ފަތުރުވެރިކަމުގެ ދާއިރާގެ ހިއްސާދާރުންނާއި ބައިނަލްއަޤްވާމީ ޓްރެވަލް ޕާޓްނަރުން ފާޅުކުރި ކަންބޮޑުވުންތަކާ ގުޅިގެން، އެންމެ ފަހުން ތަޢާރަފުކުރި "ޑެސްޓިނޭޝަން ޕްރިންސިޕަލް ޓީޖީއެސްޓީ" އުސޫލަށް ބަދަލުތަކެއް ގެންނެވުމަށް ސަރުކާރުން ނިންމެވި ނިންމެވުމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާސް (މަޓާޓޯ) އިން މަރުޙަބާ ކިޔައިފިއެވެ.

ފަތުރުވެރިކަމާ ބެހޭ ވަޒީރު މުޙައްމަދު އަމީން ވަނީ، މި އުސޫލު ތަންފީޒުކުރުމާ ގުޅޭގޮތުން ފަތުރުވެރިކަމުގެ ދާއިރާގެ ހިއްސާދާރުންނާއި ޓްރެވަލް އެޖެންޓުން ފާޅުކުރި ކަންބޮޑުވުންތަކަށް ރިއާޔަތްކުރައްވައި، އެ އުސޫލަށް ބަދަލުތަކެއް ގެންނެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާކަން ކަށަވަރުކޮށްދެއްވާފައެވެ.

މަޓާޓޯ އިން ބުނީ ސިނާޢަތުގެ ކަންބޮޑުވުންތަކަށް އަޑުއައްސަވައި، އިޖާބަ ދެއްވުމަށް ސަރުކާރުން އިސްނެންގެވި އިސްނެންގެވުމަށް މާޓާޓޯއިން ޝުކުރު އަދާކުރާ ކަމަށެވެ. އަދި ފާއިތުވި ހަފުތާތަކުގައި މަޓާޓޯއިން ވަނީ ރާއްޖެއާއި ރާއްޖެއިން ބޭރުގެ ހިއްސާދާރުންނާ މަޝްވަރާކޮށް، މި ބަދަލުތަކުގެ ސަބަބުން ވިޔަފާރިއަށާއި އޮޕަރޭޝަންތަކަށް ކުރާނެ އަސަރުތައް ދެނެގަތުމަށް މުޅި ސިނާޢަތް ޝާމިލުވާ ސަރވޭއެއް ވަނީ ކުރިއަށް ގެންގޮސްފައި ކަމަށެވެ.

"މިއީ ވަރަށް އެދެވޭ އަދި މުހިންމު ފިޔަވަޅެއްގެ ގޮތުގައި އަޅުގަނޑުމެން ދެކެން. ފަތުރުވެރިކަމުގެ ދާއިރާއަށް އަބަދުވެސް ކުރިއެރުން ލިބިފައިވަނީ ސަރުކާރާއި ސިނާޢަތުގެ ބައިވެރިން ގުޅިގެން، މަޝްވަރާއާއި ބައްދަލުވުންތަކުގެ ތެރެއިން މަސައްކަތް ކުރުމުން. ދައުލަތަށް ލިބޭ އާމްދަނީ ރައްކާތެރިކުރުމާއެކު، ބައިނަލްއަޤްވާމީ މާރކެޓްތަކުގައި ރާއްޖެއަކީ ވާދަވެރި އަދި އިޝްތިހާރުކުރަން ފަސޭހަ މަންޒިލެއްގެ ގޮތުގައި ދެމިއޮތުން ކަށަވަރުކުރެވޭނެ ހަމަހަމަ އުސޫލެއް އެކުލަވާލުމުގައި ސަރުކާރަށް އެއްބާރުލުން ދިނުމަށް މާޓާޓޯ އޮތީ ތައްޔާރަށް،" ސެކްރެޓަރީ ޖެނެރަލް ސުޢޫދު ވިދާޅުވިއެވެ.ހުށަހެޅިފައިވާ އިސްލާޙުތައް އެކުލަވާލުމުގެ މަސައްކަތް ކުރިއަށްދާއިރު، ސަރުކާރާއި، މީރާއާއި، ރާއްޖޭގެ ފަތުރުވެރިކަމުގެ ދާއިރާގެ ހިއްސާދާރުންގެ އިތުރުން ބައިނަލްއަޤްވާމީ ޓްރެވަލް ޕާޓްނަރުންނާއެކު އިތުރު މަޝްވަރާތައް ކުރުމަށް މާޓާޓޯއިން އުއްމީދުކުރެއެވެ.