ރާއްޖޭގެ އެންމެ ދުވަސްވީ ޕާޓީ - އެމްޑީޕީގެ ކޮންގްރެސްއިން އެޕާޓީގެ އަސާސީ ޤަވާއިދު އިސްލާޙު ކުރުމުގެ މަސައްކަތް ފަށައިފިއެވެ.ދިވެހިރައްޔިތުންގެ ޑިމޮކްރެޓިކް ޕާޓީއިން މާލެ ސިޓީ ހޯލުގައި ކުރިއަށްގެންދާ މި ކޮންގްރެސްގައި މިއަދު ހެނދުނުގެ ސެޝަނުގައި އޮތީ ޕާޓީގެ އަސާސީ ޤަވާއިދަށް އިސްލާޙު ހުށަހެޅުމާއި، އަސާސީ ޤަވާއިދަށް ގެންނަ އިސްލާޙުތަކާމެދު ބަޙުސްކުރުމެވެ.

މީގެއިތުރުން ކޮންގްރެސްއަށް ޤަރާރުތައް ހުށަހެޅުމުގެ މަސައްކަތްވެސް މިއަދު އެބަދެއެވެ.

އަސާސީ ޤަވާއިދަށް ގެންނަން ހުށަހެޅި އިސްލާހުތަކަށް ބަލާއިރު އެމްޑީޕީގެ ރައީސް އާއި ނައިބު ރައީސްގެ މަގާމު އުވާލައި، ޕާޓީގެ އެންމެ އިސް މަގާމަކީ ޗެއާޕާސަންކަމަށް ހަމަޖެއްސުމަށްވަނީ އިސްލާހު ހުށަހަޅާފައެވެ.

އަސާސީ ގަވައިދަށް ހުށަހެޅި އިސްލާޙުތަކުގެ ތެރޭގައި ރައީސުލްޖުމްހޫރިއްޔާގެ އިސް މުޝީރަކަށް ޕާޓީގެ ޗެއާޕާސަން އައްޔަންކުރުމާއި، ސިޔާސީ މަގާމުތަކާއި ސިޔާސަތުތައް ކަނޑައެޅުމުގައި ރަށްރަށުގެ ހިންގާ ކޮމިޓީގެ މަޝްވަރާ ހޯދުން ހިމެނެއެވެ. މީގެއިތުރުން، ނުލައި ގައުމީ މަޖިލީހަށް މީހުން އައްޔަންކުރާ އުސޫލު އުވާލުމަށް ވަނީ ހުށަހަޅާފައެވެ.

ކޮންގްރެސްގައި މިއަދު އެމްޑީޕީގެ އެޕްލިކޭޝަން ވަނީ ލޯންޗްކޮށްފައެވެ. އެ އެޕަކީ އައިޑީކާޑު ނަމްބަރު ބޭނުންކޮށްގެން ލޮގިން ކުރެވޭ އެޕެކެވެ. އެ އެޕަކީ ޕާޓީގެ ޚަބަރުތަކާއި، ޚަރަކާތްތަކުގެ މަޢުލޫމާތު ހިމެނޭ އެޕެކެވެ. އަަދި ހުރިހާ މެމްބަރުންނަށް ހުޅުވާލެވިފައިވާ ސޯޝަލް މީޑިއާ ޕްލެޓްފޯރމެއް ވެސް އެޕްގައި ހިމަނާފައިވެއެވެ.ކޮންގްރެސްގައި އިއްޔެ އޮތީ، ކޮންގްރެސްގެ ހަވާސާގައި ކުރިއަށްގެންދިޔަ އިންވެސްޓް ފޯރަމްއެވެ. އެ ފޯރަމަށް ހުށަހެޅި އިންވެސްޓްމެންޓްތަކާމެދު ގޮތެއް ނިންމާ، އެއްބަސްވުންތަކުގައި މިއަދު ސޮއިކުރާނެއެވެ.

ކޮންގްރެސްގެ ނިންމުން އޮންނާނީ މިރޭ 09:00ގައެވެ.