ށ.ފުނަދޫގައި މިހާރު ކުރިއަށްދާ ޑަބްލިޔުޑީސީ ހޭންޑްބޯޅަ ޓޯނަމަންޓުގައި ރޭ ކުޅުނު ދެވަނަ މެޗުގައި 9-3 ގެ ނަތީޖާއަކުން ފުނަދޫ ސްކޫލް ބަލިކޮށް ށ. އަތޮޅު ހޮސްޕިޓަލުން މުބާރާތުގެ ސެމީފައިނަލްގެ ޖާގައެއް ކަށަވަރުކޮށްފިއެވެ.

މުބާރާތުގައި ށ.އަތޮޅު ހޮސްޕިޓަލް ކުޅުނު ފުރަތަމަ މެޗުގައި ޔުނައިޓެޑް ބީއެމްއެލް އަތުން 11-0 ގެ ތަފާތުބޮޑު ނަތީޖާއަކުން ބަލިވެފައިވާއިރު، ފުނަދޫ ސްކޫލް ކުޅުނު ފުރަތަމަ މެޗުގައި 11-3 ގެ ނަތީޖާއަކުން ޔުނައިޓެޑް ބީއެމްއެލް އަތުން އެޓީމު ވެސް ވަނީ ބަލިވެފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ދެލަނޑުގެ ލީޑަކާއެކު 4-2 ގެ ނަތީޖާއަކުން ހޮސްޕިޓަލް ކުރީގައި އޮވެގެންނެވެ. އަދި ދެވަނަ ހާފުގައި ހޮސްޕޓަލުން އިތުރު ފަސް ލަނޑު ކާމިޔާބުކުރިއިރު، މިހާފުގައި ފުނަދޫ ސްކޫލަށް ކާމިޔާބު ކުރެވުނީ އެންމެ ލަނޑެކެވެ.

އެގޮތުން މިމެޗުގައި ށ. އަތޮޅު ހޮސްޕިޓަލްގެ ސާދުނާ މުހައްމަދު ހަ ލަނޑު ކާމިޔާބުކުރިއިރު، އާމިނަތު ހަމްނާ ވަނީ ދެލަނޑު ކާމިޔާބުކޮށްފައެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ އައިޝަތު އަހުމަދު އެވެ.

މީގެ އިތުރުން މިމެޗުގައި ފުނަދޫ ސްކޫލްގެ މަރިޔަމް ހަސަން، ސާދުނާ އަލީ އަދި ފާތުމަތު ޔަޝްފާ މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ ށ. އަތޮޅު ހޮސްޕިޓަލްގެ ކީޕަރު އަޒީޒާ މޫސާ އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ދެމެޗުން ހޯދި ތިން ޕޮއިންޓާއެކު ގުރޫޕް އޭގެ ދެވަނަ ޓީމުގެ ގޮތުގައި ށ.އަތޮޅު ހޮސްޕިޓަލް ސެމީފައިނަލުން ޖާގަ ހޯދިއިރު، ފުނަދޫ ސްކޫލުން މުބާރާތް ނިންމާލީ ކުޅުނު ދެމެޗުން ވެސް ބަަލިވެ ޕޮއިންޓެއް ނުލިބި ގުރޫޕްގެ ފުލުގައި އޮވެއެވެ.

27 ސެޕްޓެމްބަރު 2026 އިން 03 އޮކްޓޯބަރު 2026 ގެ ނިޔަލަށް ކުރިއަށްދާ މިމުބާރާތުގައި މިއަހަރު ޖުމްލަ ހަ ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަ ޓީމު ދެ ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭއިރު، މުބާރާތުގެ ފައިނަލް މެޗު ކުޅުމަށް ހަމަޖެހިފައިވާނި އޮކްޓޯބަރު މަހުގެ 03 ވަނަ ދުވަހުއެވެ.