ށ. އަތޮޅު ނޫމަރާގައި ހުންނަ އެ ރަށު ޞިއްޙީ މަރުކަޒުގައި ލެބޯޓަރީ ގާއިމުކޮށް ޚިދުމަތް ފަށައިފިއެވެ.

އެރަށުގައި ލެބޯޓަރީގެ ޚިދުމަތް ފައްޓަވައިދެއްވީ، މިއަދު އެ ރަށުގައި އޮތް ހާއްސަ ރަސްމިއްޔާތެއްގައި، ޞިއްޙަތާއި ޢާއިލާއާއި އިޖްތިމާޢީ އެހީއާއި ބެހޭ ވަޒީރު ޤީލާ ޢަލީއެވެ.

މި ރަސްމިއްޔާތުގައި ޞިއްޙީ ވަޒީރު ޤީލާ ޢަލީގެ އިތުރުން ޞިއްޙީ ވުޒާރާގެ އިސްވެރިންނާއި، ނޫމަރާގެ ކައުންސިލްގެ އިސްވެރިންނާއި، ސިއްޙީ މަރުކަޒުގެ އިސްވެރިން ބައިވެރިވެ ވަޑައިގެންނެވިއެވެ.

ލެބޯޓަރީ ހުޅުވައިދެއްވުމަށް ފަހު ވަޒީރު ވަނީ އެތަން ބައްލަވާލައްވައި، ޞިއްޙީ މަރުކަޒުގެ މުވައްޒަފުންނާއި އިސްވެރިންނާއި ބައްދަލު ކުރައްވާފައެވެ.

ނޫމަރާގެ ޞިއްޙީ ޚިދުމަތް އިތުރަށް ފުޅާކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރު ނޫމަރާއަށް ވަޑައިގެން އެރަށު ރައްޔިތުންނާ ބައްދަލުކުރައްވާ ވަނީ ވިދާޅުވެފައެވެ.

ނޫމަރާ ރައްޔިތުންނާއެކު ބޭއްވެވި ބައްދަލުކުރެއްވުމުގައި ޞިއްޙީ ދާއިރާއަކީ މުހިންމު ދާއިރާއެއްކަން ފާހަގަކުރައްވާ ރައީސް ޑރ. މުޢިއްޒު ވަނީ ޞިއްޙީ ދާއިރާއިން މީހުން ބިނާކުރުމަށް ސަރުކާރުން އިސްކަންދެއްވާކަމަށާއި، ވަސީލަތްތައް އިތުރުކުރުމަށް މަސައްކަތް ކުރަމުންދާކަން ފާހަގަކުރައްވާފައެވެ.

ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ޤާއިމުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ރިޔާސީ ވަޢުދުފުޅެކެވެ. މިހާތަނަށް ލެބޯޓަރީގެ ޚިދުމަތް ލިބެން ނެތް 76 ރަށެއްގައި މި ޚިދުމަތް ޤާއިމުކުރުމުގެ މަސައްކަތް ސަރުކާރުން މިހާރު ދަނީ ވަރަށް ބާރު ސްޕީޑެއްގައި ކުރިއަށް ގެންދަމުންނެވެ.