ހުޅުމާލެ ދެވަނަ ފިޔަވަހީގެ މަގުތަކަކީ ޒަމާނީ ފެންވަރަށް، ފުޅާކޮށް އަދި ހިނގާބިނގާވެ އުޅޭ ފަރާތްތަކާއި ދުއްވާ އުޅަނދުތަކުގެ ސަލާމަތަށް ޚާއްޞަ ސަމާލުކަމެއް ދީގެން ފަރުމާކޮށްފައިވާ މަގުތަކެކެވެ. ނަމަވެސް، ފަހަކަށް އައިސް އެ ސަރަހައްދުގައި ނުރައްކާތެރި ގިނަ އެކްސިޑެންޓުތަކެއް ހިނގައި، މަގުމަތީގެ ބިރުވެރިކަން މިވަނީ އިންތިހާއަށް ބޮޑުވެފައެވެ.

މިގޮތުން ހިނގާ އެކްސިޑެންޓުތަކުގެ އަސްލަށް ބަލާއިރު ފެންނަނީ ޓްރެފިކް ފްލޯއަށް ބުރޫއަރާ ގޮތަށް އުޅަނދުތައް ބޭނުންކުރުމާއި، މަގުމަތީގެ އަސާސީ ޤަވާއިދުތަކަށް ފަރުވާކުޑަކުރުމުގެ ނުރައްކާތެރި ނަތީޖާއެވެ.

މިކަމުގެ އެންމެ ހިތާމަވެރި އެއް މިސާލަކީ މިއަހަރުގެ އޮގަސްޓު މަހު ހުޅުމާލެ ފޭސް 2، ހިތިގަސްމަގު ވިނަރެސް 7 ކައިރީގައި ހިނގި ނުރައްކާތެރި އެކްސިޑެންޓެވެ. އޯގަސްޓް 29، 2026 ވަނަ ދުވަހުގެ ރޭ 21:04 ހާއިރު ހިނގި މި ހާދިސާގައި، މަގުގެ އެއްފަރާތުގައި މަޑުކޮށްފައި އޮތް ކާރަކަށް އަރަން ދިޔަ މީހެއްގެ ގައިން ނެއްޓެން އުޅުނު ސައިކަލެއް ކޮންޓްރޯލުންދޫވެ ވެއްޓި، އެވަގުތު އެ ލޭނުން ދުއްވާފައި އައި އެހެން ކާރެއްގެ ދަށުވެ ނުވަތަ ޖެހި ވަނީ ނުރައްކާތެރި ހާދިސާއެއް ހިނގާފައެވެ.

މި ހާދިސާގައި ސައިކަލުގެ ފަހަތުގައި އިން އުމުރުން 9 އަހަރުގެ ކުޑަކުއްޖާގެ ބޮލަށް ލިބުނު ސީރިއަސް އަނިޔާތަކާ ގުޅިގެން، އައިޖީއެމްއެޗް ހޮސްޕިޓަލުގެ އައިސީޔޫގައި ވެންޓިލޭޓަރުގައި ފަރުވާދެމުންދަނިކޮށް ސެޕްޓެމްބަރު 1 ވަނަ ދުވަހުގެ ފަތިހުގެ ވަގުތެއްގައި ވަނީ ނިޔާވެފައެވެ.

މިފަދަ ހާދިސާތައް ގިނަވަމުންދާއިރު، މިއީ ހަމައެކަނި ދުވެލި ބާރުވުމުގެ މައްސަލަތަކެއް ނޫންކަމާއި، މަގުމަތީގެ ފްލޯ ހިފެހެއްޓުމަށް ޤާއިމުކޮށްފައިވާ ވަސީލަތްތަކުގެ ބޭނުން ހެޔޮގޮތުގައި ނުހިފުމުގެ ސަބަބުން ދިމާވާ ބޮޑު ކާރިސާއެއްކަން ފުލުހުންގެ ތަހުގީގުންވެސް ހާމަވެއެވެ.

