މާލޭ ސިޓީގެ ގެއަކުން ފެން މީޓަރެއް ވަގަށް ނެގި މައްސަލައެއްގައި އއ. ތޮއްޑޫ މީހެއްގެ މައްޗަށް އުފުލި ވައްކަމުގެ ދައުވާ ސާބިތުވެ، އޭނާ ޖަލައްލުމުގެ ބަދަލުގައި ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފިއެވެ.

ޕްރޮސިކިއުޓާ ޖެނެރަލް (ޕީޖީ) އޮފީހުން ކޯޓަށް ހުށަހެޅި ދައުވާގައިވާ ގޮތުން، އޭނާ ފެން މީޓަރު ވަގަށް ނަގާފައިވަނީ މި އަހަރުގެ އެޕްރީލް 16 ވަނަ ދުވަހުގެ ހަވީރު 4:00 ހާއިރު، އޯކިޑްމަގުގައި ހުންނަ މ. މާކޮޅުގެއިންނެވެ. 

މި މައްސަލައިގެ ޝަރީއަތުގެ އަޑުއެހުމުގައި އޭނާ ވަނީ ދައުވާއަށް އަމިއްލައަށް އިއުތިރާފުވެފައެވެ. އެހެންވެ، އޭނާގެ އިއުތިރާފުގެ މައްޗަށް ބިނާކޮށް ކޯޓުން ވަނީ ކުށް ސާބިތުވާ ކަމަށް ކަނޑައަޅައިފައެވެ.

މި ކުށުގެ އަސާސީ އަދަބަކީ ޖަލަށްލުން ކަމަށްވާތީ، މައްސަލައިގެ ކަންކަމަށް ރިއާޔަތްކުރުމަށް ފަހު ކޯޓުން ފުރަތަމަ ކަނޑައެޅީ ތިން މަހާއި 18 ދުވަހުގެ ޖަލު އަދަބެކެވެ.

ނަމަވެސް، އޭނާއަކީ ވަޒީފާއެއްގައި އުޅޭ މީހަކަށްވާތީ އާއި، ޖަލު އަދަބުގެ ބަދަލުގައި ޖޫރިމަނާގެ އަދަބެއް ދިނުމަށް އެދިފައިވާތީ، ގާނޫނުލްއުގޫބާތާއި ސުޕްރީމް ކޯޓުގެ އުސޫލުތަކުގެ ދަށުން އަދަބު ވަނީ ޖޫރިމަނާއަށް ބަދަލުކޮށްދީފައެވެ.

ކްރިމިނަލް ކޯޓުގެ އިސް ގާޒީ އާދަމް މުހައްމަދު ކުރެއްވި ހުކުމުގައި ވަނީ ޖަލު އަދަބުގެ ބަދަލުގައި 21،600 ރުފިޔާއިން ޖޫރިމަނާކުރުމަށެވެ. މި ފައިސާ މި މަހުގެ އެއް ވަނަ ދުވަހުން ފެށިގެން 12 މަސް ދުވަހުގެ ތެރޭގައި މީރާއަށް ދެއްކުމަށް ކަނޑައަޅައި އެ މުއްދަތުގައި ފައިސާ ނުދައްކައިފިނަމަ، އަލުން ޖަލު އަދަބު ތަންފީޒު ކުރަން ޖެހޭނެ ކަމަށް ވެސް ބުނެފައިވެއެވެ.ަ