ދަރުމަވަންތަ ސްކޫލާއި، ޣިޔާސުއްދީން އިންޓަނޭޝަނަލް ސްކޫލު އަދި އިމާދުއްދީން ސްކޫލުގެ ދަރިވަރުންނަށް އަމާޒުކޮށްގެން ކުރިއަށްގެންދިޔަ "ޓްރެފިކް މޮނީޓާސް ޕްރޮގްރާމް" ކާމިޔާބުކަމާއެކު ނިންމުމުގެ ރަސްމިއްޔާތު ބާއްވައިފިއެވެ.

މި ޕްރޮގްރާމް ނިންމުމުގެ ގޮތުން މި އޮކްޓޫބަރު މަހުގެ 1 ވަނަ ދުވަހު ޣިޔާސުއްދީން އިންޓަނޭޝަނަލް ސްކޫލުގައި ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވައި، ދަރިވަރުންނަށް ސެޓްފިކެޓާއި ޓެގު ޙަވާލުކޮށްދެއްވީ ކޮންޓްރޯލަރ ޖެނެރަލް އޮފް އިމިގްރޭޝަން އަދި ކޮމިޝަނަރ އޮފް ޕޮލިސް (ރިޓަޔާޑް) އަޙްމަދު ފަސީޙުއެވެ. މި ރަސްމިއްޔާތުގައި ދިވެހި ފުލުހުންގެ ޚިދުމަތުގެ ސީނިއަރ އޮފިސަރުންނާއި، ތިން ސްކޫލުގެ އިސްވެރިން ބައިވެރިވެވަޑައިގެންނެވިއެވެ.

ރަސްމިއްޔާތުގެ ޝަރަފުވެރި މެހުމާނު ދެއްކެވި ވާހަކަފުޅުގައި، ބަވަނަވަމުން އަންނަ ދުނިޔޭގައި ޓްރެފިކް މައްސަލަތައް ޙައްލުކުރުމަށްޓަކައި ފުރާވަރުގެ ކުދިންނަށް މިފަދަ ތަމްރީނުތަކަކީ ވަރަށް މުހިންމު އަދި މުސްތަޤްބަލުގައި ބޮޑު ބޭނުމެއް ހިފޭނެ ޕްރޮގްރާމްތަކެއްކަން ފާހަގަކުރެއްވިއެވެ. މީގެއިތުރުން، މި ޕްރޮގްރާމް ހުއްޓައިނުލައި ދަރިވަރުންނަށް މެދުކެނޑުމެއްނެތި ކުރިއަށް ގެންދިއުމަށާއި، ތަމްރީނު ނިންމާ ދަރިވަރުންގެ މަސައްކަތް ޓްރެފިކް ފުލުހުން މެދުވެރިކޮށް އަބަދުވެސް ގާތުން މޮނީޓަރކޮށް އެ ކުދިންގެ ރައްކާތެރިކަން ކަށަވަރުކޮށްދިނުމަށް ފުލުހުންގެ ކިބައިން އެދިވަޑައިގެންނެވިއެވެ.

މިދިޔަ ސެޕްޓެމްބަރު މަހުގެ 26 އިން އޮކްޓޫބަރު 1 އަށް ކުރިއަށްގެންދިޔަ މި ޕްރޮގްރާމުގައި، ތިން ސްކޫލު ހިމެނޭހެން ޖުމްލަ 103 ދަރިވަރުންނާއި 11 ކޯޑިނޭޓަރުން ވަނީ ބައިވެރިވެ ފުރިހަމަކޮށްފައެވެ.

ޓްރެފިކް މޮނީޓާސް ޕްރޮގްރާމަކީ ސްކޫލުތައް ހިމެނޭ ސަރަޙައްދުތަކުގެ ޓްރެފިކް ބެލެހެއްޓުމުގައި ދަރިވަރުންގެ ދައުރު ފުޅާކޮށް، މަގުމަތީގެ ސަލާމަތާއި ރައްކާތެރިކަމަށް މުޖުތަމަޢު ހޭލުންތެރިކުރުވައި ޒިންމާދާރު ރައްޔިތުންތަކެއް ބިނާކުރުމުގެ މަޤްޞަދުގައި ކުރިއަށްގެންދާ މުހިންމު ހަރަކާތެކެވެ.