މަސްތުވާތަކެތި ގެންގުޅުނު ކަމުގެ ތުހުމަތުގައި ހުޅުމާލެ ފޭސް 1 އިން 22 އަހަރުގެ ދިވެހި ޒުވާނަކު ފުލުހުން ހައްޔަރުކޮށްފިއެވެ.

މި މައްސަލައާ ގުޅިގެން ހައްޔަރުކޮށްފައިވަނީ ޏ. ފުވައްމުލައް، ދޫޑިގަން، ރެއަރ، މުޙައްމަދު ޖައުޝް ޝުޖާޢު (22އ) އެވެ. އޭނާ ފުލުހުންގެ ބެލުމުގެ ދަށަށް ގެނެސްފައިވަނީ މި އޮކްޓޫބަރު މަހުގެ 3 ވަނަ ދުވަހުއެވެ.

ފުލުހުން މަޢުލޫމާތު ދިން ގޮތުގައި، ހުޅުމާލެ ފޭސް 1 ގައި ފުލުހުން ރަށުތެރެ ޕެޓްރޯލް ކުރަމުން ދިޔަ ވަގުތު، ފުލުހުން ފެނުމުން އޭނާގެ ޢަމަލުތައް ހުރި ގޮތުން ޝައްކުކުރެވިގެން އޭނާ ވަނީ ހުއްޓުވާފައެވެ. އަދި އޭނާ ބަލައިފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެއް އަޅާފައި ހުރި ސެލޯފިންކޮޅުތަކެއް ވަނީ ފެނިފައެވެ. ފުލުހުން ހާމަކުރި ގޮތުގައި މި ތަކެތީގެ ވަގުތީ ބަރުދަނަކީ 57 ގްރާމެވެ.

މި މައްސަލައާ ގުޅިގެން މުޙައްމަދު ޖައުޝް ޝުޖާޢުގެ ބަންދާމެދު ގޮތެއް ނިންމުމަށްޓަކައި ކޯޓަށް ޙާޟިރުކުރުމުން، ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ދީފައެވެ.

މި މައްސަލަ ދިވެހި ފުލުހުންގެ ޚިދުމަތުން އިތުރަށް ތަޙުޤީޤުކުރަމުން އަންނަ ކަމަށް ވަނީ ހާމަކޮށްފައެވެ.