ށ.ފުނަދޫގައި މިހާރު ކުރިއަށްދާ ޑަބްލިޔުޑީސީ ހޭންޑްބޯޅަ ޓޯނަމަންޓުގެ ފައިނަލުގައި މިރޭ އެންމެ ފަހުގެ ޗެމްޕިއަން ޕޮލިސް ޔުނައިޓެޑާއި ޔުނައިޓެޑް ބީއެމްއެލް ވާދަކުރާނެ އެވެ.

މުބާރާތުގެ ފައިނަލުން ޕޮލިސް ޔުނައިޓެޑް ޖާގަ ހޯދީ ގުރޫޕް ސްޓޭޖުގައި ކުޅުނު ދެމެޗުން ވެސް މޮޅުވެ ހަ ޕޮއިންޓާއެކު ގުރޫޕް ބީގެ އެއްވަނަ ޓީމުގެ ގޮތުގައި ސެމީފައިނަލުގައި ވާދަކޮށް، ސެމީފައިނަލުގެ ދެވަނަ މެޗުގައި ށ. އަތޮޅު ހޮސްޕިޓަލް 8-3 ގެ ނަތިޖާއަކުން ބަލިކުރުމަށްފަހު އެވެ.

ޔުނައިޓެޑް ބީއެމްއެލް މުބާރާތުގެ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ދެމެޗުން ވެސް މޮޅުވެ ހަ ޕޮއިންޓާއެކު ގުރޫޕް އޭގެ އެއްވަނަ ޓީމުގެ ގޮތުގައި ސެމީފައިނަލުގައި ވާދަކޮށް، ސެމީފައިނަލުގެ ފުރަތަަމަ މެޗުގައި ވާދަވެރި ކުޅުމަކަށްފަހު 9-10 ގެ ނަތީޖާއަކުން އެސްއާރުސީ ބަލިކުރުމަށްފަހު އެވެ.

މިމުބާރާތުގައި ޕޮލިސް އަދި ބީއެމްއެލް އިން ވެސް ކުޅުނު ތިން މެޗުން ވެސް މޮޅުވެފައިވާއިރު، މިމެޗަށް ޕޮލިސް ޓީމުން ނުކުންނަނީ ތަށި ދިފާއުކުރަންށެވެ. އަދި މިއަހަރުގެ މުބާރާތުގައި ތަފާތު މޮޅު ކުޅުމެއް ދައްކަމުން އަންނަ ޔުނައިޓެޑް ބީއެމްއެލްގެ އަމާޒަކީ މުބާރާތުގައި މިހާތަނަށް އެޓީމުން ދެއްކި މޮޅު ކުޅުން ތަކުރާރުކޮށް ޕޮލިސް ޔުނައިޓެޑް ހުއްޓުވުމެވެ.

ފުނަދޫގެ ކަނބަލުންގެ މެދުގައި ހޭންބޯޅައިގެ ފޯރި އިތުރުކޮށް، މުއައްސަސާތަކުގެ މެދުގައި އެކުވެރިކަމާއި އެއްބައިވަންތަކަށް އާލާކުރުމުގެ އިތުރުން، ދުޅަހެޔޮ މުޖުތަމައެއް ބިނާކުރުމުގެ މަގުސަދުގައި ފުނަދޫ ޑަބްލިޔުޑީސީގެ ފަރާތުން އިންތިޒާމުކޮށް ބާއްވާ މި މުބާރާތް އެންމެ ފަހުން ބާއްވާފައިވަނީ 2024 ވަނަ އަހަރު އެވެ.

27 ސެޕްޓެމްބަރު 2026 އިން 03 އޮކްޓޯބަރު 2026 ގެ ނިޔަލަށް ކުރިއަށްދާ މިއަހަރު މުބާރާތުގައި ޖުމްލަ ހަ ޓީމަކުން ވާދަކޮށްފައިވާއިރު، މުބާރާތް ކުރިއަށް ގެންގޮސްފައި ވަނީ ބައިވެރިވި ހަ ޓީމު ދެ ގުރޫޕަކަށް ބަހާލައިގެންނެވެ.

ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމު ސެމީފައިނަލަށް ހޮވުނުއިރު، ފުނަދޫ ސްކޫލް ފުޓްސަލް ދަނޑުގައި ކުޅޭ މި މުބާރާތުގެ ފައިނަލް މެޗު ފެށުމަށް ހަމަޖެހިފައިވަނީ މިރޭ 20:15 ގައެވެ.