ށ.ފުނަދޫގައި މިހާރު ކުރިއަށްދާ ޑަބްލިޔުޑީސީ ހޭންޑްބޯޅަ ޓޯނަމަންޓުގެ ފައިނަލުގައި މިރޭ އެންމެ ފަހުގެ ޗެމްޕިއަން ޕޮލިސް ޔުނައިޓެޑާއި ދެކޮޅަށް ކުޅުނު މެޗު ވާދަވެރި ކުޅުމަކަށްފަހު 11-14 ގެ ނަތީޖާއަކުން ކާމިޔާބުކޮށް ޔުނައިޓެޑް ބީއެމްއެލް އިން މުބާރާތުގެ ޗެމްޕިއަންކަން ހޯދައިފިއެވެ.

މުބާރާތުގެ ފައިނަލުން ޔުނައިޓެޑް ބީއެމްއެލް ޖާގަ ހޯދީ ސެމީފައިނަލުގެ ފުރަތަމަ މެޗުގައި 10-9 ގެ ނަތީޖާއަކުން އެސްއާރުސީ ބަލިކުރުމަށްފަހު އެވެ. އަދި ޕޮލިސް ޔުނައިޓެޑް ފައިނަލުން ޖާގަ ހޯދީ ސެމީފައިނަލުގެ ދެވަނަ މެޗުގައި ށ. އަތޮޅު ހޮސްޕިޓަލް 8-3 ގެ ނަތިޖާއަކުން ބަލިކުރުމަށްފަހު އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ ފައިނަލް މެޗުގެ ފުރަތަމަ ހާފުގެ ކުޅުން ނިމިގެންދިޔައީ 7-7 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި ދެވަނަ ހާފުގައި ބީއެމްއެލް އިން އިތުރު ހަތް ލަނޑު ކާމިޔާބުކުރިއިރު، މިހާފުގައި ޕޮލިސް ޓީމަށް ކާމިޔާބު ކުރެވުނީ އިތުރު ހަތަރު ލަނޑެވެ.

އެގޮތުން މިމެޗުގައި ޔުނައިޓެޑް ބީއެމްއެލްގެ އާމިނަތު ނަޖުމާ 10 ލަނޑު ކާމިޔާބުކުރިއިރު، އެޓީމުގެ ޚަދީޖާ ހުސެއިން އަދި އަމާލް ހާމިދު މިއިން ކޮންމެ ކުޅުންތެރިއަކު ވަނީ ދެލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ޕޮލިސް ޔުނައިޓެޑްގެ ހައްވާ ބަހިއްޔަތު އަށް ލަނޑު ކާމިޔާބުކުރިއިރު، އެޓީމުގެ އަނެއް ތިން ލަނޑު ކާމިޔާބުކޮށްދިނީ އައިޝަތު ހާޝިމާ އެވެ. އަދި ފައިނަލް މެޗުގެ މޮޅު ކުޅުންތެރިއަކަށް ހޮވުނީ ޔުނައިޓެޑް ބީއެމްއެލްގެ ގޯލްކީޕަރު އައިޝަތު ޝިފްލާ އެވެ.

ޝިފްލާ ވަނީ މިމެޗުގައި ޕޮލިސް ޔުނައިޓެޑުން ފޮނުވާލި ނުރައްކާތެރި ގިނަ ހަމަލާތަކެއް ހުޝިއާރުކަމާއެކު ދިފާއުކޮށް، މިމެޗުން ޔުނައިޓެޑް ބީއެމްއެލް މޮޅުވުމުގައި މުހިންމު ދައުރެއް އަދާކޮށްދީފައެވެ.

މުބާރާތުގެ އެންމެ މޮޅު ހަތް ކުޅުންތެރިންނަކީ އާމިނަތު ނަޖުމާ (ޔުނައިޓެޑް ބީއެމްއެލް)، އަމާލް ހާމިދު (ޔުނައިޓެޑް ބީއެމްއެލް)، ސިމާ އިބްރާހިމް ޝިހާމް (ޕޮލިސް ޔުނައިޓެޑް)، ހައްވާ ބަހިއްޔަތު (ޕޮލިސް ޔުނައިޓެޑް)، މަރިޔަމް ރިފާ (އެސްއާރުސީ)، ސާދުނާ މުހައްމަދު (ށ.އަތޮޅު ހޮސްޕިޓަލް) އަދި އައިޝަތު ހާޝިމާ (ޕޮލިސް ޔުނައިޓެޑް) އެވެ.

މީގެ އިތުރުން މުބާރާތުގެ އެންމެ މޮޅު ކީޕަރަކީ ޔުނައިޓެޑް ބީއެމްއެލްގެ އައިޝަތު ޝިފްލާ އެވެ. އަދި އެންމެ އުންމީދީ ކުޅުންތެރިއަކަށް ޔުނައިޓެޑް ބީއެމްއެލްގެ އައިޝަތު ޝަޒުފާ އަހުމަދު ހޮވުނުއިރު، މުބާރާތުގެ ކުއީން އޮފް ދަ ޓޯނަމަންޓްގެ މަގާމު ހޯދީ ޔުނައިޓެޑް ބީއެމްއެލްގެ އައިޝަތު ނަޖުމާ އެވެ.

27 ސެޕްޓެމްބަރު 2026 އިން 03 އޮކްޓޯބަރު 2026 ގެ ނިޔަލަށް ކުރިއަށްދާ މިއަހަރު މުބާރާތުގައި ޖުމްލަ ހަ ޓީމަކުން ވާދަކޮށްފައިވާއިރު، މުބާރާތް ކުރިއަށް ގެންގޮސްފައި ވަނީ ބައިވެރިވި ހަ ޓީމު ދެ ގުރޫޕަކަށް ބަހާލައިގެންނެވެ.