މާލޭގައި ފުޅާދާއިރާއެއްގައި ބަނގުރަލުގެ ވިޔަފާރިކުރަމުން ދިޔަ ބިދޭސީ ދެ މީހަކު ގިނަ ޢަދަދެއްގެ ބަނގުރަލާއި މަސްތުވާތަކެއްޗާއެކު ފުލުހުން ހައްޔަރުކޮށްފިއެވެ.

މި މައްސަލައާ ގުޅިގެން ހައްޔަރުކޮށްފައިވަނީ އިންޑިއާއަށް ނިސްބަތްވާ ޢުމުރުން 44 އަހަރުގެ ޕެރުމަލް މަޔަވަން އަދި ސްރީލަންކާއަށް ނިސްބަތްވާ ޢުމުރުން 35 އަހަރުގެ ތުވަން ރިސްލިން ފަލީލްއެވެ. މި ދެ މީހުން ހައްޔަރުކޮށްފައިވަނީ ޤަވާޢިދާ ޚިލާފަށް ބަނގުރާ ގެންގުޅެ، އޭގެ ވިޔަފާރިކޮށް އަދި މަސްތުވާތަކެއްޗާއި ބަނގުރާ ބޭނުންކުރާކަމަށް ތުހުމަތުކުރެވޭ މައްސަލައެއްގައެވެ.

ފުލުހުން ހާމަކުރި ގޮތުގައި، މި އޮކްޓޫބަރު މަހުގެ 1 ވަނަ ދުވަހު ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން މާލޭގައި ހިންގި ޚާއްޞަ އޮޕަރޭޝަނެއްގައި، އެ ދެ މީހުން ހައްޔަރުކޮށް، އެމީހުން ދިރިއުޅޭ ގެ ވަނީ ބަލައިފާސްކޮށްފައެވެ.

އެ ގެ ބަލައިފާސްކުރުމުގެ ތެރޭގައި ފުލުހުންގެ ބެލުމުގެ ދަށަށް ގެނެސްފައިވާ ތަކެތީގެ ތެރޭގައި ހިމެނެނީ:

• ބަނގުރާ ކަމަށް ބެލެވޭ އެއްޗެއް ހުރި 500 އެމްއެލްގެ 1,677 ފުޅި
• ބަނގުރާ ކަމަށް ބެލެވޭ އެއްޗެއް ހުރި 5 ލީޓަރުގެ 23 ފުޅި
• މަސްތުވާތަކެތި ކަމަށް ބެލެވޭ އެއްޗެއް އަޅާފައި ހުރި 2 ރަބަރު ޕެކެޓް

މި މައްސަލައިގެ ތަޙުޤީޤީ އިޖުރާއަތްތައް ފުރިހަމަކުރުމަށްފަހު، އިމިގްރޭޝަން ޤާނޫނުގެ ދަށުން އެ ދެ މީހުންނާމެދު ފިޔަވަޅު އެޅުމަށްޓަކައި މިހާރު ވަނީ މޯލްޑިވްސް އިމިގްރޭޝަނާ ޙަވާލުކޮށްފައެވެ. މި މައްސަލަ ދިވެހި ފުލުހުންގެ ޚިދުމަތުން ދަނީ އިތުރަށް ތަޙުޤީޤުކުރަމުންނެވެ.