ދޮގު މަޢުލޫމާތާއި ފިތުނަ ފެތުރުމުން ދުރުހެލިވުމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) އިން ގޮވާލައިފިއެވެ..

އެމްއެމްބީސީ އިން މިހެން ގޮވާލީ ރާއްޖޭގެ ބްރޯޑްކާސްޓިންގ ދުވަހުގެ މުނާސަބަތުގައި ނެރުނު ބަޔާނުގައެވެ.

އެ ބަޔާނުގައި ބުނީ، އިސްލާމީ ރިވެތި އަޚްލާޤާއި ދިވެހި ޤައުމިއްޔަތު ދަމަހައްޓައި، ރައްޔިތުންނަށް ޞައްޙަ މަޢުލޫމާތު ފޯރުކޮށްދިނުމަކީ ބްރޯޑްކާސްޓަރުންގެ ބޮޑު ޤައުމީ ޒިންމާއެއް ކަމަށެވެ. އަދި ޤައުމުގެ އިޖުތިމާޢީ، ސިޔާސީ ހޭލުންތެރިކަން އިތުރުކުރުމުގައި މީޑިއާގެ ދައުރު ވަރަށް ބޮޑުކަން ވަނީ ފާހަގަކޮށްފައެވެ.

ރާއްޖޭގައި ބްރޯޑްކާސްޓިންގ ޚިދުމަތް 1962 ގައި "މާލެ ރޭޑިއޯ" އިން ފެށިގެން އައި ދިގު ތާރީޚަށް އަލިއަޅުވާލަމުން އެމްއެމްބީސީން ބުނީ، މިއަދު ރާއްޖޭގައި 37 ބްރޯޑްކާސްޓަރުންނާއި 29 ރީބްރޯޑްކާސްޓަރުން ޚިދުމަތް ދެމުން އަންނަ ކަމަށެވެ. އަދި އައު ޤާނޫނުތަކާއެކު މީޑިއާގެ ދާއިރާއަށް ބޮޑެތި ޒަމާނީ ކުރިއެރުންތަކެއް އައިސްފައިވާ ކަމަށް ބަޔާނުގައިވެއެވެ.

މީގެއިތުރުން، ފަންނީ ގޮތުން ނޫސްވެރިން ބާރުވެރިކުރުވުމަށާއި، ދާއިރާގެ މަސައްކަތްތެރިންގެ ޙައްޤުތައް ޙިމާޔަތްކުރުމަށް ކޮމިޝަނުން އަބަދުވެސް މަސައްކަތް ކުރާނެ ކަމުގެ ޔަޤީންކަން އެމްއެމްބީސީން ވަނީ ދީފައެވެ. އަދި ޤާނޫނީ އިމުގެ ތެރެއިން މިނިވަން، ޒިންމާދާރު ނޫސްވެރިކަމެއްގެ ވެށި ޤާއިމުކުރުމަކީ މައިގަނޑު އަމާޒު ކަމަށްވެސް އެ ކޮމިޝަނުން ހާމަކުރިއެވެ.

މީގެއިތުރުން ބްރޯޑްކާސްޓިން ދާއިރާ ތަރައްގީކޮށް، ދާއިރާގެ މަސައްކަތްތެރިންގެ ހައްގުތައް ރައްކާތެރި ކުރުމަށް ކޮމިޝަނުން ކުރަމުންދާ މަސައްކަތްތައް ހުއްޓުމެއްނެތި ކުރިއަށްދާނެ ކަމުގެ ޔަގީންކަން އެ ކޮމިޝަނުން ވަނީ ދީފައެވެ.