ކޮންމެ އަހަރެއްގެ ވެސް މުދައްރިސުންގެ ދުވަހު، ސްކޫލުތަކުގެ ގޯތިތެރެއިންނާއި ސޯޝަލް މީޑިއާއިން ފެންނަނީ ކުލަގަދަ މާބޮނޑިތަކާއި، ކާޑުތަކާއި، ޝުކުރުގެ ހޫނު މެސެޖުތަކެވެ. އެއީ މުދައްރިސުންގެ ޚިދުމަތުގެ އަގު ވަޒަންކުރުމަށް ދަރިވަރުންނާއި ބެލެނިވެރިން ކުރާ ވަރަށް އަގުހުރި، ލޮބުވެތި ކަމެކެވެ.

ނަމަވެސް، މި އުފާވެރި މުނާސަބަތުގެ ކުލަގަދަކަމުގެ ފަހަތުގައި އޮތީ ހަމައެކަނި އަހަރަކު އެއް ދުވަހު ދޭ ހަދިޔާއަކުން ނުވަތަ ޝުކުރެއްގެ ބަހަކުން ހައްލުނުވާނެ ފަދަ ބޮޑު އިޖުތިމާއީ އަދި ނަފްސާނީ ހަގީގަތެކެވެ. އެއީ ދުވަހުން ދުވަހަށް ބުރަވަމުންދާ ޒިންމާތަކާއި، ކްލާސްރޫމުން ބޭރުގައި މުދައްރިސުންނާއި އެ މީހުންގެ އާއިލާތަކުން އުފުލަންޖެހިފައިވާ ހިމޭން ތަކުލީފުތަކެވެ.

އާންމުކޮށް ގިނަ ބަޔަކަށް ހީވެފައި އޮންނަނީ ޓީޗަރެއްގެ މަސައްކަތަކީ ހެނދުނު ނުވަތަ މެންދުރު ދަންފަޅިއަށް ސްކޫލަށް ގޮސް، ދަންފަޅި ނިމެންދެން ފޮތުގައި އޮންނަ ފިލާވަޅު ކިޔަވައިދިނުން އެކަނި ކަމަށެވެ. އެހެންނަމަވެސް، ހަގީގަތަކީ ކްލާސްރޫމުގައި ކިޔަވައިދޭ މަދު ގަޑިއިރުތަކަށްވުރެ އެތައް ގުނައެއް ބުރަ މަސައްކަތްތަކެއް ސްކޫލުގެ ރަސްމީ ވަގުތުން ބޭރުގައި ޓީޗަރުން ކުރަންޖެހުމެވެ. ދަންވަރު ވަންދެން ލެސަން ޕްލޭންތައް ތައްޔާރުކުރުމާއި، އެތައް ސަތޭކަ ފޮތްތަކާއި އިމްތިހާނު ކަރުދާސްތައް މާކުކުރުމާއި، އިދާރީ ގޮތުން ފުރަންޖެހޭ ޕޯޓަލްތަކާއި ރިޕޯޓުތަކުގެ ބުރައިގެ އިތުރުން ވައިބަރ ގްރޫޕްތަކާއި ފޯންކޯލުތަކުގެ ޒަރީއާއިން ބެލެނިވެރިންގެ ސުވާލުތަކަށް ޖަވާބުދިނުމަކީވެސް އިންތިހާއަށް ބޮޑަތި މަސްއޫލިއްޔަތުތަކެކެވެ. މީގެ ސަބަބުން ވަޒީފާއާއި އަމިއްލަ ދިރިއުޅުމާ ދެމެދު އޮންނަންޖެހޭ ރޮނގު މުޅިން ފުހެވިގެންދާ ފަހަރު ވަރަށް ގިނައެވެ.

މި ބުރަ މަސައްކަތުގެ ތެރެއިން އެންމެ ހިތާމަވެރި އަނެއް ކަމަކީ، ޓީޗަރުންގެ އަމިއްލަ އާއިލާއަށް މީގެ ސަބަބުން ކުރާ ފުން އަސަރެވެ. ސްކޫލުގައި ތިބޭ ކުދިންނަކީ އެ މީހުންގެ "ދެވަނަ އާއިލާ" ކަމުގައި ދެކި، އެ ކުދިންގެ ކުރިމަގަށްޓަކައި މުޅި ހިތާއި ރޫހުން ޓީޗަރުން މަސައްކަތް ކުރަމުންދާއިރު، އަމިއްލަ ދަރިންނާއި، ބައިވެރިޔާއަށް އަދި މައިންބަފައިންނަށް ދޭންޖެހޭ އަސާސީ ވަގުތު ގެއްލެމުންދާކަން ގިނަ ފަހަރަށް ޚުދު ޓީޗަރުންނަށް ވެސް ރޭކާނުލައެވެ.

ގެއަށް އައިސް ވެސް ސްކޫލުގެ ކަރުދާސްތަކާއި ލެޕްޓޮޕްގެ ސްކްރީންތަކަށް ގެއްލިފައި ތިބެންޖެހުމުގެ ސަބަބުން، އަމިއްލަ ދަރިންގެ ވާހަކަތައް އަޑުއަހާލާނެ ހަކަތައެއް ނުވަތަ އާއިލާއާއެކު ހޭދަކޮށްލާނެ ހަމަޖެހޭ ވަގުތުކޮޅެއް ގިނަ ފަހަރަކު ނޯވެއެވެ. އަނެކުންގެ ދަރިން ބިނާކުރުމުގެ ބުރަ ޒިންމާގެ ތެރޭގައި ތިމާގެ އަމިއްލަ އާއިލާ އިހުމާލުވަމުންދާ ހިތި ހަގީގަތް އިހުސާސްވާއިރު އޮންނަނީ ވަގުތު ފާއިތުވެފައެވެ.

މުދައްރިސުން މިއަދު ތަހައްމަލުކުރަމުންދާ މި ބޮޑު "ބާންއައުޓް" އަކީ ހަމައެކަނި ވަރުބަލިކަމެއް ނޫނެވެ. މިއީ އެ މީހުންގެ ޖިސްމާނީ ދުޅަހެޔޮކަމާއި އާއިލީ ގުޅުންތައް ރޫޅިގެންދާ ފަދަ ބޮޑު އިޖުތިމާއީ މައްސަލައެކެވެ.

ތައުލީމީ ދާއިރާގައި ދިވެހި ޓީޗަރުން ދެމެހެއްޓުމަށާއި، މި ޚިދުމަތުގެ ފެންވަރު މަތިކުރުމަށްޓަކައި މުދައްރިސުންނަށް މިއަދު ބޭނުންވަނީ ހަމައެކަނި އަހަރަކު އެއް ފަހަރު ލިބޭ ތައުރީފުގެ ބަސްތަކެއް ނޫނެވެ. ބޭނުންވަނީ ބުރަތައް ކުޑަކޮށްދީ، ގޭތެރެއަށް ސްކޫލުގެ މަސައްކަތްތައް ގެންދަން ނުޖެހޭނެ ފަދަ ނިޒާމީ ލުއިތަކެކެވެ.

މުދައްރިސުންގެ ދުވަހުގެ ހަގީގީ މާނައަކީ، ގައުމުގެ ޖީލުތައް ބިނާކުރަން ހަދިޔާކުރާ އެ މަތިވެރި ހިދުމަތްތެރިންގެ އަމިއްލަ އާއިލީ އުފަލާއި ނަފްސާނީ ދުޅަހެޔޮކަން، އަހަރުގެ ހުރިހާ ދުވަހަކު ވެސް ހިމާޔަތްކޮށްދިނުމެވެ.