އެމްޓީސީސީގެ ރާއްޖެ ޓްރާންސްޕޯޓް ލިންކުން މިއަދު މާލޭގައި ފަށާ މިނީ ބަހުގެ ހިދުމަތް ދޭނެ ވަގުތުތަށް އެކުންފުނިން އާންމުކޮށްފި އެވެ.

އެމްޓީސީސިއިން މައުލޫމާތު ދޭގޮތުގައި މާލޭގައި މިނީބަހުގެ ހިދުމަތް ދިނުމަށް ހަމަޖެހިފައިވަީ ހަފުތާގެ ކޮންމެ ދުވަހަކު ހެނދުނު 5:45 އިން ރޭގަނޑު 00:15 އަށެވެ.

އަދި މި ޚިދުމަތް ކޮންމެ ބަސްހުއްޓިއަކަށް 10 މިނެޓަކާއި 15 މިނެޓާ ދެމެދުގެ ވަގުތެއްގައި ލިބޭނެކަންވެސް އެކުންފުނިން ފާހަގަކުރެއެވެ.

މާލޭގައި މިނީ ބަހުގެ ޚިދުމަތް ފޯރުކޮށްދޭން ހަމަޖެހިފައިވަނީ ތިން ރޫޓަކުންނެވެ. އެއީ، އަމީނީ ރޫޓް، ސޯސަން ރޫޓް އަދި އޯކިޑް ރޫޓެވެ. މާލޭގެ ކޮންމެ ހިސާބެއްގައި ދިރިއުޅޭ ރައްޔިތަކަށްވެސް ފަސޭހައިން ޚިދުމަތް ފޯރުކޮށްދިނުމުގެ ގޮތުން މި ތިން ރޫޓްގައި ޖުމްލަ 40 ބަސް ހުއްޓި ހުންނާނެއެވެ.

މާލޭގައި ފަށާ މިނީބަހުގެ ޚިދުމަތަށް ކަނޑައަޅާފައިވާ އަގަކީ ހަތް ރުފިޔާއެވެ. ނަމަވެސް މިއަދުން ފެށިގެން ދެހަފްތާއަށް ހިދުމަތް ދިނުމަށް ހަމަޖެހިފައިވަނީ މުޅިން ހިލޭ އެވެ.

މިނީބަހުގެ ޚިދުމަތް ދިނުމަށް 18 ބަސް މާލޭގައި ހަރަކާތްތެރިވާނެއެވެ. އޭގެތެރެއިން އަށް ބަހަކީ ޚާއްސަ އެހީއަށް ބޭނުންވާ މީހުންނަށް ފަސޭހައިން އަރާފޭބޭގޮތަށް ރޭމްޕް އަދި ފުރޮޅުލީ ގޮނޑިއަށް ޚާއްސަ ޖާގަ އެކުލެވޭ ބަސްތަކެކެވެ.