ގައުމު ބިނާކުރުމުގައި އުމުރުން ދުވަސްވީ ކޮންމެ މީހެއްގެ ދައުރު ބޮޑުކަމަށް ހެލްތް މިނިސްޓަރު ޤީލާ އަލީ ވިދާޅުވެއްޖެ އެވެ.

އުމުރުން ދުވަސްވީ މީހުންގެ ދުވަސް ފާހަގަކުރުމަށް ހެލްތް މިނިސްޓްރީން އިންތިޒާމްކޮށްގެން ހުޅުމާލޭގައި، ހުޅުމާލޭގައި ހަރަކާތްތެރިވާ މުއައްސަސާތަކާއި ގިނަ އަދަދެެއްގެ އިސްވެރިންނާއެކު މިއަދު ހެނދުނު 6:15 ހާއިރު ބޭއްވި ލުއި ހިނގާލުމުގައި މިނިސްޓަރު ޤީލާ އަލީ ބައިވެރިވަޑައިގެންނެވި އެވެ.

މި ހިނގާލުން ނިންމާލުމަށްފަހު ސެންޓްރަލް ޕާކްގައި ބޭއްވި ބައްދަލުވުމުގައި މިނިސްޓަރު ވިދާޅުވީ މިހާރުގެ ޖީލުތަކަށް އުމުރުން ދުވަސްވީ ފަރާތްތަކުން ގެނެސްދެއްވި އަގުހުރި މެސެޖްތަކާއި ހުނަރުތަކެއްކަމަށެވެ. އަދި މި ހަރަކާތުގައި ބައިވެރިވި ފަރާތްތަކަށް މިނިސްޓަރު ޝުކުރު އަދާކުރެއްވި އެވެ.

"އަޅުގަނޑުމެން ފަޚުރުވެރިވަނީ އަޅުގަނޑުމެންނާއެކު ތިއްބެވި އަޅުގަނޑުމެންގެ މަންމައާއި ބައްޕައާއި މާމައާއި، ކާފައަށް. އެބޭފުޅުން އަޅުގަނޑުމެންނާއި ހިސާބަށް ގެނެސްދެއްވި އަގުހުރި މެސެޖްތަކާއި ގެނެސްދެއްވި މުހިންމު ކަންތައްތަކަށް. އަޅުގަނޑުމެންގެ ޤައުމު ބިނާކުރެވި މިއަދު މިހިސާބަށް އައުމުގަ އަޅުގަނޑުމެން ކޮންމެ ބޭފުޅަކީ މުހިންމު ޚިދުމަތްތެރިއެއް. އަޅުގަނޑު އުފަލާއެކު ތިބޭފުޅުންކޮށްދެއްވި މަސައްކަތުގެ އަގު ދިވެހި ސަރުކާރުންނާ، ދިވެހި މުޖްތަމަޢު ފާހަގަކުރާކަން ދަންނަވަން. " މިނިސްޓަރު ޤީލާ ވިދާޅުވި އެވެ.

މީގެއިތުރުން މި ބައްދަލުވުމުގައި ހައުސިންގް ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިންގް ޑިރެކްޓަރު އަލީ ޒުހެއިރު ވަނީ ހުޅުމާލޭގެ ޕާކުތަކާއި ސަރަހައްދުތައް ތަރައްޤީކުރުމުގައި އުމުރުންދުވަސްވީ ފަރާތްތަކަށް އެތަންތަން ބޭނުންކުރެވޭނެ ގޮތަށް މަސައްކަތް ބައްޓަން ކުރަމުންދާ ކަމަށާއި، މިކަމުގައި ސަރުކާރުންވެސް އިސްކަން ދެއްވާ ކަމަށް ވިދާޅުވެފަ އެވެ.

އެޗްޑީސީން ވަނީ ސީއެސްއާރުގެ "ދުޅަހެޔޮ އިސްރަށްވެހިން" ޕްރޮގްރާމުގައި ބައިވެރިވުމުގެ ފުރުސަތު ހުޅުވާލާފަ އެވެ.

މި ޕްރޮގްރާމުގައި އުމުރުން ދުވަސްވީ ފަރާތްތަކަށް އެއްވެސް އަގަކާ ނުލާ ބައިވެރިވެވޭއިރު، ހަފްތާއަކު 3 ދުވަހު އެންމެން އެކުވެ، އެކި ހަރަކާތްތައް ކުރިއަށް ގެންދިއުމަށް ވަނީ ރާވާފަ އެވެ. އަދި ކޮންމެ މަހަކު އެއްފަހަރު، ރާއްޖޭގެ ކުރިއަށްގެންދާ ސިނާޢީ މަސައްކަތްތައް ތަޖުރިބާކޮށްލުމަށް ފުރުސަތު ފަހިކޮށްދޭއިރު، ކޮންމެ 3 މަހަކުން އުމުރުން ދުވަސްވީ ފަރާތްތަކަށް ހެލްތު ސްކްރީނިންގއެއް ކުރިއަށް ގެންދަން ވަނީ ރާވާފަ އެވެ.

އުމުރު ދުވަސްވީ މީހުންގެ ދުވަހުގެ މިއަހަރުގެ ޝިޢާރަކީ، ދިގު އުމުރުގެ ޒަމާން: ދުޅަހެޔޮ ދިރިއުޅުމަކަށް ނިޒާމުތައް ބައްޓަން ކުރުމެވެ. މިއަދު ބޭއްވި ހިނގާލުން ކަސްރަތު ކުރުމާއި އުމުރުން ދުވަސްވީ މީހުންގެ ގަސް އިންދުމުގެ ހަރަކާތާއެކު ނިންމާލާފައިވާއިރު، މި ދުވަހުގެ ޝިއާރުގެ ދަށުން އިތުރު ހަރަކާތްތައް ކުރިއަށް ގެންދިއުމަށް ރާވާފައިވެ އެވެ.