ދިވެހި ޤައުމިއްޔަތު ބިނާވެފައިވާ އެންމެ މައިގަނޑު އަސާސަކީ އަދި މައިބަދައަކީ މާތްވެގެންވާ އިސްލާމްދީން ކަމަށާއި، ޤައުމިއްޔަތު އޭގެ އެންމެ އުސްމިނަށް ގެންދިއުމަށްޓަކައި ޚާއްޞަ މަސައްކަތްތަކެއް ސަރުކާރުން ފައްޓަވާފައިވާ ކަމަށް ފަންނާއި ސަޤާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.

ރާއްޖެ އިސްލާމްވިތާ 900 އަހަރު ފުރުމުގެ މުނާސަބަތުގައި ބޭއްވި ރަސްމީ އިޙްތިފާލުގައި ވާހަކަދައްކަވަމުން ވަޒީރު ފާހަގަކުރެއްވީ، ހިޖުރައިން 548 ވަނަ އަހަރު ދިވެހިން ތެދުމަގު ޚިޔާރުކުރި ހާދިސާއަކީ މުޅި ދިވެހި ތާރީޚުގައި ވެސް ފެނިގެންދިޔަ އެންމެ މުހިންމު އަދި އެންމެ ވަރުގަދަ ބަދަލު ކަމަށެވެ. އެގޮތުން، ދަރުމަވަންތަ ރަސްގެފާނު ބިންގާ އަޅުއްވައިދެއްވި އިސްލާމީ އުޞޫލުތަކުގެ ސަބަބުން، ދިވެހީންގެ ވިސްނުމަށާއި ބަހުރުވައަށާއި ސަޤާފަތަށް މަތިވެރި އިންޤިލާބީ ބަދަލުތަކެއް ގެނުވި ކަމަށް ވަޒީރު ވިދާޅުވިއެވެ.

ތާރީޚީ އަދި އާކިއޮލޮޖިކަލް ހޯދުންތަކަށް އަލިއަޅުއްވާލައްވަމުން ހީނާ ވިދާޅުވީ، ރާއްޖެއަކީ އެތައް ޒަމާނެއްވީ ޤަދީމީ ދައުލަތެއްކަން އެ ހޯދުންތަކުން ސާބިތުވާ ކަމަށެވެ. އަދި އިސްލާމްދީނުގެ ނޫރުން މި ޤައުމު އަލިވި ހިސާބުން ފެށިގެން ދިވެހި މުޖުތަމަޢުގެ ބާޠިލު އާދަކާދަތައް ނެތިގޮސް، ސައްޙަ ހަމަތަކެއްގެ މަތީގައި މުޅިން އައު އިސްލާމީ ސަޤާފަތެއް ބައްޓަންވެގެން ދިޔަކަން ދިރާސާތަކުން ހާމަވާކަން ވަޒީރު ފާހަގަކުރެއްވިއެވެ.

ވަޒީރު އިތުރަށް ވިދާޅުވީ، ދިވެހި ޝަޚުޞިއްޔަތާއި ތަރިކަ ދިރުވައި އާލާކުރުމަށްޓަކައި އަދިވެސް އިތުރު ފުޅާ ދިރާސާތަކެއް ހަދަންޖެހޭ ކަމަށެވެ. އަދި މިފަދަ ޢިލްމީ މަސައްކަތްތައް ކުރާނެ ޤާބިލު ދިވެހި ޒުވާނުން ބިނާކުރުމުގެ ޕްރޮގްރާމްތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްނަންގަވައިގެން ހިންގަވަމުން ގެންދަވާ ކަމަށް ވިދާޅުވިއެވެ. މި މަޝްރޫޢުތަކުގެ މައިގަނޑު އަމާޒަކީ ކޮންމެ ދިވެއްސެއްގެ ހިތުގައި ވެސް ޤައުމީ ފަޚުރާއި އިސްލާމީ ރުކުންތައް އަށަގެންނެވުން ކަމުގައި ވަޒީރު ބަޔާންކުރެއްވިއެވެ.

ރާއްޖެ މިއަދާ ހަމައަށް މިނިވަން ދައުލަތެއްގެ ގޮތުގައި ދެމިއޮތުމުގެ އަސްލަކީ އިސްލާމްދީންކަން ފާހަގަކުރައްވައި ވަޒީރު ވިދާޅުވީ، ކާބަފައިންނާއި ޤައުމީ އަބްޠާލުން ޝަހީދުވެދިޔައީ މި މާތް ދީނުގެ ޙިމާޔަތުގައި ކަމަށެވެ. އަދި ޒަމާނީ ދުނިޔޭގެ ގޮންޖެހުންތަކުގެ ތެރޭގައި ވެސް މި ޤައުމު އިސްލާމްދީނުގެ ސީދާ މަގުގައި ދެމެހެއްޓުމަށް އެންމެހައި ރައްޔިތުން އެކަތިގަނޑަކަށް ވެގެން މަސައްކަތްކުރުމަށް ވަޒީރު ހީނާ ވަލީދު ވަނީ ގޮވާލައްވާފައެވެ.