ރައްޔިތުންނަށް ސީދާ މާލީ މަންފާ ލިބޭ ގޮތަށް ސަރުކާރުން 10 ރިސޯޓެއް ތަރައްޤީކުރުމަށް ނިންމާފައިވާ ނިންމުމަކީ ރާއްޖޭގެ ފަތުރުވެރިކަމުގެ ސިނާޢަތަށް އަންނާނެ ވަރަށް ބޮޑު އަދި މުހިންމު ބަދަލެއް ކަމަށް، މި ދާއިރާގެ ތަޖުރިބާކާރު ވިޔަފާރިވެރިޔާ އަދި ކްރައުން ކުންފުނީގެ ޗެއަރޕާސަން ޙުސައިން ޢަފީފު (ޗަމްޕާ ޢަފީފު) ވިދާޅުވެއްޖެއެވެ.

ޤައުމީ ފަތުރުވެރިކަމުގެ ދުވަސް ފާހަގަކުރުމަށް ރޭ ބޭއްވި ޚާއްޞަ ރަސްމިއްޔާތުގައި ވާހަކަދައްކަވަމުން ޢަފީފު ވިދާޅުވީ، ރައްޔިތުން ހިއްސާވާ ގޮތަށް ސަރުކާރުން ހިންގަން ނިންމާފައިވާ މި މަޝްރޫޢަކީ ވަރަށް އުންމީދީ ކަމެއް ކަމަށާއި މި މަޝްރޫޢު ކާމިޔާބުވާނެ ކަމުގެ ފުރިހަމަ ޔަޤީންކަން އެބައޮތް ކަމަށެވެ. އަދި މި ބޮޑު މަސައްކަތުގައި އަމިއްލަ ގޮތުން ބައިވެރިވެވަޑައިގަންނަވަން ބޭނުންފުޅުވާ ކަމަށްވެސް އޭނާ ވަނީ ހާމަކުރައްވާފައެވެ.

ކުރިއަށް އޮތް ތިން އަހަރު ދުވަހުގެ ތެރޭގައި ސަރުކާރުގެ ކުންފުންޏެއް މެދުވެރިކޮށް 10 ރިސޯޓު ތަރައްޤީކުރުމުގެ މަޝްރޫޢެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރެއްވީ މިއަހަރުގެ ރިޔާސީ ބަޔާނުގައެވެ. އެމަނިކުފާނު ވިދާޅުވެފައިވަނީ މި ރިސޯޓުތަކުގެ ޙިއްޞާދާރުންނަކީ ދިވެހި ހުރިހާ ރައްޔިތުން ކަމުގައި ޤާނޫނީ ގޮތުން ކަނޑައަޅައި، އެ ތަންތަނުން ލިބޭ ފައިދާގެ ގޮތުގައި ކޮންމެ ރައްޔިތަކަށް އަހަރަކު މަދުވެގެން 400 އެމެރިކާ ޑޮލަރު ޖަމާކޮށްދެއްވާނެ ކަމަށެވެ. މީގެ މައިގަނޑު އަމާޒަކީ ރާއްޖޭގެ މައި އިޤްތިޞާދީ ދާއިރާގެ ނަފާ ސީދާ ރައްޔިތުންގެ ޖީބުތަކަށް ވަންނާނެ ދާއިމީ ނިޒާމެއް ޤާއިމުކުރުމެވެ.

ޢަފީފު އިތުރަށް ފާހަގަކުރެއްވި ގޮތުގައި، ރާއްޖޭގެ ފަތުރުވެރިކަން މިއަދު ދެކެމުންމިދާ ކާމިޔާބީގެ އަސްލަކީ ވޭތުވެދިޔަ ބައިޤަރުނެއްހާ ދުވަހު ސަރުކާރާއި އަމިއްލަ ވިޔަފާރިވެރިން ގުޅިގެން ކުރި އިޚްލާޞްތެރި މަސައްކަތްތަކެވެ. އަދި ކުރިމަގުގައިވެސް މި ސިނާޢަތް އިތުރު ހަރުފަތްތަކަކަށް ގެންދެވޭނީ މި ބަދަހި ގުޅުން ދަމަހައްޓައި، މާޒީގެ ތަޖުރިބާތަކުން ދަސްވި ފިލާވަޅުތަކުގެ އަލީގައި ކުރިއަށް ގޮސްގެން ކަމަށް އޭނާ ވިދާޅުވިއެވެ.

މީގެއިތުރުން، ފަތުރުވެރިކަމުގެ ސިނާޢަތް ދެމެހެއްޓުމުގައި އެންމެ މުހިންމު ދައުރެއް އަދާކުރަނީ ރިސޯޓުތަކުގެ މުވައްޒަފުންކަން ފާހަގަކުރައްވައި ޢަފީފު ވަނީ އެ ފަރާތްތަކަށް ޚާއްޞަ ޝުކުރެއް އަދާކުރައްވާފައެވެ.