ދިވެހި ފުލުހުންގެ ޚިދުމަތުގެ ރަސްމީ ތަރުޖަމާނުގެ މަގާމަށް އިންސްޕެކްޓަރ އޮފް ޕޮލިސް އަޙްމަދު ޝިޔާމް ހަމަޖައްސަވައިފިއެވެ.

ފުލުހުންގެ މީޑިއާ އޮފިޝަލަކު މައުލޫމާތު ދެއްވި ގޮތުގައި، މި މަގާމަށް އިންސްޕެކްޓަރ އޮފް ޕޮލިސް އަޙްމަދު ޝިޔާމް ހަމަޖައްސަވާފައި ވަނީ 4 އޮކްޓޫބަރު 2026 އިން ފެށިގެންނެވެ.

ޝިޔާމް މި މަގާމާ ހަވާލުވެވަޑައިގެންނެވީ، މީގެ ކުރިން ފުލުހުންގެ ތަރުޖަމާނުގެ މަސްއޫލިއްޔަތު އަދާކުރައްވަމުން ގެންދެވި ސުޕްރިންޓެންޑެންޓް އޮފް ޕޮލިސް އާރިފްގެ ބަދަލުގައެވެ.

ފުލުހުންގެ އިދާރާއަށް ގެނައި މި ބަދަލާ ގުޅިގެން، ދިވެހި ފުލުހުންގެ ޚިދުމަތުގެ ފަރާތުން މީޑިއާތަކަށް ރަސްމީކޮށް މައުލޫމާތު ދެއްވުމާއި، އާންމު ހޭލުންތެރިކަން އިތުރުކުރުމުގެ މުއާމަލާތްތަކުގައި އެންމެ އިސްކޮށް ދެން ހަރަކާތްތެރިވެވަޑައިގަންނަވާނީ އިންސްޕެކްޓަރ އޮފް ޕޮލިސް އަޙްމަދު ޝިޔާމެވެ.

ފުލުހުންގެ ޚިދުމަތުން އަންނަނީ މީޑިއާތަކާ އޮންނަ ގުޅުން އިތުރަށް ހަރުދަނާކޮށް، ރައްޔިތުންނަށް ތެދު އަދި އަވަސް މައުލޫމާތު ފޯރުކޮށްދިނުމަށް ގިނަ މަސައްކަތްތަކެއް ކުރަމުންނެވެ.

ފުލުހުންގެ ތަރުޖަމާނަކަށް އިސްކުރި އަޙުމަދު ޝިޔާމަކީ ފުލުހުންގެ ވަޒީފާއިން ވަކިކުރިތާ 12 އަހަރު ފަހުން، އިންސްޕެކްޓަރ އޮފް ޕޮލިސްގެ މަގާމުގެ ވަޒީފާ އަލުން ދިނުމަށް ހައިކޯޓުން ޙުކުމްކުރުމާ ގުޅިގެން ވަޒީފާ އިޔާދަވެފައިވާ ފަރާތެކެވެ.

ނޯތު ޕޮލިސް ޑިވިޜަންގެ ކޮމާންޑަރަކަށް ހުންނަވަނިކޮށް، މަޤާމުގެ ނުފޫޒު ބޭނުންކުރިކަމުގެ ތުހުމަތުގައި ޝިޔާމް ވަޒީފާއިން ވަކިކުރީ 2012 ވަނަ އަހަރުގައެވެ. މި މައްސަލަ ފުރަތަމަ ސިވިލް ކޯޓަށް ހުށަހެޅުމުން، އެ ކޯޓުން ނިންމާފައިވަނީ އޭނާއަށް އަލުން ވަޒީފާ ދޭންޖެހޭނެ ފަދަ ސަބަބެއް ނެތް ކަމަށެވެ.

ނަމަވެސް، އެ ނިންމުން ހައިކޯޓުގައި އިސްތިއުނާފު ކުރުމުން ކުރި ޙުކުމުގައި ބަޔާންކޮށްފައިވަނީ، ޝިޔާމް ވަޒީފާއިން ވަކިކުރުމަށް ފުލުހުންގެ ޑިސިޕްލިނަރީ ބޯޑުން ނިންމިއިރު ރިޢާޔަތްކުރި ހެކިތަކަކީ ކޮބައިކަން ދައުލަތަށް ކޯޓުގައި ސާބިތުކޮށްދެވިފައި ނުވާ ކަމަށެވެ. އަދި އެކަށީގެންވާ މިންވަރަށް ތަޙުޤީޤެއް ހިންގާފައިވާކަން ދައުލަތަށް ބުނެދެވިފައި ނުވާކަންވެސް ޙުކުމުގައި ފާހަގަކޮށްފައިވެއެވެ.

ހައިކޯޓުގެ ޙުކުމުގައި އިތުރަށް ބުނެފައިވަނީ، ވަޒީފާއިން ވަކިކުރީ މަޤުބޫލު ސަބަބެއް އޮވެގެންކަން ސާބިތުކޮށްދިނުމުގެ ޒިންމާ އޮންނާނީ ވަޒީފާދޭ ފަރާތަށް ނުވަތަ ދައުލަތަށް ކަމަށެވެ. އަދި ފުލުހުންގެ ވަޒީފާއާ ގުޅޭ މައްސަލަތަކުގައި ކޯޓުން ބަލަންޖެހޭނީ ޑިސިޕްލިނަރީ ބޯޑުން އެކަށީގެންވާ ތަޙުޤީޤެއް ހިންގައި، ބޭނުންވާ މިންވަރަށް ހެކި ހޯދާފައިވޭތޯ ކަމަށް ސުޕްރީމް ކޯޓުގެ ކުރީގެ ނިންމުންތަކާ ހަވާލާދީ ހައިކޯޓުގެ ޙުކުމުގައި ބަޔާންކޮށްފައިވެއެވެ.

ނަމަވެސް، އެކަން ސާބިތުކޮށްދެވޭނެ އެކަށީގެންވާ ހެއްކެއް ދައުލަތަށް ހުށަހެޅިފައި ނުވާތީ، ޑިސިޕްލިނަރީ ބޯޑުގެ ނިންމުން ބާތިލުކުރަންޖެހޭ ކަމަށް އެ ހުކުމުގައި ބަޔާންކޮށްފައިވެއެވެ.

އެހެންކަމުން، ޝިޔާމަށް އަލުން ވަޒީފާ އިއާދަކޮށްދިނުމަށާއި، ވަޒީފާއިން ވަކިކުރި ތާރީޚުން ފެށިގެން އަލުން ވަޒީފާ ހަމަޖެހުމާ ހަމައަށް ލިބެންޖެހޭ މުސާރަ އާއި އިނާޔަތްތައް ދިނުމަށް ތިން ފަނޑިޔާރުންގެ އިއްތިފާގުން ކުރެއްވި ހުކުމުގައި އަމުރުކޮށްފައިވެއެވެ.