އުތުރު ކޮރެއާއިން ޖަޕާނުގެ އުތުރުގެ ސަރަހައްދުތަކުގެ މަތިން ބެލިސްޓިކް މިސައިލެއް އުދުއްސައިލައިފި އެވެ.

ދެކުނު ކޮރެއާގެ ޖޮއިންޓް ޗީފްސް އޮފް ސްޓާފް (ޖޭސީއެސް) އިން ކަށަވަރުކޮށްދިން ގޮތުގައި އަވަށްޓެރި ޖަޕާނުގެ އިރުމަތީ ބިތުގެ މަތިން ދަތުރުކުރި މިސައިލަކީ އުތުރު ކޮރެއާގެ މުޕިޔޮންގް-ރައި ސަރަހައްދުން މިއަދު ހެނދުނު 7:23 ހާއިރު އުދުއްސާލި މިސައިލްއެކެވެ.

މިއީ 2017 ވަނަ އަހަރުގެ ފަހުން ޖަޕާނުގެ މައްޗަށް އުދުއްސާލި ފުރަތަމަ ބެލިސްޓިކް މިސައިލެވެ.

ޖަޕާނުގެ ބޮޑުވަޒީރުގެ އޮފީހުން ކުރި ޓުވީޓެއްގައި ވަނީ ޖަޕާނުގެ އެންމެ އުތުރުގައި އޮންނަ ހޮކައިޑޯ އާއި އެ ގައުމުގެ އުތުރުއިރުމަތީ ޕްރިފެކްޗާ އެއް ކަމަށްވާ އައޮމޯރީގައި ދިރިއުޅޭ މީހުން އިމާރާތްތަކުގައި ހިޔާވަހިކަން ހޯދައި، "ޝައްކުކުރެވޭ އެއްވެސް ކަމަކަށް ކައިރި ނުވުމަށާއި، ފުލުހުންނަށް ނުވަތަ ފަޔާ ޑިޕާޓްމެންޓަށް ވަގުތުން ގުޅުމަށް" އިލްތިމާސްކޮށްފަ އެވެ.

އަންގާރަ ދުވަހު މީޑިއާއާ މުޚާތަބު ކުރައްވާ ވާހަކަފުޅު ދައްކަވަމުން ޖަޕާނުގެ ބޮޑުވަޒީރު ފުމިއޯ ކިޝީޑާ ވަނީ ޖަޕާނުގެ މަތިން މިސައިލް އުދުއްސާލުން ވަރަށް ބޮޑަށް ކުށްވެރިކޮށްފައެވެ.

ޖަޕާނުގެ ޗީފް ކެބިނެޓް ސެކްރެޓަރީ ހިރޮކަޒޫ މަޓްސުނޯ ނޫސްވެރިންނާ ވާހަކަ ދައްކަވަމުން ވިދާޅުވީ އުތުރު ކޮރެއާއިން ބެލިސްޓިކް މިސައިލެއް އުދުއްސާލީ އެގައުމުގެ އެންމެ އުތުރުގައި އޮންނަ މައި ރަށް ހޮކައިޑޯއާ ދިމާއަށް ކަމަށް ބެލެވޭ ކަމަށެވެ.

މަޓްސުނޯ ވިދާޅުވީ، މިސައިލް ޖަޕާނުގެ އުތުރުއިރުމަތީ ޕްރިފެކްޗާ އޮފް އައޯމޯރީގެ މަތިން އުދުހިފައި ގޮސް ޖަޕާނުގެ އެކްސްކްލޫސިވް އިކޮނޮމިކް ޒޯންގެ ބޭރުގައި ޖައްސާފައިވަނީ އެގައުމުގެ ގަޑިން ހެނދުނު 7:46 (އިރުއޮއްސި 6:46 އީޓީ) ހާއިރު ކަމަށެވެ.

މަޓްސުނޯ އިތުރަށް ވިދާޅުވީ މި ލޯންޗްކުރުމަކީ "އާންމުންނަށް އޮތް ނުރައްކަލެއް" ކަމަށް ދެކެވަޑައިގަންނަވާ ކަމަށާއި، ޖަޕާނުގެ ސަރުކާރުން ހާލަތު ތަހުލީލުކޮށް ބައިނަލްއަގްވާމީ މުޖުތަމައާ ގުޅިގެން މަސައްކަތް ކުރުން ކުރިއަށް ގެންދާނެ ކަމަށެވެ.