



ދިވެހީންގެ ސަރުކާރަށް ތިން އަހަރު ފުރުމާ ގުޅިގެން، ވޭތުވެދިޔަ 156 ހަފުތާގެ ތެރޭގައި ސަރުކާރުން ކޮށްފައިވާ މުހިންމު މަސައްކަތްތައް އެއްތަނަކުން ބަލައިލެވޭނެހެން ޑިޖިޓަލް ފޮތެއްގެ ގޮތުގައި އެކުލަވާލައި ނެރެފި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ދިވެހީންގެ ސަރުކާރަށް އަހަރުތަކެއް ފުރުމުގެ މުނާސަބަތުގައި މިރޭ ހުޅުމާލޭގައި ބޭއްވި ޚާއްޞަ ޖަލްސާގައި ވާހަކަފުޅުދައްކަވަމުންނެވެ. މި ޖަލްސާގައި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި ދައުލަތުގެ ވަޒީރުންނާއި އިސް ވެރިންގެ އިތުރުން ގިނަ ޢަދަދެއްގެ ޢާންމު ރައްޔިތުން ބައިވެރިވެވަޑައިގެންނެވިއެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ކޮންމެ ކަމެއްގައިވެސް އެދެވޭ ނަތީޖާއެއް ނެރެވޭނީ ބުރަ މަސައްކަތް ކޮށްގެން ކަމަށެވެ. އަދި ވޭތުވެދިޔަ މުއްދަތުގައި ސަރުކާރުން ކޮށްފައިވާ މަސައްކަތްތަކާ ގުޅޭގޮތުން މުޅި ރޭ ފަތިސް ވަންދެން ވާހަކަދެއްކިޔަސް އެ ވާހަކަތައް ކިޔައި ނުނިމޭނެ ކަމަށް އެމަނިކުފާނު ފާހަގަކުރެއްވިއެވެ. އެހެންކަމުން، ސަރުކާރުގެ ދެފުށް ފެންނަ ސިޔާސަތުގެ ދަށުން، 156 ހަފުތާގެ މަސައްކަތްތަކުގެ ތަފްޞީލުތައް ހިމަނައިގެން ޑިޖިޓަލް ފޮތެއް އެކުލަވާލާފައިވާ ކަމަށާއި، މި ފޮތް ރައީސް އޮފީހުގެ ރަސްމީ ވެބްސައިޓުން މިހާރު ކޮންމެ ރައްޔިތަކަށްވެސް ޑައުންލޯޑް ކުރެވޭނެ ކަމަށް ވިދާޅުވިއެވެ.
ސަރުކާރުގެ މައިގަނޑު ސިޔާސަތުތަކަށް އަލިއަޅުއްވާލައްވަމުން ރައީސް ވިދާޅުވީ، ސަރުކާރުގެ އެންމެ މުހިންމު އަސާސަކީ ހުރިހާ ކަމެއްވެސް މާތްވެގެންވާ އިސްލާމްދީނުގެ އުޞޫލުތަކުގެ މައްޗަށް ބިނާކުރުން ކަމަށެވެ. އަދި ރާއްޖެއަކީ ސައްތައިން ސައްތަ އިސްލާމީ ޤައުމެއްގެ ގޮތުގައި ދެމިއޮތުމުގެ ވަރުގަދަ އަސާސާއެކު ސަރުކާރުން ކުރިއަށްދާނެ ކަމުގެ ޔަޤީންކަން އެމަނިކުފާނު ދެއްވިއެވެ.
ދީނީ ދާއިރާއިން ކުރެވުނު މަސައްކަތްތަކުގެ ތެރެއިން މި ސަރުކާރުން ފެށި އެންމެ މުހިންމު ކަމަކީ އައުޤާފުގެ މަސައްކަތްކަން ފާހަގަކުރައްވައި، ރާއްޖޭގެ އިސްލާމީ ޙަޟާރަތުގައި އައުޤާފަކީ އިޤްތިޞާދީ ގޮތުން މުހިންމު ދައުރެއް އަދާކުރާ ނިޒާމަކަށް ހައްދަވާނެ ކަމަށް ރައީސް ވިދާޅުވިއެވެ. މި ވަޢުދުފުޅުގެ ދަށުން، ދީނީ ކަންކަމަށް ދެމެހެއްޓެނިވި ގޮތެއްގައި އާމްދަނީ ހޯދުމަށްޓަކައި ރާއްޖޭގެ އެކި ސަރަޙައްދުތަކުގައި ހަ އައުޤާފު ޢިމާރާތެއް އެޅުމުގެ ޢަމަލީ މަސައްކަތް އެކި މަރުޙަލާތަކުގައި ކުރިއަށްދާކަން އިސްލާމީ ކަންތައްތަކާ ބެހޭ ވުޒާރާއިންވެސް ވަނީ ހާމަކޮށްފައެވެ. މި ޢިމާރާތްތަކުން ލިބޭ އާމްދަނީ ޚާއްޞަކުރެވޭނީ އެ ސަރަޙައްދުތަކުގެ މިސްކިތްތައް ބެލެހެއްޓުމަށާއި ދީނީ ހޭލުންތެރިކަން އިތުރުކުރުމަށެވެ.
މީގެއިތުރުން، ރާއްޖޭގައި ބިނާކުރެވޭ އެންމެ ބޮޑު މިސްކިތް ހުޅުމާލޭގައި އެޅުމުގެ މަސައްކަތް ހަވާލުކުރެވި، ޢަމަލީ މަސައްކަތް މިހާރު ފެށިފައިވާކަން އެމަނިކުފާނު އިޢުލާނުކުރެއްވިއެވެ. އަދި ޒަކާތުގެ ނިޒާމު ހަރުދަނާކުރުމަށް "މޯލްޑިވްސް ޒަކާތު ހައުސް" އުފައްދަވައި، ޙައްޖުވެރިންނަށް ލުއިފަސޭހަކޮށްދިނުމަށް ސަޢޫދީ ސަރުކާރާ ގުޅިގެން ތަޢާރަފުކުރި "މައްކާ ރޫޓް އިނިޝިއޭޓިވް" ފަދަ މުހިންމު ބަދަލުތައް ކާމިޔާބުކަމާއެކު ގެނެވިފައިވާކަންވެސް ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.

.png?w=3840&q=75)