އާންމުކޮށް މަގުތަކުގައި އުޅަނދު މަޑުކުރުމަށާއި މީހުން އެރުވުމަށް ޚާއްޞަ ޒޯންތައް ހަދާފައި ހުރި ނަމަވެސް، ގިނަ ޑްރައިވަރުންނާއި އުޅަނދުތަކުން ޚިދުމަތް ހޯދާ ފަރާތްތަކުން އެ ޒޯންތައް ބޭނުންކުރުމުގެ ބަދަލުގައި ސީދާ މަގުގެ މެދަށް އުޅަނދު މަޑުކުރުމުގެ ސަބަބުން ޓްރެފިކް ފްލޯއަށް ބުރޫއަރައި، ފަހަތުން އަންނަ އުޅަނދުތަކަށް ނުރައްކާތެރި އެކްސިޑެންޓްތަކަށް މަގުފަހިވެއެވެ.

އާބާދީ ބޮޑުވެ، މަގުތަކުގައި ދުއްވާ އުޅަނދުފަހަރު އިތުރުވަމުންދާ މި ދަނޑިވަޅުގައި، ފަރުވާކުޑަ އާދަތައް ދޫކޮށްލަން މިއަދު ވަނީ މަޖުބޫރުވެފެވެ.

މަގުމަތީގެ ރައްކާތެރިކަން ކަށަވަރުކޮށް، އެކްސިޑެންޓްތައް މަދުކުރުމަށްޓަކައި ހުޅުމާލެ މެނޭޖްކުރާ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް ޕޮލިސް ސަރވިސް ގުޅިގެން ދަނީ ގިނަ މަސައްކަތްތަކެއްވެސް ކުރަމުންނެވެ. އެކްސިޑެންޓްތައް މަދުކުރުމުގެ މަޤްޞަދުގައި، ހުޅުމާލޭގައި ރައުންޑްއެބައުޓްތައް ހެދުމުގެ މަޝްރޫޢުތައް އެޗްޑީސީން އިސްނަގައިގެން ކުރިޔަށްގެންގޮސްފައިވާއިރު، މިކަމުގެ ސަބަބުން ޓްރެފިކް ފްލޯ ހަރުދަނާވެ ރަނގަޅު ނަތީޖާތަކެއް ވަނީ ފެންނަން ފަށާފައެވެ. އަދި އެޗްޑީސީގެ ބެލުމުގެ ދަށުގައި ހުރި އިމާރާތްތަކުގައި ޑްރޮޕްއޮފް އޭރިއާތައް ވެސް ދަނީ ހަދައި ބޭނުންކުރަން ފަށަން ތައްޔާރުތައް ވަމުންނެވެ.

އާބާދީ ބޮޑުވެ، މަގުތަކުގައި ދުއްވާ އުޅަނދުފަހަރު އިތުރުވަމުންދާ މި ދަނޑިވަޅުގައި، ސަރުކާރާއި، އެޗްޑީސީއާއި އަދި ފުލުހުން ކިތަންމެ ގިނަ މަސައްކަތްތަކެއް ކުރި ނަމަވެސް، މަގުމަތީގެ ސަލާމަތަށްޓަކައި ކޮންމެ ރައްޔިތަކާއި ޑްރައިވަރަކުވެސް އަމިއްލަ ފަރުދީ ޒިންމާ ނަގައި، ޤަވާއިދުތަކަށް ފުރިހަމައަށް ބޯލަނބަންޖެހެއެވެ.

ޚާއްޞަ ޑްރޮޕް އޮފް ޒޯންތަކާއި ޕާކުކުރުމުގެ އުސޫލުތަކަށް ފުރިހަމައަށް ބޯލެނބުމަކީ ކޮންމެ ޑްރައިވަރެއްގެ މައްޗަށް އޮތް ޤާނޫނީ އަދި އިންސާނީ ޒިންމާއެކެވެ. ހަމައެއާއެކު، މަގުމަތީގެ ނިޒާމު ހަރުދަނާކޮށް، ޓްރެފިކް ފުލުހުންގެ ބެލެހެއްޓުން އިތުރުކޮށް، ޤަވާއިދާ ޚިލާފަށް އަމަލުކުރާ ފަރާތްތަކަށް ހަރުކަށި ފިޔަވަޅު އަޅަންޖެހެއެވެ.

ލިބިފައިވާ ވަސީލަތްތަކުގެ ބޭނުން ފުރިހަމައަށް ހިފައި، އަނެކާގެ ފުރާނައިގެ ރައްކާތެރިކަމަށް ވިސްނައިގެން ނޫނީ މަގުމަތީގެ މި ބިރުވެރިކަމަށް ނިމުމެއް ނުގެނެވޭނެއެވެ.