކުން އެސްއާރުސީ ކުރީގައި އޮވެގެންނެވެ. އަދި ދެވަނަ ހާފުގައި އެސްއާރުސީ އިން އިތުރު ފަސް ލަނޑު ކާމިޔާބުކުރިއިރު، މިހާފުގައި އެފްސީއެސްސީ އިން ވެސް އިތުރު އެއްލަނޑު ކާމިޔާބުކުރިއެވެ.

އެގޮތުން މިމެޗުގައި އެސްއާރުސީގެ މަރިޔަމް ރިފާ އަށް ލަނޑު ކާމިޔާބުކުރިއިރު، އެޓީމުގެ ފާތުމަތު އާޔަތު އަދި ފާތުމަތު ޒީޝާ މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި އެފްސީއެސްސީގެ ދެލަނޑު ވެސް ފާތުމަތު އައިނާ ކާމިޔާބުކޮށްދިންއިރު، މެޗުގެ މޮޅު ކުޅުންތެރިއަކަށް ހޮވުނީ އެސްއާރުސީގެ މަރިޔަމް ރިފާ އެވެ.

27 ސެޕްޓެމްބަރު 2026 އިން 03 އޮކްޓޯބަރު 2026 ގެ ނިޔަލަށް ކުރިއަށްދާ މިމުބާރާތުގައި މިއަހަރު ޖުމްލަ ހަ ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަ ޓީމު ދެ ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭއިރު، މުބާރާތުގެ ފައިނަލް މެޗު ކުޅުމަށް ހަމަޖެހިފައިވާނި އޮކްޓޯބަރު މަހުގެ 03 ވަނަ ދުވަހުއެވެ.