ށ. މަރޮށީ ޞިއްޙީ މަރުކަޒުގައި ލެބޯޓަރީގެ ޚިދުމަތް ރަސްމީކޮށް ފަށައި، އެ މަރުކަޒުން ދެމުންދާ ޚިދުމަތްތައް 24 ގަޑިއިރަށް ބަދަލުކޮށްފިއެވެ.

މިކަމަށްޓަކައި ބޭއްވި ޚާއްޞަ ރަސްމިއްޔާތުގައި މި ޚިދުމަތްތައް ރަސްމީކޮށް އިފްތިތާޙުކޮށްދެއްވީ މިނިސްޓަރ އޮފް ހެލްތު ޢަބްދުﷲ ނާޡިމް އިބްރާހީމްގެ ބަދަލުގައި، ސިއްހީ ވުޒާރާގެ އިސްވެރިޔާ ޑރ. ގީލާ ޢަލީއެވެ.

މި ދަތުރުފުޅުގެ ތެރެއިން މިނިސްޓަރު ވަނީ މަރޮށި ޞިއްޙީ މަރުކަޒުގެ އިސްވެރިންނާއި މުވައްޒަފުންނާ ބައްދަލުކުރައްވާފައެވެ. މި ބައްދަލުކުރެއްވުމުގައި ރަށުގައި ޞިއްޙީ ޚިދުމަތް ފޯރުކޮށްދިނުމުގައި ދިމާވާ ގޮންޖެހުންތައް އޮޅުންފިލުއްވައި، ކުރިއަށް އޮތް ތަނުގައި ޚިދުމަތްތައް އިތުރަށް ހަރުދަނާކޮށް ފުރިހަމަކުރެވޭނެ ގޮތްތަކާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކުރައްވާފައެވެ.

މަރޮށީގައި އަލަށް ޤާއިމުކުރި ލެބޯޓަރީގެ ޚިދުމަތް އިފްތިތާޙުކޮށްދެއްވައި ވާހަކަދައްކަވަމުން ވަޒީރު ވިދާޅުވީ، މިއީ މަރޮށީގެ ތާރީޚުގައި ވަރަށް އުފާވެރި އަދި އެހާމެ ތާރީޚީ ދުވަހެއް ކަމަށާއި، މި ބަދަލަކީ ރަށުގެ ޞިއްޙީ ދާއިރާއަށް ގެނެވުނު އިންޤިލާބީ ކުރިއެރުމެއް ކަމަށެވެ.

ވަޒީރު އިތުރަށް ފާހަގަކުރެއްވި ގޮތުގައި، ޞިއްޙީ މަރުކަޒުގައި އަލަށް ފެށުނު ލެބޯޓަރީގެ ޚިދުމަތަކީ މުޅި ޖަމާޢަތަށް ލިބިގެންދިޔަ ވަރަށް އަގުހުރި ހަދިޔާއެކެވެ. އަދި ޞިއްޙީ މަރުކަޒުގެ ޚިދުމަތް 24 ގަޑިއިރަށް ބަދަލުވެގެން ދިއުމަކީ ރަށުގެ އެންމެހާ ރައްޔިތުންނަށްވެސް ލިބިގެންދިޔަ ވަރަށް ބޮޑު ހިތްހަމަޖެހުމަކާއި ފަސޭހައެއް ކަމުގައި އެކަމަނާ ވިދާޅުވިއެވެ.