ށ.ފުނަދޫގައި މިހާރު ކުރިއަށްދާ ޑަބްލިޔުޑީސީ ހޭންޑްބޯޅަ ޓޯނަމަންޓުގައި ރޭ ކުޅުނު ސެމީފައިނަލް ދެވަނަ މެޗުގައި 8-3 ގެ ނަތީޖާއަކުން ށ. އަތޮޅު ހޮސްޕިޓަލް ބަލިކޮށް އެންމެ ފަހުގެ ޗެމްޕިއަން ޕޮލިސް ޔުނައިޓެޑުން މުބާރާތުގެ ފައިނަލުން ޖާގަ ހޯދައިފިއެވެ.

ޕޮލިސް ޔުނައިޓެޑް ސެމީފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ދެމެޗުން ވެސް މޮޅުވެ ހަ ޕޮއިންޓާއެކު ގުރޫޕް ބީގެ އެއްވަނަ ޓީމުގެ ގޮތުގައެވެ. އަދި ށ.އަތޮޅު ހޮސްޕިޓަލް ސެމިފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ދެމެޗުން ހޯދި ތިން ޕޮއިންޓާއެކު ގުރޫޕް އޭގެ ދެވަނަ ޓީމުގެ ގޮތުގައެވެ.

މެޗުގެ ފުރަތަމަ ހާފުގައި މޮޅަށް ކުޅެ ޕޮލިސް ޔުނައިޓެޑުން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 3-0 ގެ ނަތިޖާއަކުން ޕޮލިސް ޔުނައިޓެޑް ކުރިގައި އޮވެގެންނެވެ. އަދި ދެވަނަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ޕޮލިސް ޓީމުން އިތުރު ފަސް ލަނޑު ކާމިޔާބުކުރިއިރު، މިހާފުގައި ހޮސްޕިޓަލުން ވެސް ވަނީ ތިން ލަނޑު ކާމިޔާބުކޮށްފައެވެ.

އެގޮތުން މިމެޗުގައި ޕޮލިސް ޔުނައިޓެޑްގެ ހައްވާ ބަހިއްޔަތު ފަސް ލަނޑު ކާމިޔާބުކުރިއިރު، އެޓީމުގެ ހާޝިމާ ވަނީ ދެލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ ފާތުމަތު ރައިހާނާ އެވެ.

މިގެ އިތުރުން މިމެޗުގައި ށ އަތޮޅު ހޮސްޕިޓަލް ޓީމުގެ ތިން ލަނޑު ވެސް އެޓީމުގެ ސާދުނާ މުހައްމަދު ކާމިޔާބުކުރިއިރު، މެޗުގެ މޮޅު ކުޅުންތެރިއަކަށް ހޮވުނީ ޕޮލިސް ޔުނައިޓެޑްގެ ހައްވާ ބަހިއްޔަތު އެވެ.

27 ސެޕްޓެމްބަރު 2026 އިން 03 އޮކްޓޯބަރު 2026 ގެ ނިޔަލަށް ކުރިއަށްދާ މިމުބާރާތުގައި މިއަހަރު ޖުމްލަ ހަ ޓީމަކުން ވާދަކުރިއިރު، މުބާރާތް ކުރިއަށް ގެންގޮސްފައި ވަނީ ބައިވެރިވި ހަ ޓީމު ދެ ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވުނުއިރު، މުބާރާތުގެ ފައިނަލް މެޗު ކުޅުމަށް ހަމަޖެހިފައި ވަނީ އޮކްޓޯބަރު މަހުގެ 03 ވަނަ ދުވަހުއެވެ.