މަގުމަތީގެ އެކްސިޑެންޓްތަކުގެ ތަޙުޤީޤުތައް މިހާރަށްވުރެ ހަރުދަނާކޮށް އަވަސްކުރުމަށާއި، ތަޙުޤީޤުތަކުގެ ޞައްޙަކަމާއި ފަންނީ މިންގަނޑުތައް މަތިކުރުމުގެ މަޤްޞަދުގައި "ސްމާޓް ޑްރޯ" ޓްރެފިކް އިންވެސްޓިގޭޝަން ސޮފްޓްވެއަރ ރަސްމީކޮށް ބޭނުންކުރަން ފަށައިފިއެވެ.

މި ސޮފްޓްވެއަރ ތަޢާރަފުކޮށް ބޭނުންކުރަން ފަށާފައިވަނީ ދިވެހި ފުލުހުންގެ ޚިދުމަތުގެ ޓްރެފިކް ޕޮލިސް އެންޑް ރޯޑް މެނޭޖްމަންޓްގެ ދަށުން ހިންގާ ޓްރެފިކް އިންވެސްޓިގޭޝަން ފަންކްޝަނުންނެވެ. "ސްމާޓް ޑްރޯ" އަކީ އެކްސިޑެންޓް ހިނގާ ސަރަޙައްދުތަކުގެ ޑައިގްރާމްތަކާއި ސްކެޗްތައް ފަސޭހަކަމާއެކު އަދި ސީދާކޮށް ކުރެހުމަށް ޚާއްޞަކޮށްގެން ފަރުމާކޮށްފައިވާ ޔޫޒަރ-ފްރެންޑްލީ ސޮފްޓްވެއަރއެކެވެ.

މި ސޮފްޓްވެއަރގައި ހިމެނޭ މުހިންމު ޚާއްޞިއްޔަތުތަކުގެ ތެރޭގައި:

• އިންޓަރސެކްޝަން، ޓީ-ޖަންކްޝަން އަދި ސީދާ މަގުތައް ހިމެނޭހެން ތަފާތު މަގުތަކުގެ ލޭއައުޓްތައް ކުރީބައިގައި ފަރުމާކޮށް ހިމަނާފައިވުން
• އެކި ބާވަތުގެ އުޅަނދުފަހަރާއި، ސައިކަލާއި، ޓްރެފިކް ނިޝާންތަކާއި، މަގުބައްތިތައް ފަދަ ތަޙުޤީޤަށް ބޭނުންވާ މުހިންމު ބައިތަކުގެ ރެޑީމޭޑް ސިމްބަލްތައް އެކުލެވިގެންވުން
• އެކްސިޑެންޓް ހިނގި ސަރަޙައްދުގެ ޙަޤީޤީ މަންޒަރު އެންމެ ސައްޙަކޮށް ދެއްކުމަށްޓަކައި، ގޫގުލް މެޕްސް (Google Maps) އާއި ސެޓެލައިޓް ފޮޓޯތައް ސޮފްޓްވެއަރއަށް އަޅައިގެން ޑައިގްރާމް އެކުލަވާލުމުގެ ފުރުޞަތު އޮތުން

މިއީ ރާއްޖޭގެ މަގުމަތީގެ އެކްސިޑެންޓް ތަޙުޤީޤުކުރުމުގެ މަރުޙަލާތައް ޒަމާނީކޮށް، ތަޙުޤީޤީ ރިޕޯޓުތަކުގެ ފެންވަރު ރަނގަޅުކުރުމަށާއި، ހެކި ރައްކާތެރިކޮށް ޑޮކިއުމެންޓްކުރުން އިތުރަށް ހަރުދަނާކުރުމަށް އެޅުނު މުހިންމު ފިޔަވަޅެކެވެ. މީގެ ސަބަބުން ޓްރެފިކް މައްސަލަތައް ނިންމުމުގެ އޮޕަރޭޝަނަލް ދުވެލި ވަރަށް ބޮޑަށް އަވަސްވެގެންދާނެއެވެ.

ރާއްޖޭގެ އެކި ކަންކޮޅުތަކުގައި ފުލުހުން ފޯރުކޮށްދޭ ޚިދުމަތްތައް ހަރުދަނާކުރުމަށްޓަކައި، ޒަމާނީ ޓެކްނޮލޮޖީއާއި އައު ވަސީލަތްތައް ތަޢާރަފުކުރުމަށް ފުލުހުންގެ ޚިދުމަތުން އަންނަނީ މެދުކެނޑުމެއް ނެތި ގިނަ މަސައްކަތްތަކެއް ކުރަމުންނެވެ.