ޓެކްސީގެ ޚިދުމަތަކީ ދިވެހިރާއްޖޭގެ، ޚާއްޞަކޮށް މާލެ ސަރަޙައްދުގެ ދަތުރުފަތުރުގެ ނިޒާމުގައި އެންމެ މުހިންމު އެއް ޚިދުމަތެވެ. މި ޚިދުމަތަކީ ހަމައެކަނި ވިޔަފާރިއެއްގެ އިތުރުން، އޯގާތެރިކަމާއި އިޙްސާންތެރިކަން އިސްކުރަންޖެހޭ އިޖުތިމާޢީ ޚިދުމަތެއް ވެސް މެއެވެ. ނަމަވެސް، ދާދިފަހުން ހުޅުމާލެއިން މާލެއަށް ދަތުރުކުރި ޓެކްސީއެއްގެ ތެރޭގައި ހިނގައިދިޔަ ހިތާމަވެރި ހާދިސާއަކުން ފެނިގެންދިޔައީ، ބައެއް ޚިދުމަތްތެރިންގެ ކިބައިގައި ހުންނަންޖެހޭ އިންސާނިއްޔަތުކަމުގެ ސިފަ ކުޑަވެ، ހަމައެކަނި މާއްދިއްޔަތަށް އިސްކަންދެވޭ މަންޒަރެވެ.

މި ހާދިސާ ހިނގާފައިވަނީ ކ. މާފުއްޓަށް ދިއުމަށްޓަކައި އެއް އަހަރުގެ ތުއްތު ކުއްޖަކާއި، އިތުރު ދެ ކުދިން ގޮވައިގެން ހައްވާ މުޙައްމަދު ނަމަކަށް ކިޔާ މަންމައަކު "ނަލަ ޓެކްސީ" މެދުވެރިކޮށް ދަތުރުކުރަމުން ދަނިކޮށެވެ. މާލޭގެ 6 ނަންބަރު ޖެޓީއަށް ދިއުމަށް ހަވީރު 4:40 ހާއިރު ނެގި މި ދަތުރުގައި، ސިނަމާލެ ބްރިޖުން މާލެއަށް އަރަން ކުޑަތަންކޮޅަކަށް ވެފައި ވަނިކޮށް، އުނގުގައި އިން އެއް އަހަރުގެ ކުއްޖާއަށް ކުއްލިއަކަށް ހޮޑުލެވުނެވެ. އެއީ އެއްވެސް މީހެއްގެ ބާރު ފޯރާނެ ކަމެއް ނޫން ކަމުގައި ވިޔަސް، އަދި ހޮޑުލެވިފައި ހުރީ މައިގަނޑު ގޮތެއްގައި މަންމަ އާއި ކުއްޖާގެ ގައިގައި ކަމަށް ވީއިރު ވެސް، ޑްރައިވަރުގެ ފަރާތުން ފެނިގެންދިޔައީ ހިތްދަތި އަމަލުތަކެކެވެ.

ހާދިސާ ހިނގި ވަގުތު އެހީތެރިކަމުގެ އަތެއް ދިއްކޮށްލުމުގެ ބަދަލުގައި، ކާރުގައި ހުރި ޓިޝޫކޮޅު ވެސް ނުދީ، ޑްރައިވަރު ވަގުތުން ޑިމާންޑް ކުރީ ކާރު ސާފުކުރުމުގެ އަގަށް 1،500 ރުފިޔާ ދިނުމަށެވެ. އެއީ ވާހަކަ ނުދެއްކޭ ވަރުގެ ތުއްތު ކުއްޖެއް ކަމާއި، މީގެ ކުރިން ދުވަހަކު ވެސް ދަތުރުމަތީގައި އެފަދަ ކަމެއް ދިމާނުވާ ކަމަށް ބުނެ މަންމަ އާދޭސް ކުރުމުން ވެސް ޑްރައިވަރު ދޫނުދިނެވެ. އަދި ފެރީ ފުރަން ކުޑަވަގުތުކޮޅަކަށް ވެފައި ވަނިކޮށް، ފައިސާ ނުދީފާނެ ކަމުގެ ބިރަށް ގަސްދުގައި ކާރު މަޑުން ދުއްވި ކަމަށް ވެސް މަންމަ ބަޔާންކުރެއެވެ.

މި މައްސަލައިގައި ފިރިމީހާ ފޯނުން ގުޅައި ޒިންމާ ނަގާނެ ކަމުގެ ޔަގީންކަން ދިނުމުން އަދި މަންމަ ކުރި ޝަކުވާތަކާ ގުޅިގެން ފަހުން އަގު 1،000 ރުފިޔާއަށް ކުޑަކުރިއެވެ. އަދި އެ މަންމަ ވަނީ ފަހުން އެ ފައިސާ ޑްރައިވަރުގެ އެކައުންޓަށް ޖަމާކޮށްދީފައެވެ. ނަމަވެސް ގަރާޖުން ކާރު ދޮވުމަށް ދިޔަ ޚަރަދުގެ އެއްވެސް ބިލެއް ޑްރައިވަރު ފޮނުވާފައެއް ނުވެއެވެ. މި ހާދިސާގެ ވާހަކަ ސޯޝަލް މީޑިއާގައި ހިއްސާކުރަން ޖެހުނީ، އެކަނިވެރި އަންހެނަކު ކުދިންތަކެއް ގޮވައިގެން ހާލުގައި ޖެހުނު ވަގުތު ޑްރައިވަރުގެ ފަރާތުން ފެނުނު ރަހުމުކުޑަ އަދި ބޭއިންސާފު އަމަލުތަކުގެ ސަބަބުން ކަމަށް ކުއްޖާގެ މަންމަ ފާހަގަކުރިއެވެ.

މިފަދަ ހާދިސާތަކަކީ ޓެކްސީ ޚިދުމަތް ދޭ ފަރާތްތަކުގެ އަޚްލާޤާއި، ޚިދުމަތުގެ ފެންވަރާމެދު ސުވާލު އުފެދޭ ކަންކަމެވެ. ވިޔަފާރީގެ މަންފާއަށް ވުރެ އިންސާނިއްޔަތުކަމާއި އިޙްތިރާމް އިސްކުރަންޖެހެއެވެ. ޚާއްޞަކޮށް ކުޑަކުދިންނާއި އަންހެނުންނަށް ދިމާވާ ކުއްލި ހާލަތްތަކުގައި ހަމްދަރުދީވެ، އެހީތެރިވުމަކީ މުޖުތަމަޢުގެ ކޮންމެ ފަރުދެއްގެ ކިބައިގައި ވެސް ހުންނަންޖެހޭނެ މަތިވެރި ސިފައެކެވެ. މިފަދަ ކަންކަން ތަކުރާރު ނުވާނެހެން ޓެކްސީ ސެންޓަރުތަކުންނާއި ކަމާބެހޭ އިދާރާތަކުން ފިޔަވަޅު އަޅައި، ޚިދުމަތުގެ މިންގަނޑުތައް ހަރުދަނާކުރުމަކީ ނުހަނު ބޭނުންތެރި ކަމެކެވެ.