ކުޑަކުދިންނަށް އުފާވެރި އަދި މަޖާ ވަގުތުތަކެއް ހޯދައިދިނުމުގެ މަޤްޞަދުގައި، މޯލްޑިވްސް ޕޮލިސް ސަރވިސްގެ ހުޅުމާލެ ޕޮލިހުން އިސްނަގައިގެން ބާއްވާ ޚާއްޞަ "ކުޑަކުދިންގެ ހަވީރު" މާދަމާ ބޭއްވުމަށް ހަމަޖެހިއްޖެއެވެ.

މި ހަވީރު ކުރިއަށްދާނީ 2026 އޮކްޓޫބަރު 3 ވާ ހޮނިހިރު ދުވަހުގެ ހަވީރު 4:00 އިން 6:00 އަށް، ހުޅުމާލެ ފޭސް 2 ގެ ރުއްގަނޑު 3 ސަރަޙައްދުގައެވެ.

ކުޑަކުދިން ގަޔާވާނެ ގިނަ ޙަރަކާތްތަކަކާއެކު ކުރިއަށްގެންދާ މި އިވެންޓުގެ ތެރެއިން ވަރަށް ޚާއްޞަ "ލަކީ ޑްރޯ" އެއް ކުރިއަށް ގެންދިއުމަށް ވަނީ ހަމަޖެހިފައެވެ.

މި ލަކީޑްރޯގެ ނަސީބުވެރިންނަށް ކުޑަކުދިން ދުއްވާ 2 ބެޓެރީ ކާރާއި، ކުޑަކުދިންގެ ހެލްމެޓުގެ އިތުރުން ގިނަ ޢަދަދެއްގެ އަގުހުރި ހަދިޔާތަކެއް ލިބިގެންދާނެއެވެ.

ހުޅުމާލެ ޕޮލިހުން އިންތިޒާމުކުރާ މި ހަވީރަކީ ފުލުހުންނާއި ކުޑަކުދިން އަދި ޢާއިލާތަކާ ދެމެދު އޮންނަ ގުޅުން ބަދަހިކޮށް، މަގުމަތީގެ ރައްކާތެރިކަމާއި އަމާން މާޙައުލަކަށް ކުދިން އަހުލުވެރިކުރުމުގެ ފުރުޞަތު ފަހިކޮށްދިނުމަށް ބާއްވާ ހަރަކާތެކެވެ.