ށ.މިލަންދޫގައި ކުރިއަށްގެންދިޔަ ބެޑްމިންޓަން އަމްޕަޔަރުން ތަމްރީނު ކުރުމުގެ ކޯސް ނިންމާލައިފި އެވެ.

މިކަމަށްޓަކައި ބޭއްވި ހާއްސަ ރަސްމިއްޔާތު ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާއި ބެހޭ ވުޒާރާގެ ސްޓޭޓް މިނިސްޓަރު އަހުމަދު މުހައްމަދު ވަހީދު ޝަރަފުވެރިކޮށްދެއްވާފައިވާއިރު، މި ކޯސް ނިންމި ބައިވެރިންނަށް ސެޓްފިކެޓްވެސް ވަނީ ހަވާލުކޮށްދެއްވާފަ އެވެ.

ވުޒާރާއިން ބެޑްމިންޓަން އެސޯސިއޭޝަނާއި މިލަންދޫ ކައުންސިލް އަދި މޯލްޑިވްސް ނޭޝަނަލް އިންސްޓިޓިއުޓް އޮފް ސްޕޯޓްސްއާއި ގުޅިގެން މިލަންދޫގައި މި ކޯސް ކުރިއަށް ގެންގޮސްފައިވަނީ މި މަހުގެ 22 އިން 28 ވަނަ ދުވަހުގެ ނިޔަލަށެވެ.

ވުޒާރާއިން ބުނީ 7 ދުވަހުގެ މުއްދަތަށް ކުރިއަށްގެންދިޔަ މި ކޯސް 18 ބައިވެރިން ފުރިހަމަކޮށްފައިވާ ކަމަށެވެ. އަދި މި ކޯހުގެ ބައިވެރިންނަށް ބެޑްމިންޓަންއާއި ގުޅޭ ގިނަ ހުނަރުތައް ކިޔާދީ އަދި ޕްރެކްޓިކަލް ކްލާސްތައްވެސް ނަގާދީފައިވާކަމަށްވެސް ވުޒާރާއިން ބުންޏެވެ.

މި ކޯހުގައި ކްލާސްތައް ނަގައިދެއްވީ ތަޖުރިބާކާރު އިންސްޓްރަކްޓަރުން ކަމަށްވާ އަބްދުލް ކަރީމް އަދި އަހުމަދު ޝިހާމްކަމަށް ވުޒާރާއިން ބުންޏެވެ.