މިހާރު ހުޅުމާލޭގައި ކުރިއަށްދާ ހިޔާކަޕް ހޭންޑްބޯޅަ މުބާރާތުގެ ޗެމްޕިއަންކަން ތުޅާދޫ ޔަންގް އީގަލްސް(ޓީވައިއީއެސް) އިން ހޯދައިފިއެވެ.

މުބާރާތުގެ ޗެމްޕިއަންކަން ޓީވައިއީއެސް އިން ހޯދީ މިރޭ ކުޅުނު ފައިނަލުގައި ވާދަވެރި ކުޅުމަކަށްފަހު 12-10 ގެ ނަތީޖާއަކުން ހިޔާ ސްޕޯޓްސް ކުލަބު ބަލިކުރުމަށްފަހު އެވެ.

މުބާރާތުގެ ފައިނަލުން ޓީވައިއީއެސް ޖާގަ ހޯދީ ސެމީފައިނަލުގައި ށ. ފޭދޫ ހޭންޑްބޯޅަ ޓީމު 19-12 ގެ ނަތީޖާއަކުން ބަލިކުރުމަށްފަހު އެވެ. އަދި ހިޔާ ސްޕޯޓްސް ކުލަބު ފައިނަލުން ޖާގަ ހޯދީ ސެމީފައިނަލުގައި ކުއީންސް އައުރާ 9-5 ގެ ނަތީޖާއަކުން ބަލިކުރުމަށްފަހު އެވެ.

ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔަ ފައިނަލް މެޗުގެ ފުރަތަމަ ހާފު ނިމިގެންދިޔައީ ދެ ޕޮއިންޓްގެ ލީޑަކާއެކު 7-5 ގެ ނަތީޖާއަކުން ހިޔާ ސްޕޯޓްސް ކުލަބު ކުރީގައި އޮވެގެންނެވެ.

ނަމަވެސް ދެވަނަ ހާފުގައި ޓީވައިއީއެސް އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތިޖާއެއްގެ ގޮތުން މިހާފުގައި އެޓީމުން އިތުރު ހަތް ލަނޑު ކާމިޔާބުކުރިއިރު، މިހާފުގައި ހިޔާ ސްޕޯޓްސް ކުލަބަށް ކާމިޔާބުކުރެވުނީ ތިން ލަނޑެވެ.

ފައިނަލް މެޗުގެ މޮޅު ކުޅުންތެރިއަކަށް ހޮވުނީ ޓީވައިއީއެސްގެ ފާތިމަތު ރިޔުޒް އެވެ. އަދި މުބާރާތުގެ އެންމެ މޮޅު ކުޅުންތެރިޔާ (ކްއީން އޮފް ދަ ޓޯނަމަންޓް) އަކީ ޓީވައިއީއެސްގެ ސައުދާ ބިންތް އަބްދުﷲ ޝަފީގު ބިންތް ހަސަން އެވެ.

23 ސެޕްޓެމްބަރު 2026 އިން 28 ސެޕްޓެމްބަރު 2026 ގެ ނިޔަލަށް ހުޅުމާލޭގައި ކުރިއަށްދާ މިމުބާރާތުގައި މިއަހަރު ޖުމްލަ 15 ޓީމަކުން ވާދަކޮށްފައިވާއިރު، މުބާރާތް ކުރިއަށް ގެންގޮސްފައިވަނީ ބައިވެރި 15 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިންގުރޫޕުން ވެސް ތިންވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ޖާގަ ލިބިފައެވެ.