ލަފްޓާ ޝެފުންގެ ސެޓުގައި ރީމް ޝެއިޚްގެ މޫނު ފިހިއްޖެ

ކަލާސް އިން ގެނެސްދޭ ކުކިން ޝޯ ކަމަށްވާ "ލާފްޓާ ޝެފްސް އަންލިމިޓެޑް އެންޓަޓެއިންމަންޓް" ގެ ސެޓުގައި އެކްޓަރު ރީމް ޝެއިހްގެ މޫނު ވަނީ ފިހިފައިއެވެ.

އަދި މިއަދު އިންސްޓަގްރާމްގައި ރީމް ވަނީ އޭނާގެ ސިއްހީ ހާލަތާ ގުޅޭ އަޕްޑޭޓެއް ހިއްސާކޮށްފަ އެވެ.

ރީމް އިންސްޓަގްރާމްގައި ޕޯސްޓްކޮށްފައި ވަނީ އޭނާގެ ފިހުނުއިރު މޫނު ފެންނަގޮތުގެ ފޮޓޯއަކާ މިހާރު މޫނު ހުރި ގޮތެވެ. އެ ޕޯސްޓުގެ ކެޕްޝަންގައި ހުދު ހިތަކާއި އެކު އޭނާ ލިޔެފައި ވަނީ ބަލިން ރަނގަޅުވެފައިވާކަމާއި އެކަމަށްޓަކައި ހެއްދެވި ފަރާތަށް ޝުކުރުކުރާ ކަމަށެވެ.

މިޑް ޑޭ އިން ރިޕޯޓްކޮށްފައިވާ ގޮތުގައި ސެޓުގައި ކެއްކުމުގެ ތެރޭގައި ރީމްގެ މޫނަށް ހޫނު ތެޔޮ ބުރުމުގެ ސަބަބުން ރީމްގެ މޫނު ވަނީ ކޮންމެވެސް ވަރަކަށް ފިހިފަ އެވެ. ކަލަރސް ޓީވީން މި އެޕިސޯޑްގެ ޕްރޮމޯއެއް އާންމުކުރި ނަމަވެސް މިހާރު ވަނީ އެ ޕްރޮމޯ ރިމޫވްކޮށްފައިއެވެ.

އޭނާގެ ޕޯސްޓަށް ފޭނުންނާއި އޭނާގެ އެކުވެރިން ވަނީ އޭނާއަށް އަވަސް ޝިފާއަކަށް އެދިފައިއެވެ.

މިދިޔަ ސެޕްޓެމްބަރު މަހުގެ ހަތް ވަނަ ދުވަހު ރީމް އިންސްޓަގްރާމްގައި ލިޔެފައި ވަނީ އޭނާގެ ދިރިއުޅުން "ބަދަލު" ވެދާނެ އެކްސިޑެންޓަކުން ހެއްދެވި ފަރާތް އޭނާ ސަލާމަތް ކޮށްދީފައިވާކަމަށެވެ. އަދި އުނދަގޫ ހާލަތުގައި ޢޭނާގެ ހާލުބެލި އެންމެނަށް ޝުކުރުއަދާކޮށްފައިއެވެ. އަދި އޭނާގެ ފޭނުންނަށް އަބަދުވެސް އޭނާއާއި އެކު ކޮންމެ ދަޑިވަޅެއްގައިވެސް ތިބޭތީ ހުރިހާ ފޭނުންދެކެވެސް އޭނާ ވަރަށް ލޯބިވާކަން އޭނާވަނީ ހާމަކޮށްފައިއެވެ.

މި އަނިޔާއަށް ފަހު ރީމް އެނބުރި މަސައްކަތަށް ސެޕްޓެމްބަރު މަހުގެ 10 ވަނަ ދުވަހު ވަނީ ނިކުމެފައިއެވެ.

ރީމް ވަނީ ވަޒީރު އަދި ގުލް މަކައި ފަދަ ފިލްމުތައް ކުޅެފަ އެވެ. އަދި އޭނާ އަކީ ޓީވީ ސިލްސިލާތައް ކަމަށްވާ ނީރް ބަރޭ ތޭރޭ ނައިނާ ދޭވީ، ކޭލްތީ ހޭ ޒިންދަގީ އާންކް މިޗޯލީ އަދި ތޭރޭ އިޝްގް މޭ ގަޔާލް ފަދަ ސިލްސިލާތަކުން ވެސް މަޝްހޫރުވި ތަރިއެކެވެ.

ބާރްތީ ސިންގް ހޯސްޓްކުރާ ލާފްޓާ ޝެފު ސީރީސްގައި ރީމްގެ އިތުރުން ބައިވެރިންގެ ގޮތުގައި އަލީ ގޯނީ، އަންކިތާ ލޯކަންޑޭ، ކަރަން ކުންދްރާ، އަރުޖުން ބިޖްލާނީ، ޖަންނަތު ޒުބައިރު، ވިކީ ޖެއިން، އަދި ނިއާ ޝަރުމާ ފަދަ ތަރިން ހިމެނެ އެވެ.