ދިވެހިރާއްޖޭގެ އިޤްތިޞާދީ އަދި އިޖުތިމާޢީ ތަރައްޤީ ލާމަރުކަޒުކޮށް، ރަށްރަށުގެ ކައުންސިލްތަކަކީ އަމިއްލަ ފައިމައްޗަށް ތެދުވެފައިވާ ބާރުވެރި ބަޔަކަށް ހެދުމަށްޓަކައި މުހިންމު މަސައްކަތްތަކެއް ދަނީ ކުރެވެމުންނެވެ. މިގޮތުން، އެމްޑީޕީން އިސްނަގައިގެން މިއަދު ފެށި "ރަށްވެހި ތަރައްޤީ" އިންވެސްޓްމެންޓް ފޯރަމަކީ ރާއްޖޭގެ ލޯކަލް ކައުންސިލްތަކުން ރާވާފައިވާ ތަރައްޤީގެ އެކި މަޝްރޫޢުތަކަށް ބޭނުންވާ ފައިސާއާއި އިންވެސްޓްމެންޓް ހޯދުމަށް ހުޅުވިގެންދިޔަ ވަރަށް މުހިންމު ދޮރެކެވެ.
މި ފޯރަމުގައި ލޯކަލް ކައުންސިލްތަކުން ހިންގުމަށް ގަސްތުކުރާ ޖުމްލަ 76 މަޝްރޫޢުއަކަށް އިންވެސްޓަރުން ހޯދުމުގެ ފުރުޞަތު ވަނީ ހުޅުވާލާފައެވެ. މި ހުށަހެޅުންތަކުގެ ތެރެއިން 40 ޕްރޮޕޯސަލެއްގައި މަޝްރޫޢުތައް ހިންގުމަށް ބޭނުންވާ މާލީ އިންވެސްޓްމެންޓްގެ އަދަދު ސާފުކޮށް ބަޔާންކޮށްފައިވާއިރު، އެ އަދަދު 306 މިލިއަން އެމެރިކާ ޑޮލަރަށް އަރައެވެ. މިއީ ރާއްޖޭގެ ރަށްރަށުގެ ތަރައްޤީއަށް އިންވެސްޓްކުރުމަށް ކައުންސިލްތަކުން ކިހާ ބޮޑު ތައްޔާރީތަކެއް ވެފައިވާކަން ހާމަކޮށްދޭ ކަމެކެވެ. ސިޓީ ކައުންސިލްތަކުގެ އިތުރުން 27 ރަށު ކައުންސިލަކުން ވެސް މި ފޯރަމަށް އެކި ދާއިރާތަކުން ޕްރޮޕޯސަލްތައް ވަނީ ހުށަހަޅާފައެވެ.
ފޯރަމަށް ހުށަހެޅި ޕްރޮޕޯސަލްތަކުގެ ތެރެއިން އަގުގެ ގޮތުން އެންމެ ބޮޑު މަޝްރޫޢެއް ހުށަހަޅާފައިވަނީ ތިނަދޫ ސިޓީ ކައުންސިލުންނެވެ. އެއީ ކާޑެއްދޫ އެއާޕޯޓު ޒަމާނީ ފެންވަރަށް ތަރައްޤީކުރުމާއި، ރާއްޖޭގެ ދެކުނުގައި ސީޕްލޭން ހަބެއް ޤާއިމުކުރުމުގެ ބިޔަ މަޝްރޫޢުއެވެ. މީގެ އިތުރުން ވެސް ތިނަދޫގެ ތަރައްޤީއާ ގުޅޭ އިތުރު ފަސް މަޝްރޫޢެއް އެ ކައުންސިލުން ވަނީ ހުށަހަޅާފައެވެ. ވެރިރަށް މާލޭ ސިޓީ ކައުންސިލުން ހުށަހަޅާފައިވަނީ ތިމާވެއްޓާއި ދުޅަހެޔޮކަމަށް އަމާޒުކޮށްގެން މާލޭގައި ކްލައިމެޓް ޕާކަކާއި، ވޯޓާފްރޮންޓް ކްލައިމްބިންގ ވޯލްއެއް އަދި ކަސްރަތުކުރާނެ ޚާއްޞަ ސަރަހައްދެއް ޤާއިމުކުރުމުގެ ޕްރޮޕޯސަލެކެވެ.
އިއާދަކުރަނިވި ހަކަތައިގެ ދާއިރާއިން ވެސް ފާހަގަކޮށްލެވޭ މުހިންމު ހުށަހެޅުންތަކެއް މި ފޯރަމުގައި ހިމެނެއެވެ. އެގޮތުން އައްޑޫ ސިޓީ ކައުންސިލާއި ފުވައްމުލަކު ސިޓީ ކައުންސިލުން ސޯލާ ހޯމް ބެޓެރީ މަޝްރޫޢަކަށް އިންވެސްޓަރުން ހޯދަން މަސައްކަތްކުރަމުންދާއިރު، ކުޅުދުއްފުށީ ސިޓީ ކައުންސިލުން ވަނީ "ގޭދޮށު އިންޖީނުގެ" ގެ ނަމުގައި އަވިން ހަކަތަ އުފައްދާ މަޝްރޫޢެއް ހުށަހަޅާފައެވެ. މީގެ އިތުރުން އައްޑޫ އަދި ފުވައްމުލަކު ސިޓީ ކައުންސިލް ގުޅިގެން ޖުމްލަ އަށް މަޝްރޫޢެއް ހިންގަން ފައިސާ ހޯދަން ހުށަހަޅާފައިވާއިރު، އޭގެ ތެރޭގައި އައްޑޫ ސިޓީގައި ބައިނަލްއަޤްވާމީ ފެންވަރުގެ ކޮންވެންޝަން ސެންޓަރެއް އެޅުން ވެސް ހިމެނެއެވެ.
"ރަށްވެހި ތަރައްޤީ" އިންވެސްޓްމެންޓް ފޯރަމަކީ ރާއްޖޭގެ ލާމަރުކަޒީ ނިޒާމު އިތުރަށް ހަރުދަނާކޮށް، ރަށްރަށާއި ސިޓީތަކަށް އިޤްތިޞާދީ މިނިވަންކަން ހޯދައިދިނުމަށް އެޅުނު ވަރަށް މުހިންމު ފިޔަވަޅެކެވެ. މި ފޯރަމުގެ ސަބަބުން ކައުންސިލްތަކުގެ ވިސްނުންތަކާއި އިންވެސްޓަރުންގެ ފުރުޞަތުތައް އެއްފަސްވެ، ރައްޔިތުންނަށް ފައިދާހުރި ދެމެހެއްޓެނިވި ތަރައްޤީގެ މަޝްރޫޢުތައް ހަޤީޤަތަކަށް ވެގެންދާނެ ކަމަށް އުންމީދު ކުރެވެއެވެ.
