މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވުޒާރާއާއި، ކްލައިމެޓް އެންޑް ކްލީން އެއާ ކޯލިޝަން (ސީ.ސީ.އޭ.ސީ) ގުޅިގެން، އިމާރާތްތަކުގައި ހަކަތަ ސަމަކާރަކުރުމާ ގުޅޭ ދިވެހިރާއްޖޭގެ މިންގަނޑުތަކަށް އަހުލުވެރިކުރުވުމަށް ކުރިއަށް ގެންދާ ތަމްރީނު ވޯކްޝޮޕެއް ފަށައިފިއެވެ.

މި ވޯކްޝޮޕް ކުރިއަށްދާނީ ސެޕްޓެންބަރު 29 އިން އޮކްޓޫބަރު 1ގެ ނިޔަލަށެވެ. މި ވޯކްޝޮޕުގެ މައިގަނޑު މަގުސަދަކީ އިމާރާތްތައް ފަރުމާކުރުމާއި، ބިނާކުރުމާއި، އަދި ބޭނުންކުރުމުގައި ހަކަތަ އިގުތިސާދުކުރުމާއި ހަކަތަ ސަމަކާރަކުރުމުގެ އުސޫލުތައް ހިމެނުމަށް ބޭނުންވާ ފަންނީ ގާބިލުކަން ދާއިރާގެ މާހިރުންގެ ކިބައިގައި އިތުރުކުރުމެވެ. މި ތަމްރީނު ވޯކްޝޮޕުގައި ތަމްރީނު ދެއްވާނީ ޑިލޮއިޓް މޯލްޑިވްސްގެ ފަރާތުންނެވެ.

މި ވޯކްޝޮޕް ރަސްމީކޮށް އިފުތިތާހުކޮށްދެއްވީ މިނިސްޓަރ އޮފް ސްޓޭޓް ޑރ. މުޢާވިޔަތު މުޙައްމަދެވެ. އެމަނިކުފާނުގެ ވާހަކަފުޅުގައި، އިމާރާތެއް ބިނާކުރުމުގެ އެންމެ ކުރީ މަރުޙަލާތަކުން ފެށިގެން ހަކަތައިގެ އިސްރާފު ކުޑަކުރުމުގެ ވިސްނުން ގެންގުޅުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ. އަދި އިމާރާތްތައް ފަރުމާކުރުމާއި ބިނާކުރުމުގައި ނިންމާ ނިންމުންތަކަކީ މުޅި ގައުމުގެ ހަކަތަ ބޭނުންކުރާ މިންވަރަށް ދާއިމީ އަސަރުތަކެއް ކުރާނެ ކަމެއްކަމުގައި އެމަނިކުފާނު ފާހަގަކުރެއްވިއެވެ.

ޑރ. މުޢާވިޔަތުގެ ވާހަކަފުޅުގައި އިތުރަށް ވިދާޅުވީ، "މޯލްޑިވްސް އެނާޖީ އެފިޝަންސީ ގައިޑްލައިން ފޯ ބިލްޑިންގްސް" އަކީ އިމާރާތްތަކުގައި ހަކަތަ ބޭނުންކުރުން ހަރުދަނާކުރުމަށް މަގުދައްކައިދޭ ފަންނީ އުސޫލުތަކެއް ކަމަށެވެ. އަދި މި މިންގަނޑުގެ ނަތީޖާ ފެންނާނީ، އިމާރާތްކުރުމުގެ ދާއިރާގައި ހަރަކާތްތެރިވާ ފަންނީ ބޭފުޅުންނަށް މި އުސޫލުތައް ރަނގަޅަށް އޮޅުންފިލައި، ޢަމަލީ މަސައްކަތުގައި އެކަންކަން ތަންފީޒުކުރާ މިންވަރެއްގެ މައްޗަށް ކަމަށްވެސް އެމަނިކުފާނު ވިދާޅުވިއެވެ.

އިންޖިނިއަރިންގ، އާކިޓެކްޗަރ އަދި އިމާރާތްކުރުމުގެ ދާއިރާ ތަމްސީލުކުރާ ސަރުކާރުގެ މުއައްސަސާތަކާއި، އަމިއްލަ ކުންފުނިތަކުގެ އިތުރުން މި ދާއިރާތަކުގެ ފަންނީ ބޭފުޅުން ހިމެނޭހެން ޖުމުލަ 40 ފަރާތަކުން މި ތަމްރީނު ވޯރކްޝޮޕްގައި ބައިވެރިވެއެވެ.

މި ވޯކްޝޮޕްގެ ބައިވެރިން "މޯލްޑިވްސް އެނާޖީ އެފިޝަންސީ ގައިޑްލައިން ފޯ ބިލްޑިންގްސް" މިންގަނޑުގެ މުހިންމު ބައިތަކަށް ޢަމަލީގޮތުން އަހުލުވެރިކުރުވޭނެއެވެ. މީގެ ތެރޭގައި އިމާރާތުގެ ބޭރުގެ ފަރުމާ (ބިލްޑިންގ އެންވެލޮޕް)، އިމާރާތުގެ އެތެރޭގެ ފިނިހޫނުމިން ހިފެހެއްޓުން، އަލިކުރުމުގެ ނިޒާމު، ފެނާއި ނަރުދަމާގެ ނިޒާމު، އިއާދަކުރަނިވި ހަކަތައިގެ ނިޒާމުތައް އަދި އިމާރާތް ބެލެހެއްޓުމުގެ ކަންކަން ހިމެނެއެވެ.

މީގެ އިތުރުން،  ‘eQUEST’ ހަކަތަ މޮޑެލްކުރާ ސޮފްޓްވެއަރ ބޭނުންކޮށްގެން، ރާއްޖޭގެ މޫސުމީ ހާލަތަށް ރިއާޔަތްކޮށް އިމާރާތްތަކުގެ މޮޑެލް ތައްޔާރުކުރުމާއި، ހަކަތަ ބޭނުންވާނެ މިންވަރު އަންދާޒާކުރުމާއި، އަދި ހަކަތަ ސަލާމަތްކުރެވޭނެ ގޮތްތައް ދެނެގަތުމުގެ ޢަމަލީ ތަމްރީނުތައް މި ވޯކްޝޮޕްގައި ކުރިއަށްދާނެއެވެ.

މި ވޯކްޝޮޕަކީ ދިވެހިރާއްޖޭގައި ހަކަތަ ސަމަކާރަ އަދި ހަކަތަ އިގުތިސާދުކުރާ އިމާރާތްތައް ބިނާކުރުމަށް ކުރެވޭ މަސައްކަތްތަކުގެ ބައެކެވެ. މިކަމުގެ ސަބަބުން ހަކަތަ ބޭނުންކުރާ މިންވަރު މަދުކޮށް، ކަރަންޓު ބިލުތަކަށް ކުރާ ހޭދަ ކުޑަވެގެންދާނެއެވެ. އަދި މިއީ ތިމާވެއްޓާއި ދެމެހެއްޓެނިވި ތަރައްގީއަށް ދިވެހިރާއްޖެއިން ކަނޑައަޅައިފައިވާ ލަނޑުދަނޑިތައް ހާސިލުކުރުމަށް އެޅޭ މުހިންމު ފިޔަވަޅެކެވެ.